«Студэнцкае этнаграфічнае таварыства» запрашае ў вандроўку на святкаванне Калядаў 5-7 студзеня ў вёсцы Пагост Жыткавіцкага раёна да фальклорнага-этнаграфічнага гурта «Міжрэчча».
У вёсцы Пагост першым у нашай краіне ў 2004 годзе ўзяты пад ахову дзяржавы абрад на свята Юр’я «Карагод» як аб’ект нематэрыяльнай культурнай спадчыны (у літаратуры — «Тураўскі карагод», бо ёсць этнічнай адметнасцю жыхароў Тураўшчыны). Абрад вядомы амаль ва ўсіх вёсках Тураўшчыны, аднак у жывым бытаванні яго захаваў толькі фальклорна-этнаграфічны гурт «Міжрэчча», створаны ў 1980 годзе выдатнай спявачкай і захавальніцай традыцыйнай культуры вёскі Кацярынай Аляксееўнай Панчэня. Гурт захоўвае матэрыяльную і нематэрыяльную культуру сваёй вёскі, звычаі і абрады, характэрныя для жыхароў Тураўшчыны.
У 2010 годзе беларуская вёска Пагост заняла трэці радок у спісе найлепшых месцаў для святкавання Калядаў паводле версіі тэлекампаніі CNN.
Праграма тура
5 студзеня заезд у Тураў наведаць музей, 2 царквы (адзін новы сабор, у другой царкве 2 каменныя крыжы), Барыса-Глебскія могілкі (дзе расце каменны крыж), замчышча.
Тураўшчынай называюць міжрэчча Прыпяці і яе правабярэжных прытокаў — Гарыні і Сцвігі з часткай прылеглай тэрыторыі з усходу і поўдня. Гэта быў земляробчы, рамесніцкі і духоўны аазіс на тэрыторыі нашай краіны яшчэ з дахрысціянскіх часоў. Вёска Пагост — адно з самых старажытных паселішчаў у гэтым рэгіёне. Яна знаходзіцца, як у клінку, у міжрэччы Прыпяці і Сцвігі і ёсць паўночна-ўсходнім пунктам Тураўшчыны.
Улічваючы што 5-6 студзеня гэта яшчэ пост, можна будзе пакаштаваць мясцовыя посныя стравы, пачуць і паспяваць разам поставыя песні, убачыць, як робяць саламянага павука, папяровыя кветкі, калядныя маскі.
І ўрэшце, абавязкова паўдзельнічаць у падрыхтоўцы да Калядаў (6 студзеня) і, безумоўна, у самім абрадзе (7 студзеня).
Як тлумачыць Рэгіна Гамзовіч, «першы дзень Раства на іх гаворцы называецца Каляда — ідуць па вёсцы з каляднай зоркай, званочкам абвяшчаючы радасную вестку, спяваюць пад вокнамі песні-калядкі. Сярод песень-калядак ёсць «прахадная песня» з такімі словамі: «паехала каляда з канца ў канец». Значыцца, значэнне слова «каляда» — гэта трохдзённае святкаванне, пачынаючы з Раства 7 студзеня; затым агульнавядомая каляда — гэта пачастунак калядоўшчыкам, які складаецца са страваў з забітага кабана, пірагоў (хлеб з пшанічнай мукі), іншых дароў за спяванне і віншаванне са святам; а таксама цыкл святаў у гонар зімовага сонцавароту, які складаецца з Раства, Шчадраца і Вадохрышча. У пагашчан каляда — гэта таксама гурт, які ідзе з песням-калядкамі і прыносіць свята ў кожную хату».
А гэта значыць, што пасля вандроўкі будзе досыць часу праверыць атрыманая веды на практыцы: пакалядаваць, павіншаваць родных і сяброў.
Рэгіна Станіславаўна раскажа шмат цікавага пра Тураўшчыну, в. Пагост і гурт «Міжрэчча», не кажучы ўжо пра калядную традыцыю.
Забяспечыць начлегам ласкава прапанавалі ўдзельніцы гурта «Міжрэчча».
Вам спатрэбяцца грошы на праезд, наведванне музея і харчаванне (300-400 тысяч беларускіх рублёў, бо цана праезду ў адзін бок на маршрутцы —110 тысяч рублёў).
Арганізатары: РМГА «Студэнцкае этнаграфічнае таварыства». Грамадскі эксперт у традыцыйнай культуры Рэгіна Гамзовіч.
Заяўкі і пытанні чакаюць на нумар +375 25 9059589 (Настасся).
Каментары