Adznačyć Kalady ŭ vioscy, jakuju CNN uklučyła ŭ top-10 najlepšych

U vioscy Pahost pieršym u našaj krainie ŭ 2004 hodzie ŭziaty pad achovu dziaržavy abrad na śviata Jurja «Karahod» jak abjekt niemateryjalnaj kulturnaj spadčyny (u litaratury — «Turaŭski karahod», bo jość etničnaj admietnaściu žycharoŭ Turaŭščyny). Abrad viadomy amal va ŭsich vioskach Turaŭščyny, adnak u žyvym bytavańni jaho zachavaŭ tolki falkłorna-etnahrafičny hurt «Mižrečča», stvorany ŭ 1980 hodzie vydatnaj śpiavačkaj i zachavalnicaj tradycyjnaj kultury vioski Kaciarynaj Alaksiejeŭnaj Pančenia. Hurt zachoŭvaje materyjalnuju i niemateryjalnuju kulturu svajoj vioski, zvyčai i abrady, charakternyja dla žycharoŭ Turaŭščyny.

U 2010 hodzie biełaruskaja vioska Pahost zaniała treci radok u śpisie najlepšych miescaŭ dla śviatkavańnia Kaladaŭ pavodle viersii telekampanii CNN.

Prahrama tura

5 studzienia zajezd u Turaŭ naviedać muziej, 2 carkvy (adzin novy sabor, u druhoj carkvie 2 kamiennyja kryžy), Barysa-Hlebskija mohiłki (dzie raście kamienny kryž), zamčyšča.

Turaŭščynaj nazyvajuć mižrečča Prypiaci i jaje pravabiarežnych prytokaŭ — Haryni i Śćvihi z častkaj prylehłaj terytoryi z uschodu i poŭdnia. Heta byŭ ziemlarobčy, ramieśnicki i duchoŭny aazis na terytoryi našaj krainy jašče z dachryścijanskich časoŭ. Vioska Pahost — adno z samych staražytnych pasieliščaŭ u hetym rehijonie. Jana znachodzicca, jak u klinku, u mižreččy Prypiaci i Śćvihi i jość paŭnočna-ŭschodnim punktam Turaŭščyny.

Uličvajučy što 5-6 studzienia heta jašče post, možna budzie pakaštavać miascovyja posnyja stravy, pačuć i paśpiavać razam postavyja pieśni, ubačyć, jak robiać sałamianaha pavuka, papiarovyja kvietki, kaladnyja maski.

I ŭrešcie, abaviazkova paŭdzielničać u padrychtoŭcy da Kaladaŭ (6 studzienia) i, biezumoŭna, u samim abradzie (7 studzienia).

Jak tłumačyć Rehina Hamzovič, «pieršy dzień Rastva na ich havorcy nazyvajecca Kalada — iduć pa vioscy z kaladnaj zorkaj, zvanočkam abviaščajučy radasnuju viestku, śpiavajuć pad voknami pieśni-kaladki. Siarod piesień-kaladak jość «prachadnaja pieśnia» z takimi słovami: «pajechała kalada z kanca ŭ kaniec». Značycca, značeńnie słova «kalada» — heta trochdzionnaje śviatkavańnie, pačynajučy z Rastva 7 studzienia; zatym ahulnaviadomaja kalada — heta pačastunak kaladoŭščykam, jaki składajecca sa stravaŭ z zabitaha kabana, pirahoŭ (chleb z pšaničnaj muki), inšych daroŭ za śpiavańnie i vinšavańnie sa śviatam; a taksama cykł śviataŭ u honar zimovaha soncavarotu, jaki składajecca z Rastva, Ščadraca i Vadochryšča. U pahaščan kalada — heta taksama hurt, jaki idzie ź pieśniam-kaladkami i prynosić śviata ŭ kožnuju chatu».

A heta značyć, što paśla vandroŭki budzie dosyć času pravieryć atrymanaja viedy na praktycy: pakaladavać, pavinšavać rodnych i siabroŭ.

Rehina Stanisłavaŭna raskaža šmat cikavaha pra Turaŭščynu, v. Pahost i hurt «Mižrečča», nie kažučy ŭžo pra kaladnuju tradycyju.

Zabiaśpiečyć načleham łaskava prapanavali ŭdzielnicy hurta «Mižrečča».

Vam spatrebiacca hrošy na prajezd, naviedvańnie muzieja i charčavańnie (300-400 tysiač biełaruskich rubloŭ, bo cana prajezdu ŭ adzin bok na maršrutcy —110 tysiač rubloŭ).

Arhanizatary: RMHA «Studenckaje etnahrafičnaje tavarystva». Hramadski ekśpiert u tradycyjnaj kultury Rehina Hamzovič.

Zajaŭki i pytańni čakajuć na numar +375 25 9059589 (Nastaśsia).

• 0
• 0
• 0
• 0
• 0
• 0
• 0
• 0