Kamisija pa baraćbie ź iłženavukaj i falsifikacyjaj navukovych daśledavańniaŭ pry prezidyumie Rasijskaj akademii navuk pryznała hamieapatyju — lačeńnie zvyšmałymi dozami lekavych srodkaŭ — antynavukovym, a hamieapatyčnyja preparaty — niebiaśpiečnymi dla zdaroŭja. Navukoŭcy rekamiendujuć Ministerstvu achovy zdaroŭja Rasii i daktaram admovicca ad lačeńnia takimi srodkami i rabić na ŭpakoŭkach śpiecyjalnuju markiroŭku ab ich nieefiektyŭnaści. Pra heta havorycca ŭ miemarandumie «Ab łženavukovaj hamieapatyi», piša Dožd́.
Praanalizavaŭšy publikacyi ŭ navukovych vydańniach i spravazdačy ab kliničnych daśledavańniach, kamisija pryjšła ŭ vysnovy, što pryncypy hamieapatyi supiarečać viadomym zakonam pryrody, a dokazy jaje efiektyŭnaści adsutničajuć.
Akramia taho, jak śćviardžajuć ekśpierty, hamieapatyja niebiaśpiečnaja dla zdaroŭja, bo chvoryja traciać značnyja srodki na niadziejnyja preparaty i hrebujuć srodkami lačeńnia z paćvierdžanaj efiektyŭnaściu. «Heta moža pryvodzić da niespryjalnych vynikaŭ, u tym liku da śmierci pacyjentaŭ», - havorycca ŭ miemarandumie.
Aŭtary dakłada taksama sfarmulavali rekamiendacyi Ministerstvu achovy zdaroŭja, Fiederalnaj słužby pa nahladzie ŭ śfiery achovy zdaroŭja, a taksama daktaram, ŚMI i patencyjnym pacyjentam hamieapataŭ.
U pryvatnaści, śpiecyjalisty rekamiendujuć Ministerstvu achovy zdaroŭja Rasii vyvieści hamieapatyčnyja preparaty ź miedycynskaha ŭžyvańnia ŭ balnicach, a taksama markiravać ŭpakoŭki takich preparataŭ ukazańniem ab ich niedakazanaj efiektyŭnaści.
Ad Savieta Jeŭrazijskaj ekanamičnaj kamisii navukoŭcy taksama zapatrabavali ŭvieści abaviazkovuju markiroŭku hamieapatyčnych preparataŭ, jakaja pakazvaje na adsutnaść pakazańniaŭ da ŭžyvańnia. Daktaram, u svaju čarhu, rekamiendavana infarmavać pacyjentaŭ ab nieefiektyŭnaści i łženavukovaj hamieapatyi i admovicca ad pryznačeńnia hamieapatyčnych preparataŭ dla dasiahnieńnia efiektu płaceba.
«U SSSR hamieapatyja nie zabaraniałasia, ale była abmiežavanaja, jak nienavukovaja praktyka. U 90-ja hady hamieapatyja zmahła šyroka ŭkaranicca ŭ sistemu rasijskaj achovy zdaroŭja. Na siońniašni dzień zamiežnyja i rasijskija vytvorcy hamieapatyi, karystajučysia niedaśviedčanaściu nasielnictva, viaduć ŭsio bolš ahresiŭnuju palityku prasoŭvańnia homieapatyčnaj pradukcyi», - kaža pra pryčyny źjaŭleńnia miemaranduma doktar miedycynskich navuk, prafiesar VŠE Vasil Ułasaŭ.
Ekśpiertnaje zaklučeńnie padpisali 32 śpiecyjalisty ŭ halinie dokaznaj, ekśpierymientalnaj i kliničnaj miedycyny, fiziki, chimii, bijachimii, imunałohii, psichałohii, malekularnaj bijałohii, farmakałohii, bijatechnałohii, farmacyi i bijastatystyki.
Hamieapatyja — alternatyŭnaja miedycynskaja praktyka, zasnavanaja na ŭžyvańni zvyšmałych doz tych rečyvaŭ, jakija ŭ vialikich dozach vyklikajuć u zdarovaha čałavieka simptomy chvaroby, ź jakoj jany pavinny zmahacca. Siarod hamieapatyčnych srodkaŭ u dadatku da miemaranduma pieraličanyja «Acyłakokcynum», «Anafieron», «Impaza», «Prapraten-100».
Kamientary