U centry Hrodna zaŭvažyli lisu, jakaja pierabiahała darohu sa zdabyčaj u zubach. Videa z rudoj drapiežnicaj było źniata niepadalok ad parku imia Žylibiera, piša Newgrodno.by.
Na kadrach bačna, jak žyviolina ŭpeŭniena pierasiakaje ažyŭlenuju vulicu, nie źviartajučy ŭvahi na mašyny i ludziej. U paščy ŭ lisy była zdabyča, jakaja nahadvała dzikuju kačku. Aŭtar videa žartam prakamientavaŭ ubačanaje słovami: «Znoŭ niešta ŭkrała».
Žychary Hrodna ŭžo nie raz sustrakali lisic u miežach horada. Hetyja žyvioły daŭno asvoili nie tolki lesaparkavyja zony i ŭskrainy, ale i centralnyja rajony. Raniej na vulicy Kalinoŭskaha taksama nieadnarazova zaŭvažali lisu z kurami ŭ zubach. Nieviadoma tolki, była jana taja samaja ci roznyja.
Śpiecyjalisty nahadvajuć, što lisica zastajecca dzikaj žyviolinaj, navat kali vyhladaje spakojnaj i pryzvyčajenaj da ludziej. Jana moža być pieranosčycaj niebiaśpiečnych zachvorvańniaŭ, u tym liku šalenstva. Tamu pry sustrečy z takoj žyviolinaj nie varta sprabavać jaje karmić, hładzić abo nabližacca, kab nie spravakavać ahresiju ci napad.
Kamientary