«Našu historyju» vykinuli z «Biełsajuzdruka». U subotu Redakcyja budzie pradavać śviežy numar u ofisie — nabyvajcie!
«Naša historyja», samy papularny časopis na biełaruskaj movie, bolš nie budzie pradavacca ŭ hazietnych kijoskach. Dziciačyja «Dudu» i «Aściarožna, dzieci!» — taksama. «Biełsajuzdruk» paviedamiŭ, što ŭ adnabakovym režymie razryvaje adnosiny.
Kamientary tut lišnija — vy sami ŭsio razumiejecie.
Miž tym jakraz učora my atrymali z drukarni nakład śviežaha numara «Našaj historyi».
Što my budziem rabić u takoj situacyi? My dapamahali kamu tolki mahli. Zaraz my budziem raźličvać na vašu dapamohu.
1) Dla tych, chto kuplaŭ časopisy ŭ «Sajuzdruku», my budziem štomiesiac dva dni pradavać časopis u Redakcyi.
2) My vymušana pavialičvajem canu na časopis z 5,80 da 7 rubloŭ.
3) U vypadku, kali nas vykinuć i z padpiski, my naładzim ułasnuju sistemu dastaŭki, jak z hazietaj u 2006—2008 hadach.
4) My prosim čytačoŭ dasłać elektronnyja abo papiarovyja zvaroty da ŭładaŭ z prośbaj viarnuć biełaruskamoŭnyja časopisy ŭ «sajuzdruki» (u zvarotach pamiatajcie pra karektnaść).
Asabliva važna, kab voś hety novy numar, №2 za 2021 hod, dajšoŭ da kožnaha čytača.
My prosim pra dapamohu. Kali łaska, dapamažycie nam raspradać hetyja časopisy!
My budziem pradavać «Našu historyju» ŭ Redakcyi «Narodnaj voli» pa adrasie Enhielsa, 34a ŭ piatnicu, 5 sakavika (z 14:00 da 20:00), i ŭ subotu, 6 sakavika (z 10:00 da 18:00). Heta samy centr Minska, litaralna 400 mietraŭ ad mietro «Kupałaŭskaja» i «Kastryčnickaja», bieły dom z murałam.
Pryjdzicie i kupicie časopis — dla siabie i dla svajakoŭ, susiedziaŭ, siabroŭ, kaleh pa pracy.
Kali łaska, padrychtujcie najaŭnyja hrošy (naš kasavy aparat nie prymaje apłatu kartkaj, na žal). Časopis kaštuje 7 rubloŭ. Kali brać try asobniki, to sa źnižkaj — 20 rubloŭ. Dziciačyja časopisy budziem pradavać pa 2,5 rubli za numar.
Chto nie moža pryjechać, šukajcie časopis u kniharniach, hipiermarkietach, prasicie minskich svajakoŭ kupić dla vas numary.
Da 25 sakavika možna aformić padpisku na «Našu historyju», «Aściarožna, dzieci!» i «Dudu» anłajn abo ŭ paštovych adździaleńniach. U takim razie, pačynajučy ad krasavika, numary časopisa buduć prynosić vam dachaty.
Moža zdarycca tak, što i «Biełpošta» razarvie damovu z nami. U takim razie my źbiarom bazu padpisčykaŭ i budziem sami raznosić i rassyłać časopisy, jak raznosili kaliś u 2006—2008 hazietu.
Čytajcie dobryja, razumnyja, jakasnyja vydańni, čytajcie pa-biełarusku, rajcie ich susiedziam i kaleham.
Nahadajem zaadno, jak padtrymać pracu žurnalistaŭ «Našaj Nivy»:
1. Pieraličyć hrošy praz Kłub Našaj Nivy. Treba zarehistravacca praz sacsietki ci hmejł, vybrać Hibki płan i lubuju sumu (na fota).
2. Apłata praz ARIP ź luboj biełaruskaj kartki: Błahotvoritielnosť, obŝiestviennyje objedinienija — Prośvietitielskije, kulturno-dosuhovyje — Sorodiči. Albo numar pasłuhi 4346851.
Kamientary