Рызыкну быць разарваным разьятранымі студэнткамі, але сьцвярджаю: ідыёцкая жахаўка “Ведзьма” лепшая за глямурнага “Мечаносца”.
Спрытны журналюга, які не вылучаецца маральнымі паводзінамі, адпраўляецца ў правінцыю, каб зрабіць рэпартаж пра таямнічыя зьявы. Уначы герой трапляе ў стары дом з глухою бабулькай.
Гаспадыня зьяўляецца ведзьмай – і падчас спробы спакусіць юнака, гіне. Журналіст, які пераапранаецца сьвятаром, мусіць цяпер маліцца тры ночы – у царкве з труною і ведзьмаю...
Так, сапраўды, – гэта скрадзены сюжэт гогалеўскага “Вію”. Але цікава, куды закінулі вытворцы гэную гісторыю. Амэрыканская глыбінка – зьнятая ў Эстоніі з прыбалтыйскімі акторамі – і з расейскімі сэрыяльнікамі на галоўных ролях. Менавіта так паказвалі гнілы Захад ў 70-ыя гады – і менавіта нашчадкам палітычных выкрывальніцкіх стужак зьяўляецца гэты “першы расейскі фільм жахаў”.
Але ня будзем актыўна плявацца.
Акторы граюць кепска, дыялёгі... мама мая родная, атмасфэрка – рогат у залі, адмысловыя эфэкты... – а што вы хацелі ад нізкабюджэтнае жахаўкі!? Для кіно клясы “Z” (ёсьць і такое) – прымальны ўзровень.
І самае галоўнае, кіно сьвядома скіраванае на (багаты) амэрыканскі рынак. А там і куды горшае дабро акупляецца. Варта толькі пазначыць жанр – бяз псэўдааўтарскіх уздыхаў і глямурна-пустых кліпаваньняў.
Што карціна глядзелася б лепей – адбывайся дзеяньне ва Ўкраіне – гэта так. Але істотная сама ўвага да жанру і пошук падыходнай аўдыторыі.
А для нашае публікі дадатковая забава – рагатаць з тупых ляпаў расейскага рэжысэра. Калі нуда ў сон ня зморыць.
Ведзьма (Ведьма)
Расея – Эстонія, 2006, каляровы, 93 хв.
Рэжысэр: Алег Фясенка
Ролі выконваюць: Яўгенія Крукава, Валер Нікалаеў, Іта Эвэр, Лембіт Ульфсак, Юхан Ульсфак.
Жанр: Містыка
Адзнака: 3 (з 10)
Глядзіце таксама вынікі кінагоду.
Каментары