Vyjšła pieravydańnie «Dzikaha palavańnia» Karatkieviča pa-anhielsku
Knihu vypuściła anhła-niderłandskaje vydaviectva Glagoslav.
Zasnavanaje vychadcam ź Lvova, jano śpiecyjalizujecca na pierakładach sa słavianskich movaŭ.
Raman publikujecca ŭ starym pierakładzie, zroblenym u svoj čas Mary Mintz dla savieckaha vydaviectva Raduga. Budziem čakać vodhukaŭ ad tych, chto pračytajuć knihu, ci vypraŭlenyja tam chiby raniejšaha vydańnia. Jak zaznačaje ŭ Fejsbuku žurnalist i pierakładčyk (i redka pišučy, ale vybitny paet) Alaksiej Znatkievič, jaki čytaŭ pieršavydańnie, pierakład niepaskudna čytajecca, ale maje i chiby. I padaje kamičny prykład, kali strava «huby łasia» pierakładajucca jak «huby łasosia». Łasosi to ŭ rekach Biełarusi sapraŭdy vialisia, ale ž jeści ich huby... mmm... prykravata.
«Dzikaje palavańnie karala Stacha» — heta mistyčny tryler na histaryčnym tle, — pišacca ŭ anatacyi knihi na sajcie vydaviectva. — Jość u im i razvažańni pra los svajoj nacyi, — zaznačajuć vydaŭcy. — Ad pieršych staronak čytač pahružajecca ŭ atmaśfieru vuścišy pierad fatumam. Tryvoha ahortvaje jaho, kali jon razam ź Biełareckim na bałotach sustrakaje dziŭnych ludziej, jakija akazvajucca varjatami ci pieralakanymi abo nośbitami važnych tajamnic, a časam zvyčajnymi niebarakami».
Glagoslav Publications pradaje knihu jak na papiery ŭ miakkim i ćviordym pieraplotach, tak i ŭ elektronnym vyhladzie. Cana vydańnia ŭ ćviordaj vokładcy składaje 25,5 funta, u miakkaj — 18,8 funta, u elektronnym vyhladzie — 9,95 funta.
Glagoslav — adzinaje na Zachadzie anhłamoŭnaje vydaviectva, jakoje siońnia prajaŭlaje rehularnuju cikavaść da biełaruskaj litaratury. Raniej u im vyjšła kniha Alesia Adamoviča, ciapier jany robiać pierakład «Rybinaha horada» Natałki Babinaj.
Kamientary