Prakapienia vykupiŭ u syna Huceryjeva doli ŭ dźviuch kryptabiržach. Kaža: sankcyi tut ni pry čym

Viktar Prakapienia

Said Huceryjeŭ pačaŭ aktyŭna inviestavać u kryptavalutny rynak u 2017 hodzie, u intervju rasijskamu Forbes jon kazaŭ, što płanuje nadoŭha zatrymacca ŭ industryi. Adnak sioleta stała viadoma ab prodažy dolaŭ u troch prajektach. 

Dva prajekty — Currency.com i Capital.com ciapier całkam naležać byłomu partnioru Huceryjeva Viktaru Prakapieniu. Z kamientara Prakapieni «Našaj Nivie» vynikaje, što ŭhoda płanavałasia zadoŭha da ŭviadzieńnia sankcyjaŭ suprać baćki Saida, i maje pad saboj tolki ekanamičnyja padstavy:

«My viali pieramovy z pačatku minułaha hoda. Letaś i damovilisia, čakali dazvołu rehulataraŭ. Kampanija rehulujecca ŭ Anhlii, ZŠA, Aŭstralii, na Kipry i Hibrałtary, patrabavałasia zhoda kožnaj krainy. Jak tolki atrymali zhodu, zaklučyli ŭhodu. Pryčynaj prodažu stała toje, što Said dastatkova zarabiŭ i vyrašyŭ vyjści na vysokim kursie kryptavalut, nie čakajučy ich padzieńnia». 

Pavialičyć

Adnačasova z prodažam dolej u sumiesnych z Prakapieniem biznesach, Huceryjeŭ pradaŭ svaju dolu ŭ biržy Zubr.io mižnarodnaj karparacyi FTX, jakoj kiruje samy małady ŭ śviecie kryptamiljarder Sem Bankman-Fryd. 

Suma troch uhodaŭ nie ahałošvajecca, pa padlikach rasijskaha vydańnia «Viedomosti», Huceryjeŭ moh zarabić kala 150 młn dalaraŭ. 

U Sapital.com (jurasoby zarehistravany ŭ Biełarusi, Vialikabrytanii i na Kipry) Huceryjeŭ i Prakapienia ŭ 2017 hodzie ŭkłali 25 młn dalaraŭ (50% na 50%), jašče 1,5 młn kaštavaŭ damien. Inviestycyi ŭ Currency.com (jurasoby byli zarehistravanyja ŭ Biełarusi, Vialikabrytanii i na Hibrałtary) na momant zapusku kampanii skłali 10 młn dalaraŭ na dvaich, paviedamlaje RBK.

Pavialičyć

Nahadajem, baćka Saida, aliharch Michaił Huceryjeŭ u červieni patrapiŭ pad siektaralnyja sankcyi ES, u žniŭni - pad sankcyi Vialikabrytanii. Jaho źviazvajuć sa źjaŭleńniem u Łukašenki Majbacha i viertalota. Jon ža źviazany ź Viktaram Prakapieniem, kažuć, Huceryjeŭ dapamoh jamu vyjści na svabodu ź SIZA.

Ciapier Huceryjevu-starejšamu zabaronieny ŭjezd u ES i Vialikabrytaniju, karystańnie i rasparadžeńnie majomaściu ŭ hetych krainach, zamarožvańnie rachunkaŭ i spynieńnie finansava-ekanamičnych adnosinaŭ z samim Michaiłam Huceryjevym i padkantrolnymi jamu kampanijami.

«Asnoŭny jaho biznes — strachavańnie, nafta, deviełapierstva, kalij — jano za miežami ES i Brytanii, — adznačała krynica «Našaj Nivy» ź biznes-kołaŭ. — Heta ŭsio ŭnutry Rasii i Biełarusi, kredytujecca pieradusim jon taksama ŭ rasijskich dziaržaŭnych bankach. Ale vidavočna, svajoj brytanskaj majomaściu na niekalki dziasiatkaŭ miljonaŭ funtaŭ jon užo nie skarystajecca, hrošy na Zachad nie vyviedzie, nie kažučy pra toje, što ciapier dla partnioraŭ stanovicca vielmi taksičnym i jahony syn Said Huceryjeŭ, jaki žyvie i viadzie spravy ŭ Łondanie». 

Čytajcie taksama:

Chto taki Michaił Huceryjeŭ i čym jamu adhuknucca brytanskija sankcyi?

• 0
• 0
• 0
• 0
• 0
• 0
• 0
• 0