Na volu vyjšła vialikaja hrupa źniavolenych pa «Spravie patryjotaŭ»
Aryštavanyja pa spravie patryjotaŭ praciahvajuć vychodzić na volu.
U pryvatnaści, vyzvalenyja Uładzimir Rumiancaŭ, Cimur Paškievič, Aleś Jaŭdacha, Viktar Daniłaŭ.
Usie vyzvalenyja kažuć, što ŭmovy ŭtrymańnia byli narmalnymi, pieradaje karespandent «NN», jaki sustrakaje patryjotaŭ kala śledčaha izalatara. Usie jany ŭpeŭnienyja ŭ sabie i poŭnyja aptymizmu.
«Vierbavać mianie nie sprabavali. Navat praz sukamiernikaŭ ničoha padobnaha nie adbyvałasia, — kaža karespandentu «NN» Uładzimir Rumiancaŭ.
— Viadoma, adčuvaŭ absurdnaść svajho źniavoleńnia. U abaviazkach mianie jak vajskoŭca, udaskanalvać svaju vyvučku i bajavoje majsterstva, a, hruba kažučy, mianie ledź nie pasadzili za heta.
U SIZA ni z kim nie pierasiakaŭsia. Usia sutnaść izalatara zaklučajecca ŭ tym, kab nichto ni z kim nie bačyŭsia. U kamiery treniravaŭsia, padtrymlivaŭ formu: adciskaŭsia, pres kačaŭ. Na prahułku vadzili raz u dzień na hadzinu.
Pra spravu pakul ničoha kazać nie mahu. Sa mnoj siadzieli roznyja ludzi: za machlarstva, alimienty».
«Utrymańnie było bolš-mienš, — kaža Aleś Jaŭdacha. — Na Vaładarskaha ŭmovy ŭtrymańnia byli lepšymi. Lepšaje staŭleńnie, bolš miesca. Kali nie ličyć katavańniami formu zatrymańnia, to nijakich katavańniaŭ nie było.
Ludziam, što byli sa mnoj, było lepš bačna, jak mianie zatrymlivali. Ja atrymaŭ u pysu — i byŭ zakinuty ŭ busik. Što tyčycca zdaroŭja, to ja vydatna siabie adčuvaju, udavałasia padtrymlivać formu.
Ja telek nie hladžu, na zajavy adnaho dziejača ŭvahi nie źviartaju, tamu ja ŭvohule nie byŭ u kursie situacyi pra niejkich bajevikoŭ. U mianie navat nie paśpieła praślizhnuć nivodnaja dumka, mnie adrazu ŭsio raskazali chłopcy, što zatrymlivali: «Tabie što, kiepska žyć u hetaj krainie?»
Učora ŭ kalidorach bačyŭ niekaha z chłopcaŭ, ja tak razumieju, što nas pieraviali ŭ režym «łajt». Raniej u kalidorach z «padzielnikami» nie pierasiakalisia. U mianie było adzin ci dva dopyty. Ja spačatku daŭ pakazańni pa «biesparadkach», potym mnie prychodzili abvieścić druhoje abvinavačańnie, ja admoviŭsia davać pakazańni. 2,5 miesiacy ja siadzieŭ biez usiaho, a kali spravu pieradali ŭ Śledčy kamitet, to ja minimalna pahutaryŭ z novaj śledčaj.
Haziety, listy atrymlivaŭ. Uzrovień cenzury mnie nieviadomy. Na žal, haziety, na jakija mianie padpisali, ihnaravali čempijanat Biełarusi pa futbole, tamu nie viedaŭ, jak tam idzie minskaje «Dynama».
Atrymlivajecca, što taki trochmiesiačny adpačynak na pracy. Budziem hladzieć, u jakim tam stanie što ciapier».
Siabry i svajaki inšych źniavolenych taksama čakajuć vyzvaleńnia svaich blizkich.
Pavodle papiaredniaj infarmacyi, siońnia musiać vyjści piać čałaviek.
Nahadajem, učora byli vyzvalenyja Uładzimir Fiodaraŭ, Alaksandr Zimnicki, Siarhiej Strybulski.
Uładzimir Fiodaraŭ, fota Siarhieja Hudzilina
«Na voli kruta, — kaža Uładzimir Fiodaraŭ. — Ja ŭčora rychtavaŭsia da dziažurstva, vynosić viadro. I tut mianie vyklikajuć: niaŭžo dopyt, niaŭžo advakat u taki poźni čas?
Ja ničoha nie dumaju pra abvinavačańnie. Ja pad padpiskaj, ničoha dumać nie chaču i kamientavać nie budu. Hetyja pytańni vyśvietlacca na sudzie.
Staŭleńnie narmalnaje, nijakaha złoŭžyvańnia da siabie nie zaŭvažaŭ. U niejkich momantach było navat zyčlivym. Dopytaŭ było nie adzin-dva, a bolej.
Zdaroŭje vydatnaje. U «amierykancy» nas advodzili na 1,5 hadziny na špacyr. Heta bolej, čym sabie moh dazvolić da aryštu, kali 10—11 hadzin pravodziŭ za ofisnaj pracaj. Što budzie z pracaj, pakul nie viedaju, ale pavinna ŭsio być narmalna».
***
Vyzvalenyja zastajucca pad padpiskaj pra niavyjezd i ŭ statusie padazravanych.
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary