2 łistapada ŭ KZ «Minsk» adbudziecca jubilejny kancert Źmitra Vajciuškieviča «25 hod na scenie» z udziełam hurta WZ-Orkiestra i zaprošanych haściej. Napiaredadni vystupu Vajciuškievič raspavioŭ, jak z padziemnaha pierachodu patrapiŭ u hurt «Pałac».
Źmicier Vajciuškievič naradziŭsia ŭ pasiołku Biarozaŭka Lidskaha rajona, znakamitaha praz škłozavod «Nioman». Ź dziacinstva śpiavaŭ, u školnyja hady pačaŭ zajmacca na kłarnecie. U 1990 hodzie skončyŭ Lidskuju muzyčnuju vučelniu i pastupiŭ va Univiersitet kultury.
— Pieršyja dva hady ŭ Minsku ja prosta vučyŭsia i hadzinami zajmaŭsia na kłarnecie — mnie heta vielmi padabałasia, — raspaviadaje Vajciuškievič. — Usio źmianiŭ 1992 hod. Ja hraŭ na kłarnecie ŭ pierachodzie na płoščy Pieramohi, kali nieznajomaja dziaŭčyna zaprasiła mianie na zborny kancert «Mroi», «Novaha nieba» dy «Ulisa» ŭ Pałacy kultury čyhunačnikaŭ — najlepšych biełaruskich rok-hurtoŭ taho času. Tam ja zrazumieŭ dźvie rečy. Pieršaje — ja zakachaŭsia ŭ biełaruskuju pieśniu. Druhoje — treba varušycca, kali chaču patrapić na scenu.
Źmicier padaŭ zajaŭku na pieršy Konkurs nacyjanalnaj pieśni i paezii, jaki rabiła Biełaruskaje telebačańnie. Tam Vajciuškievič vykanaŭ pieśniu «Spatkańnie» na vieršy Alaksandra Lahčyłava z repiertuaru ansambla «Siabry» — heta było pieršaje źjaŭleńnie Vajciuškieviča na teleekranach. Ale aŭtarytetnaje žury ŭ druhi tur maładoha śpievaka nie prapuściła, paličyła «syrym».
— Uvosień 1992 adnakurśnik raspavioŭ mnie pra prasłuchoŭvańnie ŭ hurt «Pałac», jaki tady zvaŭsia «Dvoriec kukuruznych pałočiek». Jany rychtavali dźvie prahramy: biełaruskich narodnych piesień i džazava-estradnuju na temu savieckich časoŭ. U pieršaj vydatna śpiavaŭ Aleh Chamienka, a mianie ŭziali na druhuju, śpiavać Uciosava, — tłumačyć Źmicier Vajciuškievič. — Ale raptam streliła mienavita pieršaja, tamu hurt pieranazvali ŭ «Pałac» i naš džaz nichto nie pačuŭ. Ja zastaŭsia na bek-vakale i duchavych. Moj karonny nomier byŭ, kali ja vychodziŭ čytać rep na anhlijskaj u pieśni «Rusałki». Zaraz vyhladaje śmiešna, a tady heta było nievierahodna kruta!
Z taho času źmianiłasia šmat: Źmicier syjšoŭ z hurta «Pałac», prajšoŭ praz Kriwi, zapisaŭ šmat solnych albomaŭ. Ale hałoŭnaje zastałosia niaźmiennym — luboŭ Vajciuškieviča da biełaruskaj pieśni.
Źmicier Vajciuškievič «25 hadoŭ na scenie»
2 listapada — KZ «Minsk» — 19:00
Kvitki: ad 20 da 28 rubloŭ
Prodaž: kasy i sajt Kvitki.by, kasa KZ «Minsk»
Infalinija: (033) 661 14 32
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary