27 lipienia ŭ Minsku na adnoj scenie ŭpieršyniu sustrenucca try pieramožcy konkursa «Zaśpiavaj.BY«: śpiavačka i kampazitar Lizavieta Leŭčyk, indzi-repier Juraś Kaścień (SP Kava), a taksama śpiavak i aŭtar piesień Vital Varanko.
Konkurs, jaki ładzili partał Tuzin.fm i dabračynny fond «Viartańnie» pry padtrymcy Tut.by, mieŭ na mecie pošuk cikavych maładych vykanaŭcaŭ (da 25 hod). Udzielnikam treba było napisać pieśniu na słovy sučasnaha biełaruskaha paeta. Šort-list abirała žury na čale z Aleham Chamienkam («Pałac»), pieramožcu – viadomy ukrainski hukarežysior i saŭndpradusar Uład Jarun («Okiean Jelzi», «Lapis Trubiacki»).
Hałoŭny pryz – zapis, źviadzieńnie i masterynh pieśni-pieramožcy z Uładam Jarunom – atrymaŭ 22-hadovy Vital Varanko. Zapis adbyŭsia ŭ červieni, zaraz davodzicca da ładu ŭ Kijevie. Łaŭreatami i uładalnikami kaštoŭnych pryzoŭ stali 18-hadovaja Liza Leŭčyk i 24-hadovy Juraś Kaścień (SP Kava) – cyrymonija ich ŭznaharodžańnia adbudziecca akkurat padčas kancerta.
27 lipienia kožny z hetaj trojcy adyhraje paŭhadzinny set. Vital Varanko razam z svaim bendam pradstavić pieśniu «Viartajsia» dy jašče niekalki biełaruskamoŭnych kampazicyj, stvoranych pad uražańniem ad pieramohi ŭ «Zaśpiavaj.BY». SP Kava razam z dudarom Viačkam Krasulinym prademanstruje svoj aryhinalny pohlad na biełaruski rep, siarod inšaha prahučyć i kampazicyja, jakaja skaryła žury konkursu – «Endšpil» na vierš Andreja Adamoviča.
Niešta asablivaje rychtuje da vystupa Lizavieta Leŭčyk, niekatoryja jaje pieśni prahučać u supravadžeńni admysłovaha hościa kancertu – hurta Tonqixod. Jaho lidar, paet i pierakładčyk Uładź Lankievič, byŭ u žury «Zaśpiavaj.BY» i asabista adznačyŭ tvorčaść hetaj śpiavački dy vykazaŭ žadańnie padtrymać jaje padčas takoha adkaznaha vystupu. Akrom taho Tonqixod prezientuje svoj novy sinhł i adyhraje svoj set z abranych tvoraŭ, jakija ŭvojduć u budučy albom. Vieści kancert budzie Aleh Chamienka.
27 lipienia (niadziela). 19.00. Kancert pieramožcaŭ «Zaśpiavaj.BY»: Lizavieta Leŭčyk, SP Kava, Vital Varanko. Pry ŭdziele hurtu Tonqixod. Bar «Mir kofie» (vuł.Jakuba Kołasa, 37). Telefon dla daviedak +375 29 6872093, +375 33 9037685.
Kamientary