Suśvietnyja pastaŭki dla soniečnaj enierhietyki zaležać ad rehijona, dzie Kitaj abvinavačvajuć u strašnaj palitycy
Prychilniki raspaŭsiudžvańnia soniečnaj enierhii va ŭsim śviecie sutykajucca z prablemaj: łancužki pastavak dla hetaj haliny značna zaležać ad Sińcziana — kitajskaha rehijona, dzie, na dumku suśvietnaj supolnaści, urad pravodzić palityku asimilacyi ŭ adnosinach da ujhuraŭ.
Kala pałovy suśvietnych pastavak polikremniju, nieabchodnaha dla vytvorčaści soniečnych batarej, pastupaje z paŭnočna-zachodniaha Kitaja, dzie, pa słovach pravaabaroncaŭ, znachodzicca šyrokaja sietka kancentracyjnych łahieraŭ, u jakich utrymlivajecca bolš za miljon ujhuraŭ, piša The Wall Street Journal.
Pradstaŭniki industryi soniečnaj enierhietyki aścierahajucca, što polikremnij i inšyja nieabchodnyja materyjały, jakija pastupajuć ź Sińcziana, mohuć być źviazanyja z prymusovaj pracaj. Adpaviedna, pastaŭščyki mohuć uskosna być źviazanyja z parušeńniem pravoŭ čałavieka.
Uzmacniajecca hłabalny cisk, kab abmiežavać handal ź Sińczianam. I ZŠA, i ES razhladajuć zakanadaŭstva, jakoje moža pryvieści da zabarony impartu praduktaŭ z kitajskaha rehijona. U ZŠA sa studzienia ŭžo zabaranili impart bavoŭny i tamataŭ ź Sińcziana.
Kitajski ŭrad zajaŭlaje, što ŭ Sińczianie niama prymusovaj pracy, u tym liku ŭ halinie soniečnaj enierhietyki. Piekin adznačaje, što dziejnaść u hetym rehijonie nakiravanaja na baraćbu z teraryzmam, a kali jeŭrapiejskija soniečnyja kampanii vyrašać spynić biznes z Kitajem, to heta pryviadzie tolki da straty imi prybytkaŭ.
Ekśpierty pierakananyja, što raspracoŭka inšych krynic polikremniju patrabuje vializnych hrošaj i šmat času, što, vierahodna, zapavolić hłabalny praces raspaŭsiudžvańnia soniečnaj enierhietyki, jakaja ličycca žyćciova nieabchodnaj dla baraćby sa źmienami klimatu i adzinaj realnaj alternatyvaj nafcie i hazu.
Tym nie mienš, Asacyjacyja soniečnaj enierhietyki (Solar Energy Industries Association) zaklikaje svaich členaŭ da admovy ad łancužkoŭ pastavak ź Sińcziana. Jeŭrapiejskija zakanadaŭcy zajaŭlajuć, što hatovyja pajści na hety krok, navat kali heta zapavolić pierachod da ŭznaŭlalnych krynic enierhii.
«My nie možam dapuścić, kab enierhietyčny pierachod hruntavaŭsia na rabskaj pracy, — adznačaje Hanna Kavacyni, člen Jeŭrapiejskaha parłamienta ad partyi Zialonych. — Heta nie moža być apraŭdańniem tamu, što adbyvajecca ŭ Sińczianie».
Vytvorčaść polikremniju — enierhajomisty praces, jaki ŭklučaje ŭ siabie ačystku kremniju z vykarystańniem chimičnych rečyvaŭ i nadzvyčaj vysokaj tempieratury. Zatym atrymany pradukt pieratvarajuć u krystaličnyja źlitki, jakija narazajucca na tonkija płaściny, a paśla złučajucca ź inšymi elektronnymi kampanientami, u vyniku čaho atrymlivajucca soniečnyja panieli.
Kitaj staŭ daminavać na rynku ŭ apošnija hady dziakujučy tannym vuhalnym elektrastancyjam u Sińczianie, enierhiju jakich vykarystoŭvajuć dla vytvorčaści polikremniju.
Zachodnija kampanii abvinavačvajuć Kitaj u nieprazrystaści nakont taho, dzie zdabyvajecca syravina. Tamu časta składana zrazumieć, što adbyvajecca ŭnutry łancužkoŭ pastavak. Uličvajučy hetuju niapeŭnaść, adziny sposab zabiaśpiečyć čyściniu pastavak — całkam paźbiahać kitajskaha rehijona.
Kamientary