У Мінску працягваюць развіваць сетку гарадскога грамадскага транспарту і адкрываць новыя маршруты. Пра планы на найбліжэйшы час расказаў дырэктар ДП «Сталічны транспарт і сувязь» Юрый Супрановіч, піша агенцтва «Мінск-Навіны».
Адным з раёнаў, дзе з'яўляюцца новыя транспартныя сувязі, стаў мікрараён «Паўночны бераг». З 13 ліпеня тут працуе новы аўтобусны маршрут №186 «Станцыя метро «Акадэмія навук» — Міжнародны выставачны цэнтр». Яго запусцілі, каб пераразмеркаваць пасажырапаток з маршрутаў №26 і 26д. На новым кірунку таксама можна выкарыстоўваць счэпленыя аўтобусы асабліва вялікай умяшчальнасці.
У перспектыве «Паўночны бераг» плануюць злучыць новым аўтобусным маршрутам са станцыяй метро «Барысаўскі тракт».
У Лошыцы-10 схема аўтобусных маршрутаў №3С і №102 будзе паступова мяняцца па меры ўводу новых жылых дамоў. Акрамя таго, па вуліцы Станіслава Манюшкі плануюць запусціць новы тралейбусны маршрут ад дыспетчарскай станцыі «Лошыца-2» у бок чыгуначнага вакзала.
Яшчэ адзін новы маршрут плануюць арганізаваць па вуліцы Голубева. Ён будзе праходзіць ад разваротнага кальца «Люцынская» да дыспетчарскай станцыі «Адоеўскага», з заездам да станцыі метро «Спартыўная».
Пасля адкрыцця эстакады, якая злучыць вуліцы Калеснікава і Ратамскую, адзін з аўтобусных маршрутаў плануюць падоўжыць ад мікрараёна Каменная Горка ў кірунку ДС «Вяснянка».
Больш транспарту стане і на аўтобусным маршруце №11. Гэта звязана з ростам пасажыраплыні ў мікрараёне Сухарава-8. Акрамя таго, на маршрутах №11 і №38 з'явіцца новы прыпынак.
Колькасць пасажыраў гарадскога транспарту ў Мінску працягвае расці. За першыя сем месяцаў года метро перавезла 157,4 мільёна пасажыраў — на 3,6% больш, чым за аналагічны перыяд мінулага года. Наземным транспартам скарысталіся 270,1 мільёна пасажыраў, што на 2,2% больш за леташні паказчык.
Цяпер у Мінску дзейнічаюць 296 маршрутаў наземнага гарадскога грамадскага транспарту. У гадзіны пік на іх працуе каля 1440 адзінак рухомага складу, а ў выхадныя — 827.
У Вільні выпрабоўвалі электробус даўжынёй 25 метраў
Кіроўцам гарадскіх аўтобусаў абяцаюць заробкі да 5000 рублёў. Хто можа разлічваць на такія грошы?
Праз 20 гадоў тралейбусы вернуцца яшчэ на адзін участак мінскага праспекта Незалежнасці
Пры якой тэмпературы ў транспарце абавязаныя ўключаць кандыцыянеры?
Каментары