Biełaruski bajanist prymusiŭ śmiajacca brytanskaje šou talentaŭ VIDEA

Muzykant trapiŭ u kamičnuju situacyju, jakaja litaralna pastaviła na vušy hledačoŭ šou i padzialiła dumki členaŭ žury, piša tut.by.

Vital vyjšaŭ na scenu ŭ žoŭtym harnitury supiermena i, praihnaravaŭšy šmatlikija pytańni členaŭ žury, biez pradstaŭleńnia, pačaŭ svoj vystup. Składałasia ŭražańnie, što ŭ muzykanta byli składanaści z hukam na scenie i jon nie čuŭ pytańni, jakija vykrykvali jamu brytanskija sudździ.

Kamičnaja situacyja vyklikała buru avacyj padtrymki biełaruskaha supiermena z bajanam maładziečanskaj firmy «Zonta». Dvoje členaŭ žury nie stali čakać kanca vystupu i nacisnuli čyrvonyja knopki.

Paśla vykanańnia pieršaj kampazicyi Vital pačaŭ raskazvać pra siabie i prapanavaŭ vykanać jašče adnu pieśniu. Brytanski televiadučy Sajman Koŭeł adkazaŭ admovaj, ale Varonka abviaściŭ: «Majkł Džeksan!» Zała znoŭ vybuchnuła avacyjami.

— Nie rabicie hetaha znoŭ! — paśla vykanańnia biełarusam chita They Do not Care About Us paprasiŭ jaho kamiedyjny akcior Devid Uiljams.

— Ja kachaju vas! — pryznałasia Vitalu inšy člen žury, brytanskaja aktrysa Amanda Chołden.

U kančatkovym vyniku troje z čaćviarych sudździaŭ prapuścili Vitala dalej. Biełarusa zała pravodziła apładysmientami.

Partał Intex-press pahavaryŭ ź Vitalom pra vystup.

Pa słovach Vitala, pierad vystupam u jaho nie było saŭnd-čeka, to bok nastrojki instrumienta i inšaj aparatury. Tamu jamu daviałosia nastrojvacca adrazu na scenie.

— Kali ja vyjšaŭ na scenu, čuŭ tolki cišyniu: u mianie nie było huku. Tam vielmi vialikaja zała. I atrymałasia tak, što členy žury niešta kazali, a ja ničoha nie čuŭ, — raspavioŭ Vital Varanko.

Pavodle jaho słoŭ, nie razhubicca jamu dapamoh dośvied papiarednich konkursaŭ.

Bajanist miarkuje, što takaja situacyja z hukam vyjšła nie vypadkova.

— Mnie zdajecca, što ŭ arhanizataraŭ byŭ niejki płan. Im udałosia mianie pierachitryć i zrabić tak, kab moj vystup vyhladaŭ žyva i naturalna, — vykazaŭ mierkavańnie muzykant.

Niahledziačy na toje, što nie ŭsio pajšło hładka, jon zadavoleny svaim vystupam. Hałoŭnyja zadačy vykanany: jon raźviesialiŭ ludziej i prajšoŭ u paŭfinał.

— Čałaviek-bajan — heta čałaviek, jaki ratuje ludziej ad drennaha nastroju, — skazaŭ Vital Varanko pra svoj sceničny vobraz. - Ja pryjechaŭ ratavać śviet ad drennaha nastroju. Na šoŭ atrymałasia vyratavać usich, akramia Sajmana.

Bajanist raspavioŭ, što jon ciapier u Biełarusi, pryjechaŭ siudy na zapis televizijnaha šou «Dźvie zorki». Paśla hetaha znoŭ pajedzie ŭ Łondan, dzie projdzie zapis paŭfinału.

Muzykant pryznaŭsia, što raźličvaje na pieramohu ŭ hetym šoŭ.

— Ja napisaŭ adzin suśvietny chit I will be happy, jaki chacieŭ by vydać na suśvietna viadomym łejble. Jak u paŭfinalista šou, u mianie ŭžo jość takaja mahčymaść, — raspavioŭ Vital Varanko.

• 0
• 0
• 0
• 0
• 0
• 0
• 0
• 0