«Nie zachacieŭ davać pakazańni na inšych». Što viadoma pra naftanaŭca, jaki zasiliŭsia praź cisk siłavikoŭ
Žychar Połacka i były ŭdzielnik zabastoŭki Uładzimir Krysionak 30 maja skončyŭ žyćcio samahubstvam. Pierad hetym jaho zatrymlivali siłaviki: prymušali dać pakazańni i pahražali vialikim terminam u kałoni.
Uładzimir žyŭ u Połacku, pracavaŭ na navapołackim «Naftanie» apierataram ustanoŭki deparafanizacyi. Da 2020 hoda palityčnaj aktyŭnaści nie prajaŭlaŭ. Ale ŭvosień paśla vybaraŭ dałučyŭsia da stački, zatym staŭ aktyŭnym udzielnikam niezaležnaha prafsajuza, navat byŭ na pasadzie staršyni.
Paśla sychodu z «Naftana» niejki čas Krysionak jeździŭ na pracu ŭ Rasiju.
«Kali pačałasia vajna, jon viarnuŭsia. Akazvajecca, jaho jašče tady na niejki čas zatrymali biełaruskija siłaviki, ale paśla adpuścili», — raskazvajuć ludzi, znajomyja ź situacyjaj.
Mahčymaść źjechać ź Biełarusi ŭ mužčyny była, kažuć surazmoŭcy, ale Uładzimir nie chacieŭ.
Apošnim časam jon žyŭ adzin, z žonkaj raźvioŭsia.
«U jaho maci vialikaja haspadarka na leciščy za horadam, jon tam dapamahaŭ.
Apošnim časam jon vielmi zamknuŭsia ŭ sabie. Ciažka pieražyvaŭ toje, što adbyvajecca, byli ŭpadnickija nastroi. Pieražyvaŭ i pra toje, što dziejecca ŭ Biełarusi, i što va Ukrainie pačałasia vajna,
— kažuć surazmoŭcy «Našaj Nivy». — A 24 maja pa jaho pryjšli siłaviki.
Čamu i dzie zatrymali Uładzimira, dakładna nie viadoma. Ale kažuć, što siłaviki na jaho cisnuli: prymušali dać na kahości pakazańni. Kali admovicca, pahražali, što siadzie na 12 hadoŭ. Ale mužčyna nie chacieŭ paklopničać».
U vyniku Uładzimir vyjšaŭ pad padpisku ab niavyjeździe. U jakim statusie (padazravanaha, śviedki ci kaho jašče), infarmacyi niama.
Praź dzień paśla vychadu jon paviesiŭsia na matčynym leciščy ŭ vioscy Hlinišča.
Uładzimiru Krysionku byŭ 41 hod. Biez baćki zastalisia dźvie dački, adna ź ich niepaŭnaletniaja.
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii36
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii
U jakoj raźviedki była najlepšaja infarmacyja ź Biełarusi ŭ lutym 2022 i chto paviedamiŭ Budanavu, što asnoŭny ŭdar rasijan budzie na Hastomiel. Źjaviłasia vialikaja publikacyja2020
Kamientary