A karol-ta poły. Kazachstan: Za adzin dzień režym apynuŭsia na miažy padzieńnia
Takajeŭ źniaŭ Nazarbajeva. Zachopleny, ale potym adbity aeraport Ałmaty. Va ŭsioj krainie ŭviali režym NS, Tokajeŭ dapuściŭ zaprašeńnie sił ADKB. U Kazachstanie praciahvajucca chvalavańni, raskazvajem, što viadoma na dadzieny momant.
Pa danych na 21:00. Pa ŭsioj krainie ŭviedziena nadzvyčajnaje stanovišča z šeraham abmiežavańniaŭ.
Prezident Kazachstana Kasym-Žamart Takajeŭ zajaviŭ, što «terarystyčnyja bandy» biaruć pad kantrol bujnyja abjekty infrastruktury ŭ krainie.
Jon zajaviŭ, što pratestoŭcy zachapili aeraport ŭ Ałmaty, a taksama 5 samalotaŭ, u tym liku i zamiežnych. Paźniej vice-mer Ałmaty zajaviŭ, što aeraport viernuty pad kantrol uradavych siłaŭ.
Takajeŭ nazvaŭ padziei ŭ Kazachstanie «źniešniaj ahresijaj».
Viadoma, što paŭstancy ŭ Ałmaty zachapili siadzibu Kamiteta nacyjanalnaj biaśpieki.
Prezident Kazachstana Takajeŭ paprasiŭ dapamohi ŭ ADKB. Pra heta paviedamlaje RIA Novosti.
Situacyja na 18:00. Pratesty praciahvajucca, Takajeŭ prybraŭ Nazarbajeva z pasady kiraŭnika Rady Biaśpieki.
Taksama Takajeŭ vystupiŭ sa zvarotam, u jakim paviedamiŭ, što sam zastupaje na pasadu kiraŭnika Rady Biaśpieki i što ź siońniašniaha dnia budzie dziejničać maksimalna žorstka. Jon abvierh čutki, što ŭciok z krainy i zajaviŭ ab achviarach z boku siłavikoŭ.
Prezident Kazachstana Takajeŭ prybraŭ z pasady kiraŭnika Rady biaśpieki Nazarbajeva
Tym časam u horadzie Tałdykorhan źnieśli pomnik Nazarbajevu.
U Bałchašy mietałurhi miascovaha zavoda spynili pracu i dałučylisia da pratestaŭ.
Aeraport u Ałmaty zachopleny pratestoŭcami.
«Biełavija» spačatku adkryła rehistracyju na rejs u Ałmaty, ale paśla vylet usio ž admianili.
Što adbyvałasia dniom?
Centram pratestaŭ staŭ samy vialiki horad krainy — Ałmaty.
Zranku niekalki tysiač demanstrantaŭ sabralisia na centralnaj płoščyi, pa darozie zachoplivajučy techniku siłavikoŭ i aŭtamaty.
Jany šturmavali budynak akimata — abłasnoj administracyi. U im uźnik pažar. Paśla žorstkich sutyčak i pierastrełak siłavik pakinuli akimat i płošču pierad im.
Udzień pratestoŭcy zdoleli zachapić ałmacinskuju rezidencyju prezidenta Kazachstana. Pastupajuć paviedamleńni, što rezidencyja haryć. Taksama ŭ Ałmaty padpalili ofis kirujučaj partyi «Nur Atan».
Palicyja Ałma-Aty adčytałasia ab biesparadkach. Karotkija vyniki pryvodzić telehram-kanał «Baza»:
- spalena 120 mašyn (u tym liku 33 palicejskich);
- u horadzie padpalili budynak akimata i palicyi;
- raźbita 120 kram i abjektaŭ handlu, 180 pradpryjemstvaŭ hramadskaha charčavańnia i kala 100 ofisaŭ;
- paciarpieli bolš za 500 čałaviek.
Šturm akimata adbyŭsia i ŭ 4-m pa pamiery horadzie krainy — Aktabie.
A ŭ Žanaazienie, kałyscy hetaha paŭstańnia, narod uparta staić na płoščy. Mienavita rasstreł rabočych Žanaaziena ŭ 2011 hodzie lažyć čornaj plamaj na Nazarbajevie.
Ludzi taksama zaniali centralnuju płošču horada Paŭładar.
Praciŭniki ŭłady pakul zavałodali nievialikaj kolkaściu zbroi, taksama pratestoŭcy razzbrojvajuć vajskoŭcaŭ.
U niekatorych rajonach Ałma-Aty palicyja ŭciakaje ad natoŭpu. U Aktau mitynhoŭcy pierachapili hruzavik z vajskoŭcami, tyja zdalisia biez asablivaha supracivu.
Nadzvyčajnaje stanovišča abvieścili ŭ stalicy krainy Nur-Sułtanie (raniej - Astana).
Harać administracyjnyja budynki. Viadoma pra pažary ŭ budynku akimata Ałmacinskaj vobłaści (akimat — anałah biełaruskaha vykankama) i prakuratury.
Noč pratestaŭ, što viadoma
Raniej, u try hadziny nočy pa biełaruskim časie (kala 6 ranku pa kazachskim) TASS paviedamiła ab tym, što prezident Kazachstana Kasym Žamart-Takajeŭ pryniaŭ adstaŭku ŭrada. Členy ŭrada praciahnuć vykanańnie svaich abaviazkaŭ da zaćviardžeńnia novaha składu kabmina.
Časova vykonvać abaviazki kiraŭnika ŭrada budzie pieršy vice-premjer Alichan Smaiłaŭ. Dziaržsakratarom pryznačany były pamočnik prezidenta Jerłan Karynaŭ. Eks-namieśnik administracyi prezidenta Murat Nurtleŭ pryznačany pieršym namieśnikam staršyni Kamiteta nacyjanalnaj biaśpieki respubliki.
Takajeŭ zajaviŭ, što ŭrad Kazachstana niasie asablivuju vinu za pratesnuju situacyju, što skłałasia ŭ krainie. Jon adznačyŭ, što situacyja ŭ Ałma-Aty i Manhistaŭskaj vobłaści pastupova stabilizujecca paśla ŭviadzieńnia režymu nadzvyčajnaha stanovišča. Jon budzie dziejničać da 19 studzienia.
Taksama Takajeŭ daručyŭ uvieści dziaržrehulavańnie koštaŭ na sacyjalna značnyja tavary, a taksama na zvadkavany haz i bienzin na 180 dzion. A taksama daručyŭ pravieści rasśledavańnie na pradmiet cenavaj zmovy ŭ hazavaj śfiery.
«Palityčny i sacyjalna-ekanamičny ład Kazachstana nie źmienicca», — zajaviŭ Takajeŭ.
Kazachskija siłaviki paviedamili, što ŭsiaho zatrymali 200 čałaviek. Traŭmy atrymali 95 supracoŭnikaŭ milicyi, paškodžanyja 37 milicejskich aŭtamabilaŭ.
Ale niahledziačy na adstaŭku ŭrada i kamiendancki čas, pratesty ŭ Kazachstanie praciahvajucca.
Z samaha ranku ŭ Ałmaty nie pracuje internet i hramadski transpart, šmat jakija arhanizacyi vyrašyli pracavać z domu. Darohi da aeraporta ačeplenyja.
Taksama rankam stała viadoma, što ałmacinskija pratestoŭcy ŭčora zachapili miascovy akimat.
Jak paviedamlaje @orda_kz, pratestoŭcy nie vierać u adstaŭku ŭrada i patrabujuć, kab u skład Kabmina nie ŭvachodzili čalcy kirujučaj partyi.
Jany taksama patrabujuć, kab z pasta akima Manhistaŭskaj vobłaści syšoŭ Nurłan Nahajeŭ. Pa danych vydańnia, kala akimata znachodzicca kala 1000 čałaviek.
Pratestoŭcy zastajucca taksama na vulicach Siamieja i Aktabie. U bujnyja harady ściahvajecca śpiecyjalnaja i vajennaja technika.
Miž tym, u siecivie raspaŭsiudžvajecca videa, na jakim ałmacinskaja palicyja ruchajecca razam z narodam.
(abnaŭlajecca)
«Šał kiet!» U Kazachstanie chaatyčnyja pratesty raspaŭsiudzilisia na ŭsiu krainu
Ciapier čytajuć
Pajšoŭ z žyćcia 32-hadovy Maksim Čarniaŭski — zasnavalnik supołki «Nadakučyŭ nam hety Łukašenka» pačatku 2010-ch16
Kamientary