Kiraŭnik SK pryznaŭ paślavybarčy hvałt z boku siłavikoŭ, ale apraŭdaŭ jaho
Staršynia Śledčaha kamiteta Dźmitryj Hara zajaviŭ, što masavaha hvałtu z boku siłavikoŭ padčas paślavybarčych pratestaŭ nie było, a fizičnaja siła prymianiałasia «abhruntavana i ŭ nieabchodnych miežach».
Staršynia Śledčaha kamiteta Dźmitryj Hara 26 maja ŭ intervju telekanału ANT zajaviŭ, što masavaha hvałtu z boku siłavikoŭ padčas pratestaŭ paśla prezidenckich vybaraŭ 2020 hoda nie było, piša «Radyjo Svaboda».
Viadoŭca spytaŭ jaho: «Ci možam my zakryć tematyku, na jakuju nas sprabavali padsadzić, — tematyku nibyta masavaha hvałtu?»
«Na moj pohlad, hetaja tema zakrytaja, bo bolšaść fejkaŭ, jakija byli ŭkinutyja (jak tam ich nazyvali, «sinija zadnicy», nakolki ja pamiataju), jany raźviančanyja, — zajaviŭ Hara. — Ja, jak čałaviek, jaki kantralavaŭ, raźbiraŭsia z hetymi pytańniami, mahu skazać (i tady ŭ mianie byŭ taki punkt hledžańnia, i ciapier jon nie pamianiaŭsia absalutna): jość dziaržava, dziaržava pavinna zabiaśpiečyć spakoj i biaśpieku hramadzian. I dla hetych metaŭ u dziaržavy jość roznyja ryčahi, uklučajučy prymianieńnie fizičnaj siły, kali heta nieabchodna. Dziaržava maje prava heta rabić, i abaviazanaja ŭ vypadku nieabchodnaści».
«Nichto nie kaža, što fizičnaja siła tady nie prymianiałasia. Ale jana prymianiałasia abhruntavana, zakonna i ŭ nieabchodnych miežach. Heta było. Usio astatniaje — nakručvańnie, infarmacyjnaje supraćborstva, toje, što nie maje ničoha ahulnaha z realnaściu», — skazaŭ kiraŭnik SK.
Viadučy na heta zajaviŭ, što «dziaržava maje absalutnaje prava na hvałt».
Pa słovach staršyni SK, «hulnia na emocyjach našych ludziej, jakaja adbyvałasia napiaredadni letnich padziej 2020 hoda», nie moža być zakrytaja, tamu što «pracujuć śpiecsłužby šerahu dziaržaŭ».
«Ja ščyra skažu: varožych nam dziaržaŭ. Chiba jany pryznajuć svaju parazu? Jany nie pryznajuć svajoj parazy, jany buduć dalej pracavać, — ličyć čynoŭnik. — Ja poŭnaściu ŭpeŭnieny, što ciapier my znachodzimsia, jak i znachodzilisia, u stanie vajny. Vajna infarmacyjnaja, vajna ŭ internet-prastory, ličbavaj płoskaści, ale vajna praciahvajecca. I razhojdvać, sprabavać razhajdać hramadstva buduć pastajanna, ja ŭ hetym nie sumniavajusia».
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary