20 kastryčnika— prezientacyja knihi pra 22 biełarusaŭ, jakija pieramahli rak

20 kastryčnika ŭ 19:00 u małoj zali k/ź Minsk adbudziecca prezentacyja knihi «Žyćcio paśla raku» i dabračynny kancert hurtoŭ NAVI, RECHA i RAHIS. Uvachod volny. Kniha vyjšła ŭ seryi «Biblijateka Svabody».

«Žyćcio paśla raku» — heta 22 historyi ankalahičnych pacyjentaŭ, jakija ŭśviadomili, što śmierć moža być blizka, ale ich žyćcio ŭ takoj sytuacyi nabyvaje inšy sens.

Pavał Maisiejeŭ, zahadčyk adździełu arhanizacyi supraćrakavaj baraćby Respublikanskaha centru ankalohii i medyčnaj radyjalohii, byŭ adnym ź pieršych, chto pračytaŭ hetyja historyi i napisaŭ paślasłoŭje da knihi: 

«Jašče dziesiać, navat piać hadoŭ tamu takoje prosta nielha było ŭjavić, kab ludzi ŭ našaj krainie publična, nie chavajučysia, raspa­viadali pra svaju chvarobu, pra «čumu 21 sta­hodździa — rak». 

U Biełarusi ludzi chavajuć, što jany majuć ankalahičnyja chvaroby i dyjahnaz rak usprymajecca mnohimi jak prysud. Metaj hetaha prajektu było źmianić hety stereatyp i raskazać pra ludziej, jakija pieramahli chvarobu i ličać, što hetaje vyprabavańnie źmianiła i ŭdaskanaliła ich žyćcio.

Pavał Maisiejeŭ adznačaje pazytyŭny efekt ad takich publikacyjaŭ: «Ludzi pačynajuć cikavicca prablemaj rakavych zachvorvańniaŭ, paznajuć niešta novaje dla siabie, kažučy medycynskaj movaj, pavyšajuć svaju «ankalahičnuju piśmien­naść». Tut absalutna darečny pryncyp: «Chto infarmavany — toj uzbrojeny!» 

Siarod hierojaŭ «Žyćcia paśla raku» — muzyka, bankir, kłoŭn, palityčny aktyvist, teatralny krytyk, nastaŭnica anhielskaj movy, śviatar, pensijaner… Heta ludzi roznych ŭzrostaŭ, intaresaŭ, pierakanańniaŭ, sacyjalnych statusaŭ.

Ideja prajektu «Žyćcio paśla raku» naležyć žurnalistcy radyjo «Svaboda» Hańnie Soŭś, jana ž i ŭkładalnica knihi. Pavodle jaje słovaŭ, u Biełarusi 95% ludziej chavajuć toje, što jany chvarejuć na rak: «U knizie sabranyja historyi 22 čałaviek. Hetyja ludzi padzialilisia receptam pieramohi nad rakam. I heta tolki pačatak. Bo takich ludziej u Biełarusi značna bolš».

20 kastryčnika adbudziecca ŭračystaja prezentacyja knihi z udziełam jaje aŭtaraŭ i hierojaŭ, a taksama biełaruskich muzykaŭ. Hetaja impreza raspačnie kampaniju «Pierakmožam», meta jakoj sabrać jak možna bolš pazytyŭnych prykładaŭ pieramohi nad hetaj chvarobaj.

Na mierapryjemstvie 20 kastryčnika vystupiać taksama biełaruskija hurty NAVI, RECHA i RAHIS. Uvachod volny.

Prezentacyja ŭ Kličavie: 

22 kastryčnika. 14:00. Centr sacyjalnaha absłuhoŭvańnia nasielnictva, (Savieckaja, 3v).

Prezentacyja ŭ Smarhoni: 

25 kastryčnika. 13:00. Kancertnaja zała Dziciačaj škoły mastactvaŭ (Kirava, 2).

• 1
• 0
• 0
• 0
• 0
• 0
• 0
• 0