Pamior duchoŭny lidar biełarusaŭ śvietu ajciec Alaksandr Nadsan

U Łondanie na 89-m hodzie žyćcia pamior duchoŭny lidar biełarusaŭ śvietu, unijacki śviatar ajciec Alaksandar Nadsan.

«Siońnia Boh zabraŭ da siabie našaha ajca Alaksandra. Heta zdaryłasia a 22.20 [15 krasavika] u špitali Barneta (Łondan), kudy jon byŭ uziaty na lačeńnie ŭ hety paniadziełak u vyniku raźvićcia chvaroby nyrak. Z vosieni minułaha hodu ajciec ciažka chvareŭ. Jamu było 88 hadoŭ. Viečnaja pamiać», — paviedamiŭ u svaim fejsbuku łondanski śviatar, pierajemnik ajca Alaksandra Siarhiej Stasievič.

Staršynia Rady BNR Ivonka Surviła ŭ intervju radyjo «Svaboda» zajaviła, što «śmierć ajca Nadsana — heta vialikaja strata dla nacyjanalnaha ruchu i dla Biełarusi. Hetaha śvietłaha čałavieka budzie brakavać usim, u kaho serca balić za našu Baćkaŭščynu».

Alaksandr Nadsan (proźvišča pry naradžeńni — Bočka) naradziŭsia 8 žniŭnia 1926 hoda ŭ miastečku Haradzieja (siońnia Niaśvižski r-n Minskaj vobł.). Jon byŭ hreka-katalickim śviatarom, apostalskim vizitataram dla biełarusaŭ-katalikoŭ u zamiežžy, a taksama navukoŭcam i hramadskim dziejačom.

Vučyŭsia ŭ Niaśvižskaj nastaŭnickaj sieminaryi. Vajavaŭ na baku sajuźnikaŭ: słužyŭ u 2-m Polskim korpusie ŭ Italii, dzie braŭ udzieł u bajavych dziejańniach i byŭ paranieny. U 1946 h. prybyŭ u Vialikabrytaniju. Adzin z zasnavalnikaŭ Zhurtavańnia biełarusaŭ Vialikaj Brytanii, redaktar jaho časopisaŭ «Biełarus na čužynie» i «Na šlachu». Byŭ adnym sa stvaralnikaŭ Biełaruskaha niezaležnickaha narodna-chryścijanskaha ruchu.

Skončyŭ matematyčny fakultet Łondanskaha ŭniviersiteta. Amierykancy prapanoŭvali jamu desantavacca ŭ Biełaruś i ŭziać udzieł u zbrojnaj baraćbie suprać savietaŭ. Jon, jak sam pryznavaŭsia, bačyŭ marnaść takoha šlachu. Natomiest uvosień 1953 hoda jon pajechaŭ vučycca ŭ Hreckuju kalehiju ŭ Rymie, kab słužyć svajmu narodu duchoŭna.

23 listapada 1958 h. atrymaŭ śviačeńni śviatara ŭschodniaha abradu. U lipieni 1959 h. viarnuŭsia ŭ Vialikabrytaniju. Pracavaŭ vykładčykam matematyki ŭ Notynhiemie i ažyćciaŭlaŭ dušpastyrskuju dziejnaść u Centralnaj i Paŭnočnaj Anhlii. Ad 1961 h. staŭ adnym z kiraŭnikoŭ biełaruskaj škoły imia Kiryły Turaŭskaha ŭ Łondanie.

Ad 1971 h. kiravaŭ Biełaruskaj biblijatekaj-muziejem imia F. Skaryny. Aktyŭna ŭdzielničaŭ u pracy ZBVB, Charytatyŭnaj siekcyi, Anhła-biełaruskaha tavarystva. U 1981 h. staŭ na čale Biełaruskaj katalickaj misii ŭ Vialikabrytanii. 30 červienia 1986 h. byŭ pryznačany na pasadu apostalskaha vizitatara dla biełarusaŭ-katalikoŭ u zamiežžy. Stvaralnik i kiraŭnik Kamiteta dapamohi achviaram Čarnobyla.

Jon vykanaŭ šmatlikija pierakłady liturhičnych tekstaŭ na biełaruskuju movu, byŭ hłybokim daśledčykam historyi biełaruskaj carkvy i kultury. Hanarovy doktar Jeŭrapiejskaha humanitarnaha ŭniviersiteta.

A. Alaksandr Nadsan: Boh zachacieŭ, kab my stali biełarusami

Ajciec Alaksandr Nadsan: Fotaalbom

• 0
• 0
• 0
• 0
• 0
• 0
• 0
• 0