Два беларускія праекты ўвайшлі ў Топ-100 інавацыйных стартапаў Еўропы
Вядучая мэтчмейкінг-платформа для пошуку партнёраў для стартапаў і інвестараў у Цэнтральнай і Усходняй Еўропе Vestbee апублікавала Топ-100 інавацыйных стартапаў Еўропы. У рэйтынг патрапілі бізнэсы, якія ўвайшлі ў шорт-ліст конкурс European Startup Challenge. Сярод іх — два беларускія, піша thinktanks.by.
Беларускія прадстаўнікі ў топ-100 еўрапейскіх стартапаў — праекты GoodStyle і Lingvanex.
GoodStyle — стартап, які стварыў віртуальную прымерачную ў фармаце мабільнай праграмы. Яго стваральнікам стала беларуская кампанія VIP IT. Кампанія працуе над рашэннямі ў галіне штучнага інтэлекту, якія дазволяць зрабіць анлайн-пакупкі больш эфектыўнымі і менш затратнымі па часе.
Як гэта працуе? Дадатак Goodstyle дазваляе атрымаць уяўленне, як тая ці іншая рэч з каталогаў інтэрнэт-крамаў будзе выглядаць на пакупніку, а таксама скамбінаваць яе з іншымі таварамі ці нават ужо наяўнымі ў гардэробе карыстальніка прадметамі.
Свой першы кантракт стартап заключыў з агрэгатарам мясцовых брэндаў ва Украіне. Таксама партнёрамі праграмы з'яўляюцца Lamoda і Aliexpress.
Агулам праграма па стане на лета мінулага года налічвала каля 55 тысяч карыстальнікаў, а сярэдні чэк куплі складаў 180 даляраў.
У найбліжэйшы час стартап будзе займацца прыцягненнем інвестыцый для развіцця. У кампаніі кажуць, што цяпер проста не паспяваюць абслужыць усіх ахвотных партнёраў.
Lingvanex — тэхналагічны стартап, засяроджаны на забеспячэнні машыннага перакладу з выкарыстаннем тэхналогіі нейрасетак.
Перакладчык Lingvanex дазваляе перакладаць пісьмовыя тэксты, размовы, тэксты на малюнках, тэлефонныя званкі, дакументы на больш чым 80 моў. Праект даступны на любых платформах і будзе карысны для бізнэсу, навучання, падарожжаў, вывучэння замежных моў.
У 2020 годзе праект заняў першае месца ў стартап-батле Venture Day Minsk і атрымаў Google Cloud Credits на 100 тысяч даляраў. У канцы 2020 года Lingvanex дасягнуў 2 мільёнаў перакладаў у суткі пры 400 тысячах карыстальнікаў.
Адзначым таксама, што Vestbee штомесяц публікуе Топ-10 стартапаў месяца з рэгіёна Цэнтральнай і Усходняй Еўропы. У іх таксама сустракаюцца беларускія праекты. Напрыклад, у снежні 2021 года ў Топ-10 увайшоў Cropfleet — беларускі стартап, які імкнецца забяспечыць шырокае распаўсюджванне і даступнасць дронаў для паліву сельскагаспадарчых культур і распылення пестыцыдаў.
Для гэтага кампанія прапануе камбінацыю апаратных і праграмных рашэнняў, якія дапамагаюць дронам працаваць з большай дакладнасцю і эфектыўнасцю. У выніку фірма дазваляе сваім кліентам ашчадзіць значную суму грошай і часу, а таксама значна павысіць якасць працэдураў апырсквання сельскагаспадарчых культур.
-
Назад да ручкі і забарона на смартфоны: універсітэты вымушаныя змяняць фармат заняткаў і кантрольных, інакш ШІ не дае ні вучыць, ні праверыць
-
Google запусціла Gemini 3.5 Transcribe для расшыфроўкі мовы. У спісе ёсць і беларуская
-
Цім Кук развітаўся з пасадай генеральнага дырэктара Apple пасля 15 гадоў кіраўніцтва
Цяпер чытаюць
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў32
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1414
Каментары