Baravikova i Masła vychodziać z łukašenkaŭskaha Sajuza piśmieńnikaŭ

Usiaho za apošni čas z aficyjnaha Sajuza piśmieńnikaŭ Biełarusi (SPB) vyjšli piać značnych tvorcaŭ. Heta prazaiki Andrej Fiedarenka, Aleś Navaryč i Valer Hapiejeŭ, paetka Raisa Baravikova i dziciačaja piśmieńnica Alena Masła.

Bolšaść ź ich akazałasia ŭ SPB, bo pracavali ŭ dziaržaŭnych litaraturnych vydańniach i vydaviectvach. Udzieł u aficyjnym sajuzie byŭ, faktyčna, umovaj zachavańnia pracoŭnaha miesca. Heta niahledziačy na toje, što dyskryminacyja pa palityčnych i kulturnych prykmietach zabaroniena dziejnymi zakonami i moža być pakarana.

Pa miery taho, jak jany sychodziać z pracy ŭ dziaržaŭnych vydańniach i chołdynhach, jany pakidajuć i sajuz.

Raisa Baravikova raniej uznačalvała chołdynhavaje vydańnie «Maładość». A Aleś Navaryč atrymaŭ premiju z ruk Łukašenki za vydatny raman «Litoŭski voŭk». Alena Masła — aŭtarka cudoŭnych tvoraŭ dla dziaciej, abličča sučasnaj biełaruskaj dziciačaj litaratury.

«Pra svoj vychad, a taksama pra toje, jakaja ja svołač, zaprašaju pačytać na sajcie Litkrytyka.by, — iranizuje Alena Masła ŭ svaim Fejsbuku. — Pačytaŭšy ciopłyja słovy pra siabie, pierakanałasia ŭ čarhovy raz, što zrabiła adzina pravilny krok, daŭno žadany.

Nielha tryvać doŭha, ludzi. Rašučyja kroki treba rabić rašuča! — źviartajecca Masła da kaleh. — Asablivuju ŭvahu źviarnicie, jak kamientujecca cytata Uładzimira Karatkieviča «Nielha jeści chleb naroda i hrebavać jaho movaj».

Karystalniki sacyjalnych sietak vykazali tvorcam, jakija pakinuli SPB, haračuju padtrymku. U abmierkavańniach hetaj viestki niama nivodnaha niehatyŭnaha vodhuku. Adno što niekatoryja dakarajuć piśmieńnikaŭ za ich kolišniuju słabaść: ustupleńnie ŭ SPB. Na dumku kamientataraŭ, hramadzianski vybar moža kaštavać Alenie Masła pracoŭnaha miesca.

Stvareńniem SPB łukašenkaŭcy sprabavali razburyć niezaležny Sajuz biełaruskich piśmieńnikaŭ, jaki im tak i nie ŭdałosia asiadłać. Kiraŭnikami svajho sajuza litaratary paśladoŭna abirali tvorcaŭ, źviazanych z apazicyjaj i rucham nacyjanalnaha vyzvaleńnia: Volhu Ipatavu, Uładzimira Niaklajeva, Alesia Paškieviča, Barysa Piatroviča.

Na čale ž SPB ułady pastavili hienierała milicyi Čarhinca — piśmieńnika, jaki nie karystajecca biełaruskaj movaj.

Napačatku, kab zavabić u SPB viadomych piśmieńnikaŭ, SPB dekłaravała žadańnie praciahvać kurs na padtrymku nacyjanalnaj kultury, ale šlacham supracoŭnictva z uładami. Adnak z časam pad kryłom SPB zhurtavalisia čarnasociency. Hetak, sajt Litkrytyka.baj nazyvaje piśmieńnikaŭ i ludziej, jakija lubiać biełaruskuju movu i zaklikajuć da jaje vykarystańnia, niajnačaj jak «movafiłami».

Piśmieńniki, što vyjšli z SPB, nazyvajuć dalejšaje siabroŭstva ŭ Sajuzie Čarhinca niesumiaščalnym sa svaimi maralnymi pryncypami.

• 0
• 0
• 0
• 0
• 0
• 0
• 0
• 0