Chto toj adziny biełarus, jakoha ŭklučyli ŭ kamisiju pa padrychtoŭcy źmien u rasijskuju kanstytucyju?

Prezident Rasii Uładzimir Pucin stvaryŭ hrupu z 75 čałaviek, jakaja buduć zajmacca raspracoŭkaj źmien u kanstytucyju. Heta struktura čysta simvaličnaja, u jaje ŭvajšli, da prykładu, pijanist Macujeŭ i lohkaatletka Isinbajeva, dy inšyja daloka nie śpiecyjalisty ŭ kanstytucyjnym pravie. Zadača hrupy — lehitymizavać źmieny, jakija paklikanyja stvaryć jurydyčnuju asnovu dla zachavańnia ŭłady ŭ rukach Pucina i jaho koła paśla 2024 hoda. Źmieny majuć być pryniatyja na refierendumie ŭžo viasnoju.

U hrupu 75-ci ŭklučany i adzin biełarus. Chto jon?

Heta Siarhiej Kandybovič — narodžany ŭ Minsku adstaŭny rasijski pałkoŭnik, vajskovy psichołah, staršynia prydziaržaŭnaj «parasonavaj» arhanizacyi biełaruskaj dyjaspary ŭ Rasii pad hruvastkaj nazvaj «Fiederalnaja nacyjanalna-kulturnaja aŭtanomija «Biełarusy Rasii», člen Rady pa mižnacyjanalnych znosinach pry Prezidencie RF.

Aŭtanomija «Biełarusy Rasii» — heta nie niaŭradavaja arhanizacyja ŭ zvyčajnym sensie, heta, chutčej, stvoranaja pry dziaržavie kuratarskaja struktura. Takija ž jość dla inšych dyjasparaŭ na terytoryi Rasii.

Asnoŭnaja tematyka dziejnaści biełaruskaj FNKA — farmalnaje pradstaŭleńnie biełarusaŭ u publičnym rasijskim žyćci, pryčym u duchu rasijska-savieckaha patryjatyzmu. «Vialikaja ajčynnaja vajna», «vyzvaleńnie Biełarusii», be-es-es-eraŭski psieŭda-fołk pad sintezatar, Krym, tavaryš Mašeraŭ. Ani kursaŭ biełaruskaj movy, ani dziciačych škołak, kab vychoŭvać u novym pakaleńni biełaruskuju nacyjanalnuju śviadomaść — ničoha hetaha pad ehidaj FNKA ŭ Rasii niama.

Razam z Kandybovičam u skład pracoŭnaj hrupy ŭklučany staršynia anałahičnaj struktury dla rasijskich ukraincaŭ, Bahdan Biaspalka. Hety čałaviek — našmat bolš publičny. Jon časty hość sumnaviadomych prapahandysckich tok-šou na rasijskaj dziaržaŭnaj televizii, viadomy złobnymi antyŭkrainskimi i antybiełaruskimi zajavami, publičnym admaŭleńniem prava biełarusaŭ i ŭkraincaŭ na samastojnaść. Staŭ Biaspalka taki nie adrazu — jašče hadoŭ piatnaccać tamu jon jak kiraŭnik ukrainskaj biblijateki ŭ Maskvie davaŭ pamiaškańnie pad mierapryjemstvy biełaruskaj «bieł-čyrvona-biełaj» supołki. Ale źmianiajecca čas — źmianiajucca ludzi.

Pavialičyć

U adroźnieńnie ad Biaspalki, Siarhiej Kandybovič, biezumoŭna, da ahresiŭnych rasijskich nacyjanalistaŭ nie naležyć. Jon udzielnik Źjezdaŭ biełarusaŭ śvietu, siabar Vialikaj rady ZBS «Baćkaŭščyna» i kansultatyŭnaj rady pa spravach dyjaspary pry MZS Biełarusi. Jon udała vykonvaje rolu publičnaha dypłamata pamiž aficyjnym Mienskam i aficyjnaj Maskvoj.

Ale značeńnie ŭ ciapierašniaj situacyi majuć nie asoby Kandyboviča i Biaspalki. Rolu hraje sam fakt uklučeńnia simvaličnaha statusnaha biełarusa i simvaličnaha statusnaha ŭkrainca ŭ skład kamisii, jakaja budzie pisać novuju rasijskuju Kanstytucyju.

Kandybovič i Biaspalka — adzinyja ludzi, jakija ŭklučanyja tudy padkreślena jak pradstaŭniki dyjasparnych arhanizacyj. Inšych pradstaŭnikoŭ struktur dyjaspar ci, skažam, relihijnych mienšaściaŭ siarod udzielnikaŭ rabočaj hrupy niama. Niama navat aficyjnych pradstaŭnikoŭ kadyraŭskaj Čačni, choć jość pradstaŭniki ŭradaŭ Tatarstana i Dahiestana.

I sihnał hetym dasyłajecca vielmi niedvuchsensoŭny: biełarusy i ŭkraincy robiacca pa-svojmu ekskluziŭna zaprošanymi na hetuju «radu «, a rasijskaja Kanstytucyja robicca byccam by Kanstytucyjaj i dla biełarusaŭ z ukraincami.

Z ulikam taho, chto jašče ŭvajšoŭ u pracoŭnuju hrupu — ad teleprapahandystaŭ i kazačych atamanaŭ da piśmieńnika Prylepina — nielha vyklučać taho, što ŭ novaj Kanstytucyi mohuć źjavicca pastułaty pra «rasijskuju kulturnuju i cyvilizacyjnuju prastoru», «histaryčnuju Ruś» ci jakijaś inšyja namioki na pierśpiektyvy rasiejskaj terytaryjalnaj ekspansii.

Tamu biełarusam rana rassłablacca ad navinaŭ pra toje, što Pucin źbirajecca praciahvać svoj prezidencki termin nie z dapamohaj «Sajuznaj dziaržavy». Sutnaść rasijskaha režymu nie pamianiałasia.

• 0
• 0
• 0
• 0
• 0
• 0
• 0
• 0