Byłuju supracoŭnicu Kanhresa ZŠA abvinavacili ŭ insceniroŭcy napadu na samu siabie. Jana kazała, što na žyvacie napisali «šlucha Trampa»
Byłuju supracoŭnicu Kanhresa abvinavacili ŭ insceniroŭcy žorstkaha napadu pa palityčnych matyvach: pavodle viersii abvinavačvańnia, jana naniała čałavieka, kab toj parezaŭ jaje cieła, piša Bi-bi-si.
Prakurory śćviardžajuć, što 26‑hadovaja Natali Hryn i jaje saŭdzielnik padstroili napad na pryrodnaj ściežcy, a zatym paviedamili palicyi, što na Hryn napali troje ŭzbrojenych mužčyn, źviazali jaje, napisali «šlucha Trampa» (Trump whore) na jaje žyvacie i nanieśli dziasiatki parezaŭ.
Hryn skazała palicyi, što na jaje napali, bo jana pracavała na respublikanskaha kanhresmiena ź Ńju-Džersi Džefiersana Van Dru, čyjo imia nie fihuruje ŭ abvinavaŭčym akcie, ale jaho ofis paćvierdziŭ, što žančyna była ŭ ich pracaŭładkavanaja raniej.
Hryn abvinavačvajuć u zmovie z metaj chłuślivaha paviedamleńnia ab napadzie i ŭ dačy łžyvych pakazańniaŭ palicyi.
23 lipienia Hryn i jaje saŭdzielnik patelefanavali pa numary 911 i zajavili, što hulali pa lasnoj ściažyncy ŭ pryrodnym zapaviedniku ŭ Eh-Charbar, štat Ńju-Džersi, kali na ich napali troje mužčyn. Tyja nibyta nazyvali Hryn pa imieni i zhadvali jaje pracu na fiederalnaha słužboŭca, havorycca ŭ abvinavaŭčym akcie.
Kali palicyja prybyła na miesca, jany znajšli Hryn sa ściahnutymi płastykavymi ściažkami rukami i nahami, jaje kašula była naciahnutaja na hałavu, a na žyvacie było napisana «šlucha Trampa», i «[imia fiederalnaha słužačaha] rasist» — na śpinie.
Na jaje tvary, šyi, hrudziach i plačy byli parezy. Hryn zajaviła palicyi — jak na miescy, tak i praz paru dzion, — što napadnik prycisnuŭ jaje da ziamli i pahražaŭ zastrelić, adznačana ŭ dakumiencie.
Padčas rasśledavańnia palicyja vyjaviła, što pakazańni Hryn i jaje saŭdzielnika razychodziacca. Taksama vyśvietliłasia, što saŭdzielnik Hryn niezadoŭha da incydentu ŭvodziŭ u internecie pošukavy zapyt zip ties near me («płastykavyja ściažki kala mianie»). Takija ž ściažki byli znojdzienyja ŭ aŭtamabili Hryn.
Palicyja taksama zajaviła, što znajšła ček na sumu 500 dalaraŭ: Hryn zapłaciła majstru pa madyfikacyi cieła za naniasieńnie joj parezaŭ u toj ža dzień, kali nibyta adbyŭsia napad.
«My hłyboka zasmučanyja ŭčorašnimi navinami. Choć Natali bolš nie pracuje ŭ ofisie kanhresmiena, našy dumki i malitvy ź joj. My spadziajemsia, što jana atrymlivaje nieabchodnuju dapamohu», — skazaŭ pradstaŭnik ofisa Van Dru ŭ kamientary Bi-bi-si ŭ čaćvier.
Hryn pahražaje da 10 hadoŭ turmy i štraf u pamiery 500 tysiač dalaraŭ, kali jaje pryznajuć vinavataj pa abodvuch punktach. Pakul jaje vyzvalili pad zakład u 200 tysiač dalaraŭ.
Kamientary