«Budzie baleć» — ščyry i emacyjny sieryjał pra miedycynu. Vielmi dobry
«Doktar Chaus», «Klinika», «Dobry doktar» — było ŭžo niamała dobrych miedycynskich sieryjałaŭ. Tym nie mienš, kanał BBC One ryzyknuŭ i prezientavaŭ siem sieryj kamiedyjnaha sieryjała «Budzie baleć» (This Is Going to Hurt), pryśviečanaha budniam maładoha doktara ŭ brytanskim špitali. Miarkujučy pa rejtynhach, supierudała.
«Budzie baleć» — adaptacyja knihi-dziońnika Adama Kieja, byłoha hiniekołaha adnoj ź dziaržaŭnych balnic u Brytanii. Scenaryj dla sieryjała stvaryŭ sam Kiej, jaki niekali syšoŭ z balničnych kalidoraŭ u śfieru telebačańnia.
U vyniku vyjšła stužka, što abjadnoŭvaje ŭ siabie jakaści jak kamiedyi, tak i dramy. Spačatku źviartaješ uvahu na kamiedyjny składnik sieryjała, i heta zakanamierna. Zychodny materyjał dla «Budzie baleć» — napoŭnienyja žartami miemuary Kieja, dy i sam jon paśla miedycyny najbolš pracuje ŭ śfiery humaru i stendapu, piša Empire.
Ale pry hetym Kiej pieratvaraje ŭłasnyja dziońnikavyja zapisy ŭ šmatuzroŭnievy dramatyčny sieryjał. Heta adnačasova i pryznańnie ŭ kachańni da brytanskaj Słužby achovy zdaroŭja, i hłybokaja saha ab adnosinach, i partret čałavieka na miažy, jaki adčajna sprabuje trymać siabie pad kantrolem i pry hetym štodzionna vyratoŭvaje žyćci inšych ludziej. Hieroi sieryjała vymušanyja pracavać ź vielmi, vielmi vialikaj kolkaściu pacyjentaŭ, niahledziačy na stomu, ad jakoj časam zasynajuć u mašynie.
U hałoŭnaj roli — brytaniec Ben Uišaŭ, viadomy pa filmie «Parfuma: historyja adnaho zabojcy» i pa roli Kju ŭ troch apošnich stužkach sahi pra Džejmsa Bonda.
U «Budzie baleć» Uišau demanstruje pieršakłasnuju ihru: jon sumiaščaje niastomny sarkazm z abajańniem, kali hutaryć z pacyjentami, ale pry hetym doktar u vykanańni Uišaŭ ledźvie nie pierachodzić da sadyzmu, kali vučyć małodšaha kalehu. Doma piersanaž nie zdolny dzialicca z partnioram ciažkimi detalami svajoj pracy, zatoje jon časam raspaviadaje samaje patajemnaje publicy, hledziačy pry hetym prosta ŭ kamieru — i heta adny z samych śmiešnych momantaŭ u sieryjale.
Ale ž jość u «Budzie baleć» i šmat dramatyzmu — uziać chacia b skarhu pacyjenta na hałoŭnaha hieroja, jaki nibyta złoŭžyvaje słužbovym stanoviščam, hetaja historyja budzie trymać vas u napružańni. A adna ź sieryj pryśviečanaja mierkavanamu vypadku chatniaha hvałtu, i heta sapraŭdny maleńki šedeŭr, stvorany ź vialikim kłopatam i spačuvańniem.
Navat hetaja kranalnaja sieryja nie padrychtuje vas da emacyjanalnych amierykanskich horak bližej da kulminacyi sieryjała. Padrychtujciesia: vam sapraŭdy budzie baleć.
Rejtynhi na vialikich suśvietnych resursach:
IMDB — 8,4/10,
Rotten Tomatoes — 93%.
Indyjskaje kino, rasijskija ahitki, ale jość i redkija załacinki. Jakaja situacyja ciapier u kinateatrach
Što pahladzieć. «Leśvica» — zachaplalnaja sudovaja drama z Kolinam Fiortam
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary