U aeraporcie Majami hruzavy Boeing vykaciŭsia za miežy ŭźlotna-pasadačnaj pałasy: zahinuli jak minimum piać čałaviek
Samalot lacieŭ z Puerta-Ryka.
Jak minimum piać čałaviek zahinuli paśla taho, jak hruzavy samalot, jaki vykonvaŭ rejs pa zamovie kampanii Amazon, vykaciŭsia za miežy ŭźlotna-pasadačnaj pałasy ŭ Mižnarodnym aeraporcie Majami, paviedamili miascovyja ŭłady, piša Bi-bi-si.
«My možam paćvierdzić, što zahinuli jak minimum piać čałaviek», — zajaviła mer akruhi Majami-Dejd Danieła Levin Kava na pres-kanfierencyi. Pavodle jaje słoŭ, niekalki čałaviek byli dastaŭlenyja ŭ miascovyja balnicy z traŭmami.
Kiraŭnik pažarnaj słužby Majami Rajed Džadałach paźniej udakładniŭ, što paciarpieli piać čałaviek, troje ź ich znachodziacca ŭ krytyčnym stanie.
Samalot, jaki naležyć avijakampanii 21 Air i prylacieŭ z Puerta-Ryka, padčas pasadki vykaciŭsia za miežy pałasy i ŭrezaŭsia ŭ aŭtamabili na parkoŭcy pierad vialikim łahistyčnym kompleksam, jakim, u tym liku, karystajecca kampanija Amazon.
Na miescy zdareńnia ŭźnik pažar, a niekatoryja paciarpiełyja, jak paviedamlałasia, apynulisia zabłakavanymi ŭnutry aŭtamabilaŭ, u jakija ŭrezaŭsia samalot.
Samalot Boeing 767‑300 vykonvaŭ rejs 7598 ź Mižnarodnaha aeraporta imia Łuisa Muńjosa Maryna ŭ Puerta-Ryka.
«My možam paćvierdzić, što z samalotam Amazon Air, jaki ekspłuatujecca kampanijaj 21 Air, siońnia adbyŭsia incydent padčas sproby pasadki ŭ Mižnarodnym aeraporcie Majami», — skazała kiraŭnica adździeła Amazon pa suviaziach sa ŚMI Keli Nanteł.
«Situacyja chutka raźvivajecca, i my ŭsio jašče źbirajem infarmacyju. My ciesna supracoŭničajem ź miascovymi ŭładami i aficyjnymi asobami, kab dakładna vyśvietlić, što adbyłosia», — dadała jana.
Pavodle dadzienych z adkrytych krynic, samalot Boeing 767‑33AER z rehistracyjnym numaram N1997A byŭ vyrableny ŭ 1994 hodzie.
Pieršapačatkova jon byŭ pastaŭleny bielhijskamu pieravozčyku Sobelair, a ŭ 2016 hodzie pieraabstalavany ŭ hruzavy samalot.
Samalot pavinien byŭ pryziamlicca na ŭźlotna-pasadačnuju pałasu 30 aeraporta Majami, daŭžynia jakoj składaje 2 853 mietry. Usiaho ŭ aeraporcie čatyry ŭźlotna-pasadačnyja pałasy.
Jak śviedčać danyja servisu Flightradar24, u momant vyjezdu za miežy pałasy samalot ruchaŭsia z chutkaściu 112 vuzłoŭ — kala 207 km/h.
Paśla incydentu aeraport byŭ zakryty, u vyniku čaho mnohija rejsy byli zatrymanyja abo admienienyja. Paźniej jon adnaviŭ pracu, ale papiaredziŭ pasažyraŭ pra mahčymyja zatrymki.
«U ciapierašni čas adkrytyja dźvie z našych čatyroch uźlotna-pasadačnych pałos, adnak nastupstvy hetaha incydentu pa-raniejšamu ŭpłyvajuć na pracu aeraporta. Pasažyram […] rekamiendujecca pierad vyjezdam u aeraport udakładnić infarmacyju pra status rejsa niepasredna ŭ svajoj avijakampanii», — havorycca ŭ paviedamleńni na sajcie aeraporta.
Nacyjanalny saviet pa biaśpiecy na transparcie ZŠA (NTSB) paviedamiŭ, što rasśleduje katastrofu i ŭžo nakiravaŭ na miesca zdareńnia svaich śpiecyjalistaŭ.
Mižnarodny aeraport Majami, adkryty amal 100 hadoŭ tamu, u 1928 hodzie, źjaŭlajecca nie tolki adnym z najbujniejšych avijacyjnych vuzłoŭ u ZŠA i śviecie pavodle pasažyrapatoku, ale i pavodle abjomu hruzavych pieravozak.
Majami — adzin z asnoŭnych chabaŭ, praź jaki pasažyry nakiroŭvajucca ŭ krainy Łacinskaj Amieryki i Karybskaha basiejna.
Ciapier čytajuć
Pasadzili advakata Dźmitryja Łajeŭskaha, jaki abaraniaŭ Babaryku i Znaka8
Pasadzili advakata Dźmitryja Łajeŭskaha, jaki abaraniaŭ Babaryku i Znaka
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5151
Kamientary