Ci spyniać ułady Rečycy dziejnaść vajskova-patryjatyčnaha kłuba «Rusič», kiraŭniki jakoha źmiaščajuć fota z nacysckim ziham?
U redakcyju «Našaj Nivy» pryjšoŭ list ad žychara Rečycy, jaki paviedamiŭ, što niadaŭna miascovyja ŭłady zarehistravali strajkbolny kłub «Rusič», kiraŭnik jakoha, Dźmitryj Marozaŭ, maŭlaŭ, nie chavaje svajoj prychilnaści da idej h.zv. «ruskaha śvietu» i navat pravodzić niejkija vajenna-patryjatyčnyja sieminary z rečyckimi školnikami.
Ci tak usio heta?
Sa staronki Marozava «UKantakcie» vynikaje, što toj sapraŭdy zachaplajecca dziejańniami bajavikoŭ tak zvanaj «Navarosii» i navat pryznajecca, što jahony brat vajuje dzieści na Danbasie.
Bolšaść publikacyj na jahonaj «ścianie» vykazvajuć padtrymku bajevikoŭ i źniesłaŭlajuć ukraincaŭ, a siarod padpisak — biełarusafobskija i rusafilskija supołki.
Taksama kiraŭnik strajkbolnaha kłubu «Rusič» nie curajecca vykładać u internet svaje fatazdymki, dzie jon trymaje pravuju ruku ŭ viadomym vitańni «Chajl Hitler».
A što ž jahonyja adnakłubniki?
Voś skrynšot sa staronki adnaho ź ich — tut ničoha i nie dadasi.
Voś jašče adzin. Chłopiec słužyć u adnym ź siłavych viedamstvaŭ. Vielmi małady, tamu my zamazali jahony tvar. Na hetym fota jon taksama pakazvaje «Chajl Hitler» u trochi «zavualavanaj» formie.
Na kicielach hetych hulcoŭ u strajkboł — šaŭrony rasijskich motastrałkovych vojskaŭ.
A voś užo fota z 10-j Rečyckaj škoły, dzie Marozaŭ pravodzić «vajenna-patryjatyčny» zaniatak ź dziećmi. Pra hetaje supracoŭnictva navat napisała miascovaja rajonka. Viadoma, stanoŭča.
Ale jak taki kłub, z takim kamandziram, moh atrymać aficyjnuju dziaržaŭnuju rehistracyju? Toj ža «Małady front» kolki hadoŭ nie rehistrujuć, a tut — ličy adrazu. Ci čynoŭniki ličać, što «zihavać» — heta prajava patryjatyzmu?
Z hetym pytańniem my datelefanavalisia ŭ adździeł sportu i turyzmu Rečyckaha rajvykankama.
Tam «Našaj Nivie» adkazaŭ namieśnik kiraŭnika adździeła Alaksandr Horbač.
«U dadzieny momant my adsočvajem kłub, viadziecca peŭnaja rabota i ŭsio heta budzie spyniena. Ideja patryjatyčnaha vychavańnia nie ŭ hetym», — pačuŭšy pytańnie, adkazaŭ Alaksandr.
Čynoŭnik skazaŭ, što nie siońnia pra heta zadumaŭsia, bo ŭžo niekatory čas adsočvaje staronku hetaha kłuba ŭ internecie.
«U takich pytańniach treba pracavać na apiaredžvańnie, my hetym zaraz zajmajemsia», — dvojčy zapeŭniŭ Alaksandr.
Ciapier čytajuć
Što ciapier ź italjanskimi vizami? Masavyja admovy? Turfirmy nazyvajuć alternatyvu1
Što ciapier ź italjanskimi vizami? Masavyja admovy? Turfirmy nazyvajuć alternatyvu
«Kali b ja byŭ śledčym KDB, ja b padkreśliŭ toje samaje». Fiaduta — pra schavanyja sensy «Kałasoŭ pad siarpom tvaim», uvahu siłavikoŭ da svajho rukapisu i zahadku z treciaj častkaj ramana Karatkieviča1212
Kamientary