6 sakavika Minski abłasny sud ahučyŭ prysud traim viaskoŭcam z-pad Słucka, jakich vinavacili ŭ zabojstvach i rabaŭnictvie piensijanieraŭ. Adnaho sa złačyncaŭ prysudzili da rasstrełu.
33-hadovaha Valancina Bušnina, 25-hadovaha Vitala Miacieža i 29-hadovaha Viktara Skrundzika zatrymali hod tamu, u lutym 2019 hoda.
Za niekalki miesiacaŭ da hetaha Viktar Skrundzik vyjšaŭ na volu paśla čarhovaj adsidki. Trochi pabadziaŭšysia pa svajakach, jon pačaŭ rabavać piensijanieraŭ. A ŭ paplečniki braŭ bojfrendaŭ svaich siaścior: Vital Miaciež — sužyciel rodnaj siastry Skrundzika, Valancin Bušnin — sužyciel stryječnaj siastry.
Skrundzik zabiŭ dvaich piensijanieraŭ — adnaho ŭ vioscy Uljanaŭka, druhoha ŭ susiednich Suchoŭčycach. Paśla jon napaŭ jašče na adnu piensijanierku ŭ Suchoŭčycach, ale jana vyžyła.
Mienavita praź jaje pakazańni stała viadoma pra zabojstva 79-hadovaha Michaiła Šuhaleja ŭ Suchoŭčycach. Raniej śledčyja ličyli, što dzied zhareŭ praz prablemy z hrubkaj, ale vyśvietliłasia, što heta Skrundzik padpaliŭ jaho dom. Pra heta ahavaryŭsia sam Skrundzik: padčas źbićcia piensijanierki jon skazaŭ: «Addavaj hrošy, ci budzie tabie toje ž, što i Šuhaleju!»
Na sudzie prakuror paprasiŭ rasstralać Viktara Skrundzika, Vitala Miacieža adpravić na 22 hady ŭ kałoniju ŭzmocnienaha režymu, a Valancina Bušnina — pasadzić na 18 hadoŭ. Taki vyrak sud i vynies. Ciapier na adnaho śmiarotnika ŭ krainie stała bolš.
«Vicia napisaŭ list, u jakim paviedamiŭ, što zaprasiŭ prakuror. Prasiŭ prabačeńnia ŭ mianie i vinšavaŭ z 8 sakavika, — raskazała «Našaj Nivie» Nadzieja, rodnaja siastra Viktara Skrundzika i sužycielka Vitala Miacieža.
— Ja b ich traich rasstralała, kab kryŭdna nie było nikomu. Muža nie škada — nie ja ž jaho tudy adpraŭlała.
Na apošnim pasiadžeńni ja nie była, uvohule ŭ sudzie była tolki adzin raz, kali mianie vyklikali śviedkaj. A paśla nie jeździła: mnie dziaciej treba hladzieć, dyj doraha na sud i nazad dabiracca, a hrošaj niama».
Čytajcie:
«Vicia skazaŭ, što na im vosiem trupaŭ». Traim žycharam Słuččyny pahražaje rasstreł
«Paśla hetych zabojstvaŭ usich starych, chto adzin žyŭ, dzieci pazabirali. Strašna»
Ciapier čytajuć
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ77
Kamientary