Azaronak patrabuje začynić minski bar «Kalinoŭski» — nibyta praz nacyjanalny kanflikt. Raskazvajem
Zaŭvaha ŭ sacsietkach pryciahnuła ŭvahu dziaržaŭnych prapahandystaŭ da bara «Kalinoŭski». Ciapier jany patrabujuć zakryćcia «rusafobskaj zabiahałaŭki».
«Voś u hetuju ŭstanovu ŭ horadzie Minsku nas nie puścili pa nacyjanalnaj prykmiecie», — padpisaŭ rolik u Tyktoku Nurłan Safaralijeŭ, adznačyŭšy, što achoŭnik pahražaje i hruba siabie pavodzić.
Vot Vam i tolerantnosť o kotoroj vsie kričat)
Safaralijeŭ — azierbajdžaniec, jaki žyvie ŭ Minsku. Skončyŭ fakultet mižnarodnych adnosin BDU, ciapier, jak paznačaje sam Nurłan, «IT-raspracoŭščyk na fryłansie, pierakładčyk i trenier pa boksie». U jaho sacsietkach lezhinka, fota z kaljanam i «hłybokija dumki».
Dniami Safaralijeŭ ź siabrami chacieŭ naviedać bar «Kalinoŭski» na Zybickaj. Nie ŭdałosia — achoŭnik Nurłana ŭnutr nie puściŭ. Chłopiec pakryŭdziŭsia na heta ŭ sacsietkach, dadaŭšy, što pryčynaj nibyta stała jaho nacyjanalnaść.
Ščyra kažučy, z karotkaha videa Nurłana niezrazumieła, u čym byŭ kanflikt pamiž kampanijaj Safaralijeva i achovaj. Praŭda, čuvać, jak achoŭnik abiacaje zasunuć «kudyści» chłopcu jaho telefon.
Dyk a što zdaryłasia?
Dazvaniŭšysia pa adnym z numaroŭ, paznačanych jak kantakty bara «Kalinoŭski», karespandent «Našaj Nivy» paprasiŭ pradstaŭnikoŭ bara prakamientavać historyju. Surazmoŭca paprasiŭ źviazacca ź im paźniej, paśla čaho pierastaŭ vychodzić na suviaź.
Ale ž u toj ža viečar u instahramie bara «Kalinoŭski» źjaviŭsia post z vybačeńniami. Pavodle jaho, achoŭnik byŭ zvolnieny.
«Naša Niva» źviazałasia z Safaralijevym i jaho siabram, kab pačuć ich viersiju padziej. Chłopcy skazali, što pakul nie hatovyja davać kamientary. Adznačyli tolki, što nie chacieli b niejkich niehatyŭnych nastupstvaŭ dla bara i jaho rabotnikaŭ.
Voś tolki vyhladaje, što niehatyŭnyja nastupstvy ŭžo nie spynić. Bo Azaronak i inšyja prapahandysty schapilisia na hetuju historyju. Patrabujuć, jak zvyčajna, zakryćcia i aryštaŭ.
«Biełarusy nie majuć namieru tryvać nacyjanalistyčnuju, antyprezidenckuju, rusafobskuju zabiahałaŭku i čakać «piŭnoha putču». Moładzievy parłamient adpraviŭ aficyjny zvarot adkaznym tavaryšam z patrabavańniem nieadkładna zakryć hetuju dreń.
A kiraŭniki lubimaj ustanovy Matolki, jakija pravodziać palityku dyskryminacyi pa nacyjanalnaj prykmiecie, na moj pohlad, dobra b hladzielisia na fonie dźviarej, — napisaŭ u svaim kanale Azaronak, namiakajučy na «pakajalny kabiniet» palityčnaj palicyi. —
Uličvajučy hramadskuju značnaść, spadziajusia, što papiarovaj ciahaniny i biurakratyi nie budzie».
Da ŭpaŭnavažanaha pa spravach relihij i nacyjanalnaściaŭ imhnienna adpravili list z BRSM! Čaho prosiać? Taksama zakryć bar.
Tut varta adznačyć, što «Kalinoŭski» — typovaja ŭstanova staličnaj tusovačnaj vulicy Zybickaj. Kaktejli, papsa, tancy. Tak, spačatku sacsietki bara vialisia na biełaruskaj, pravodzilisia cikavyja pijar-akcyi, naprykład, «Kalinoŭski» razam z vydaviectvam «Halijafy» zaprašaŭ prydumać recept kaktejla, jaki zhadvajecca ŭ knizie Kiryła Stasielki.
Ale ŭžo daŭno i sacsietki rusifikavalisia, i pra biełaruščynu ŭ «Kalinoŭskim» nahadvaje tolki nazva. Budziem ščyrymi: kali b bar sapraŭdy niejak prasoŭvaŭ biełaruskaść, u siońniašnija ludažornyja časy ŭłady jaho b daŭno zakryli. Navat u videa Safaralijeva čuvać, jak u bary hučna hraje pieśnia Marhienšterna pra «Kadziłak».
Voś tolki łukašenkaŭskich prapahandystaŭ užo nie spynić. Jany nakinulisia na bar — i vyhladaje, što dla nianaviści im užo dastatkova jakraz tolki biełaruskaj nazvy.
«Histaryčny piersanaž zaklikaŭ u svaich prakłamacyjach «viešać maskalskich papoŭ», nacysckija šturmaviki z bataljona jahonaha imia pahražajuć zładzić vajnu ŭ Biełarusi, a kiraŭnictva bara, nazvanaha ŭ honar hetaha piersanaža, vykidvaje ludziej «nie toj źniešnaści». Pry hetym achoŭniki pavodziać siabie nie lepš za polskich šlachcicaŭ — viadomych bydlakoŭ (čytaj «Tarasa Bulbu»), — piša Azaronak. —
Viadoma, što dadzienaja ŭstanova była «kultavaj» va ŭsich tych, kaho ciapier pryznali ekstremistami i terarystami.
Dakul?»
Nahadajem, što ŭ 2019-m na pachavańnie pareštkaŭ Kalinoŭskaha ŭ Vilni jeździła aficyjnaja biełaruskaja delehacyja na čale ź vice-premjeram Iharam Pietryšenkam.
Tym časam učora z bara prybrali šyldu z nazvaj «Kalinoŭski».
Kamientary