Kamunist Kliševič: Asnoŭnaja sacyjalnaja padtrymka va ŭmovach karanavirusa — mahčymaść praciahvać pracavać
Takoje mierkavańnie karespandentu BIEŁTA vykazaŭ člen Pastajannaj kamisii Pałaty pradstaŭnikoŭ pa adukacyi, kultury i navucy Siarhiej Kliševič.
«Siońnia asnoŭnaja forma sacyjalnaj padtrymki — heta mahčymaść praciahvać pracu, a taksama zachavańnie pracoŭnych kalektyvaŭ na pradpryjemstvach, u tym liku horadaŭtvaralnych, — adznačyŭ Siarhiej Kliševič. — Dla paraŭnańnia, karancin u bolšaści krain JEZ nie ŭklučaŭ jakich-niebudź vypłat fizičnym asobam, a taksama adterminoŭki kamunalnych płaciažoŭ i arendy. Biełaruś jak sacyjalna aryjentavanaja dziaržava nie mahła pajści anałahičnym šlacham, apłačvajučy karancin za košt asabistych srodkaŭ svaich hramadzian. Taksama chaciełasia b źviarnuć uvahu, što tyja srodki, jakija vyłučaje Jeŭrakamisija, nakiravanyja ŭ pieršuju čarhu na padtrymku kankretnych halin ekanomiki i, u pieršuju čarhu, pramysłovaści i transpartu. Heta śviedčyć pra toje, što kankurentnaja baraćba nikudy nie źnikła i budzie abvastracca pa miery vychadu krain z karancinu».
Parłamientaryj padkreśliŭ, što ŭ Biełarusi niama nieabchodnaści ŭviadzieńnia karancinu. «U krainie miery strohaha karancinu nie ŭvodzilisia ŭ pieršuju čarhu dziela pramysłovaści, pakolki spynieńnie realnaha siektara macniej za ŭsio adbiłasia b na sacyjalnaj situacyi, — skazaŭ jon. — Akramia taho, praciahłaja sacyjalnaja depryvacyja ŭ žorstkich formach razam sa źniešnim infarmacyjnym ciskam pryvodziać da šerahu niepažadanych nastupstvaŭ: depresij, asacyjalnych pavodzinaŭ. Usio heta možna adnieści da «zasłuh» karonapsichozu, pra jaki nieadnarazova kazaŭ prezident», — patłumačyŭ jon.
Siarhiej Kliševič dadaŭ, što siońnia možna efiektyŭna vykonvać miery sacyjalnaj izalacyi i dystancyjavańnia, nie spyniajučy pry hetym vytvorčy praces.
«Da prykładu, padčas naviedvańnia palihrafičnaha kambinata imia Jakuba Kołasa ŭ Minsku ja adznačyŭ vysoki ŭzrovień mier biaśpieki na roznych vytvorčych učastkach. Faktyčna pradpryjemstva zakrytaje dla starońnich, a źniešnija kantakty supracoŭnikaŭ minimizavanyja. Heta dazvalaje paźbiehnuć zaražeńnia pa vytvorčym pryncypie, — raspavioŭ jon. — Adnak u volny čas nieabchodna abmiežavacca maršrutam «praca — dom» i paźbiahać niepatrebnych kantaktaŭ. Biezumoŭna, chaciełasia b adznačyć vytrymku, stojkaść i sabranaść našaha nasielnictva i razumieńnie im prablemy. Z našaha ž boku čutkam i roznaha rodu internet-ukidam treba supraćpastavić žyvyja, realnyja znosiny z pracoŭnymi kalektyvami».
Siarhiej Kliševič rabiŭ karjeru ŭ dziaržaŭnaj moładzievaj arhanizacyi BRSM. U listapadzie 2019-ha staŭ deputatam Pałaty pradstaŭnikoŭ, vyłučaŭsia praz zbor podpisaŭ i ad Kamunistyčnaj partyi Biełarusi.
Kamientary