Кіраўнік МЗС: Германія хоча пакласці канец вайне ва Украіне і паспрыяць вяртанню ўкраінскіх мужчын на радзіму

Гаворачы пра сваю пазіцыю адносна Расіі, Вадэфуль падкрэсліў, што для паляпшэння адносінаў Крэмль павінен прадэманстраваць імкненне да спынення вайны:

«Германія хоча пакласці канец гэтаму канфлікту і дамагчыся таго, каб сітуацыя ў Еўропе ў цэлым зноў супакоілася. Але гэта магчыма толькі тады, калі будзе спыненая такая агрэсія, як гэтая вайна ва Украіне, для якой не было ніводнай прычыны. […] Калі ён [Пуцін] сапраўды гатовы гаварыць пра спыненне гэтай вайны, тады, безумоўна, будуць гатовыя гаварыць з ім пра гэта».

Вадэфуль спадзяецца, што цяперашнія перамовы Украіны і Расіі наконт транспартавання збожжа ў Чорным моры будуць распаўсюджвацца і на энергетычную інфраструктуру. Гэта было б «магчыма, першым маленькім крокам да таго, каб гэты канфлікт наблізіўся да канца», — сказаў міністр.

Таксама Ёган Вадэфуль абвінаваціў міністра замежных спраў Расіі Сяргея Лаўрова ў хлусні.

Расійскі міністр замежных спраў заяўляе, што рэакцыя Германіі на спробу дыверсіі ў аэрапорце Лейпцыгу — гэта «пачатак сапраўднай вайны», і адмаўляе дачыненне Расіі да гэтага нападу. Вадэфуль сказаў:

«Мы дакладна ведаем, і Сяргей Лаўроў, вядома, таксама ведае, што Расія ўчыніла гэта ў Лейпцыгу — і што мы на гэта адрэагавалі, мусілі адрэагаваць. Ён гэта ведае, гэта відавочна кожнаму».

Рытарычную эскалацыю Лаўрова Вадэфуль назваў «выяўленнем пэўнага расійскага адчаю». Расія «ў гэтай вайне далёка не такая паспяховая, як хацела б», таму што «вайна павінна была скончыцца за некалькі дзён, а ідзе ўжо пяты год».

Вадэфуль таксама заявіў, што хоча большай падтрымкі з боку прэзідэнта Украіны Уладзіміра Зяленскага.

«Цяпер мы з’яўляемся найбуйнейшым прыхільнікам Украіны, калі гаворка ідзе пра фінансавую і ваенную падтрымку. І, натуральна, нямецкая абаронная прамысловасць павінна атрымліваць ад гэтага выгаду. Я сказаў гэта і прэзідэнту Украіны Зяленскаму падчас свайго апошняга візіту. Мы з вамі, мы вас падтрымліваем. Але я таксама павінен тлумачыць гэта нямецкім падаткаплацельшчыкам, і самае меншае, што вы можаце зрабіць, — гэта пры ўсіх закупках таксама прыцягваць нямецкую абаронную прамысловасць. На дадзены момант мы не цалкам задаволеныя тым, колькі замоваў размяшчаецца ў Германіі. Таму цяпер мы папрасілі ўкраінскі ўрад праверыць гэта і паклапаціцца пра тое, каб сітуацыя палепшылася».

Вадэфуль таксама згодны з нямецкімі палітыкамі, якія патрабуюць вяртання ўкраінскіх мужчын прызыўнога ўзросту ва Украіну. Пры гэтым нямецкі ўрад мог бы дапамагчы ў гэтым Кіеву, перадаўшы даныя пра ўкраінскіх грамадзян у Германіі.

«Мы ж ведаем, хто тут жыве. Напрыклад, хто атрымлівае сацыяльныя выплаты, хто тут зарэгістраваны, у каго ёсць статус знаходжання. [Украінскі ўрад можа] напісаць гэтым мужчынам, што яны павінны быць прызваныя».

Пры гэтым, як лічыць Вадэфуль, вяртанне павінна адбывацца «без прымусу».

Міністр таксама заявіў, што адхіляе ідэі скарачэння падтрымкі Украіны і перагляду ваенных выдаткаў, якія гучаць з шэрагаў СДПГ і АдГ. «Пераважная большасць насельніцтва Германіі падтрымлівае нашу палітыку адносна Украіны», — заявіў Вадэфуль.

• 1
• 0
• 2
• 0
• 0
• 0
• 0
• 0