Padčas pieramoŭ u Kijevie z udziełam śpiecpradstaŭnikoŭ prezidenta ZŠA i daradcaŭ pa nacyjanalnaj biaśpiecy krain «jeŭratrojki» havorka išła nie tolki pra mahčymyja ŭmovy zaviaršeńnia vajny, ale i pra pytańni padtrymki Ukrainy ŭ karotka terminovaj pierśpiektyvie, paviedamlaje «Jeŭrapiejskaja praŭda».
Uładzimir Zialenski paśla sustrečy raspavioŭ, što ŭsiaho 6 vieraśnia adbyłosia try raŭndy pieramoŭ, i ŭsie jany byli «vielmi źmiastoŭnymi».
Prezident Ukrainy pažartavaŭ, što prysutnaść Styva Uitkafa i Džareda Kušniera ŭ Kijevie «spracavała lepš, čym sistemy Patriot», i vykazaŭ pažadańnie, kab jany pryjazdžali čaściej, kab u zvyčajnych ukraincaŭ była mahčymaść «trochi pažyć» biez rasijskich abstrełaŭ.
«Pra «Petryjoty» časam možna pažartavać, ale tym nie mienš my razumiejem, što heta vielmi aktualnaje pytańnie, dla nas vielmi važnaje… Kali vajna budzie praciahvacca ŭžo ŭzimku — a pakul što tak i vyhladaje — my vielmi raźličvajem na «zimovy pakiet», jaki ja siońnia padrabiazna abmiarkoŭvaŭ sa Styvam, Džaredam i našymi jeŭrapiejskimi partniorami», — skazaŭ Zialenski.
Jon adznačyŭ, što Kijeŭ raźličvaje na SPA, enierhietyčnuju padtrymku i mahčymaści vykarystańnia amierykanskaha zvadkavanaha pryrodnaha hazu.
«Aktualnym zastajecca terytaryjalnaje pytańnie… Heta nie aznačaje, što my pra heta vielmi doŭha razmaŭlali, ale u nas była mahčymaść, i my heta abmiarkoŭvali. Ja zastajusia pry svaim mierkavańni, što takija składanyja pytańni vyrašajucca tolki na ŭzroŭni lidaraŭ», — skazaŭ Zialenski.
Pavodle jaho słoŭ, havorka išła taksama pra harantyi biaśpieki, ekanamičnyja harantyi, adnaŭleńnie i «płan roskvitu» dla Ukrainy.
«My razumiejem, jakim musić być našaje vojska, jakoje pavinna być mocnaje — i heta dla nas hałoŭnyja harantyi biaśpieki. Dla ŭsiaho hetaha patrebnyja resursy. I vy heta vydatna razumiejecie, my ŭsie heta razumiejem. Tamu harantyi musiać być mocnymi, vyraznymi», — adznačyŭ prezident Ukrainy.
Zialenski taksama skazaŭ, što padčas pieramoŭ było vyłučana niekalki novych idej adnosna dalejšaha pierahavornaha pracesu.
Śpiecpradstaŭniki prezidenta ZŠA Styŭ Uitkaf i Džared Kušnier 6 vieraśnia ŭpieršyniu prybyli va Ukrainu ź vizitam. Pa vynikach sustrečy jany zrabili niekalki zajaŭ. Dahetul śpiecpasłańniki Trampa pabyvali ź vizitam u Maskvie.
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary