Dva biełaruskija prajekty ŭvajšli ŭ Top-100 inavacyjnych startapaŭ Jeŭropy
Viadučaja metčmiejkinh-płatforma dla pošuku partnioraŭ dla startapaŭ i inviestaraŭ u Centralnaj i Uschodniaj Jeŭropie Vestbee apublikavała Top-100 inavacyjnych startapaŭ Jeŭropy. U rejtynh patrapili biznesy, jakija ŭvajšli ŭ šort-list konkurs European Startup Challenge. Siarod ich — dva biełaruskija, piša thinktanks.by.
Biełaruskija pradstaŭniki ŭ top-100 jeŭrapiejskich startapaŭ — prajekty GoodStyle i Lingvanex.
GoodStyle — startap, jaki stvaryŭ virtualnuju prymieračnuju ŭ farmacie mabilnaj prahramy. Jaho stvaralnikam stała biełaruskaja kampanija VIP IT. Kampanija pracuje nad rašeńniami ŭ halinie štučnaha intelektu, jakija dazvolać zrabić anłajn-pakupki bolš efiektyŭnymi i mienš zatratnymi pa časie.
Jak heta pracuje? Dadatak Goodstyle dazvalaje atrymać ujaŭleńnie, jak taja ci inšaja reč z katałohaŭ internet-kramaŭ budzie vyhladać na pakupniku, a taksama skambinavać jaje ź inšymi tavarami ci navat užo najaŭnymi ŭ harderobie karystalnika pradmietami.
Svoj pieršy kantrakt startap zaklučyŭ z ahrehataram miascovych brendaŭ va Ukrainie. Taksama partniorami prahramy źjaŭlajucca Lamoda i Aliexpress.
Ahułam prahrama pa stanie na leta minułaha hoda naličvała kala 55 tysiač karystalnikaŭ, a siaredni ček kupli składaŭ 180 dalaraŭ.
U najbližejšy čas startap budzie zajmacca pryciahnieńniem inviestycyj dla raźvićcia. U kampanii kažuć, što ciapier prosta nie paśpiavajuć absłužyć usich achvotnych partnioraŭ.
Lingvanex — technałahičny startap, zasiarodžany na zabieśpiačeńni mašynnaha pierakładu z vykarystańniem technałohii niejrasietak.
Pierakładčyk Lingvanex dazvalaje pierakładać piśmovyja teksty, razmovy, teksty na malunkach, telefonnyja zvanki, dakumienty na bolš čym 80 moŭ. Prajekt dastupny na lubych płatformach i budzie karysny dla biznesu, navučańnia, padarožžaŭ, vyvučeńnia zamiežnych moŭ.
U 2020 hodzie prajekt zaniaŭ pieršaje miesca ŭ startap-batle Venture Day Minsk i atrymaŭ Google Cloud Credits na 100 tysiač dalaraŭ. U kancy 2020 hoda Lingvanex dasiahnuŭ 2 miljonaŭ pierakładaŭ u sutki pry 400 tysiačach karystalnikaŭ.
Adznačym taksama, što Vestbee štomiesiac publikuje Top-10 startapaŭ miesiaca z rehijona Centralnaj i Uschodniaj Jeŭropy. U ich taksama sustrakajucca biełaruskija prajekty. Naprykład, u śniežni 2021 hoda ŭ Top-10 uvajšoŭ Cropfleet — biełaruski startap, jaki imkniecca zabiaśpiečyć šyrokaje raspaŭsiudžvańnie i dastupnaść dronaŭ dla palivu sielskahaspadarčych kultur i raspyleńnia piestycydaŭ.
Dla hetaha kampanija prapanuje kambinacyju aparatnych i prahramnych rašeńniaŭ, jakija dapamahajuć dronam pracavać z bolšaj dakładnaściu i efiektyŭnaściu. U vyniku firma dazvalaje svaim klijentam aščadzić značnuju sumu hrošaj i času, a taksama značna pavysić jakaść praceduraŭ apyrskvańnia sielskahaspadarčych kultur.
Kamientary