Alaksandr Fiaduta atrymaŭ doktarskuju stupień u Jahiełonskim univiersitecie
Pra heta litaraturaznaŭca paviedamiŭ u Fejsbuku.
«30 červienia vučonaja rada fiłałahičnaha fakulteta Jahiełonskaha univiersiteta prysudziła mnie stupień doktara habilitavanaha humanitarnych navuk u śpiecyjalizacyi «litaraturaznaŭstva». Dziakuj usim za padtrymku!
Śvietłaja pamiać majoj mamie, Valancinie Iosifaŭnie Fiaduta, i navukovamu kiraŭniku majoj dypłomnaj pracy, Iharu Viačasłavaviču Jahoravu, jakija nie dažyli da hetaha dnia.
Dziakuj majoj žoncy Maryna Šybko, bieź jakoj hetaja abarona była b niemahčymaja…» — napisaŭ jon.
Alaksandr Fiaduta patłumačyŭ NN, što ŭ Polščy trochi adroznaja ad biełaruskaj sistema atrymańnia doktarskaha zvańnia. Śpiecyjalnuju dysiertacyju dla jaje pisać nie treba: stupień doktara habilitavanaha dajecca pa vyniku ŭsioj navukovaj dziejnaści kandydata na padstavie apošniaj jaho manahrafii. Apošniaja manahrafija Alaksandra Fiaduty była pryśviečanaja prablemie čytača ŭ litaratury puškinskaj epochi.
Alaksandr Fiaduta — litaraturaznaŭca i palitołah. Naradziŭsia ŭ Hrodnie. U 1994-m byŭ u składzie pieršaj kamandy Łukašenki, pracavaŭ u Administracyi prezidenta, adkul zvolniŭsia ŭ znak pratestu paśla źjaŭleńnia prajavaŭ cenzury ŭ presie. Byŭ žurnalistam, aŭtar palityčnaj bijahrafii Łukašenki. U 2010-m pracavaŭ u pieradvybarnym štabie kandydata ŭ prezidenty Uładzimira Niaklajeva. Paśla brutalnaha razhonu Płoščy adbyŭ niekalki miesiacaŭ u SIZA KDB, pryznany viaźniem sumleńnia. Jaho litaraturaznaŭčaja zacikaŭlenaść — rasijskaja litaratura XIX stahodździa.
Kamientary