Amazon vypuściła novuju madel razumnaj kałonki — jaje ekran moža adsočvać kožny krok karystalnika
Novaja pryłada Amazon Echo Show 10 z hałasavym kiravańniem ujaŭlaje saboj dynamik z 10,1-calovym ekranam, jaki złučany z kałonkaj rabatyzavanaj rukoj.
Heta madel, cana jakoj $250, źjaŭlajecca najdaražejšaj z usich madelaŭ razumnych kałonak kampanii.
Jak i inšyja pryłady Alexa, kałonka moža ŭstaloŭvać tajmier i kiravać razumnymi lampačkami. Adnak hałoŭnaja ŭłaścivaść — ekran, jaki ruchajecca aŭtanomna.
Ekran ruchajecca tudy, kudy nakiroŭvajecca karystalnik, tym samym vy zaŭsiody majecie mahčymaść pierasoŭvacca pa pakoi i adnačasova praciahvać hladzieć sieryjał ci nastupny krok u recepcie, piša The Wall Street Journal.
Amazon dasiahnuła vialikaha pośpiechu, kali vypuściła pieršyja razumnyja kałonki. Kampanii ŭdałosia damahčysia, kab ludzi adčuvali siabie kamfortna ŭ domie z padklučanymi da internetu mikrafonami, jakija prasłuchoŭvajuć kožny ich krok. Ciapier Amazon stvaryła jašče i ekrany, jakija nie tolki prasłuchoŭvajuć, ale i adsočvajuć kožny krok.
Pryłada vykarystoŭvaje 4 ustalavanyja mikrafony i kamieru, kab sačyć za karystalnikam. Jak tolki ekran vyznačaje miescaznachodžańnie z dapamohaj vašaha hołasu, uklučajecca kamiera. Prahramnaje zabieśpiačeńnie razumnaj kałonki analizuje vašu formu, vyznačaje miežy cieła i hladzić na kolery adzieńnia. Takim čynam pryłada raspaznaje, što pierad joj čałaviek, ale razumnaja kałonka nie moža raspaznavać tvar.
Takaja apracoŭka ažyćciaŭlajecca na praciahu milisiekund. Pry hetym usie apieracyi adbyvajucca na samoj pryładzie. Nivodnaja vyjava, videa ci aŭdyja, źviazanyja z adsočvańniem, nie zachoŭvajucca ŭ vobłaku, śćviardžajuć pradstaŭniki kampanii.
Ekran moža aŭtamatyčna krucicca na 360° na svajoj cylindryčnaj asnovie.
Taksama pryłada moža ažyćciaŭlać videazvanki. Kamiera maje 13 miehapiksielaŭ, što źjaŭlajecca pieravahaj pierad papiarednimi madelami z 1-miehapiksielnymi kamierami.
Echo Show 10 možna taksama vykarystoŭvać jak kamieru biaśpieki. Praz mabilny dadatak Alexa možna atrymać dostup da kamiery, kali vy vychodzicie z doma. Praz dadatak možna krucić kamieru i bačyć, što adbyvajecca ŭ pakoi, pakul vas niama. Taksama možna skarystacca funkcyjaj Alexa Guard, što dazvalaje pryładzie vyjaŭlać huki pažarnaj sihnalizacyi abo raźbitaha škła.
Ciapier čytajuć
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary