Biełaruski prapahandyst Andrej Kryvašejeŭ u efiry pieradačy «Kłub redaktaraŭ» vydaŭ: «Polšča pastupova akupuje Ukrainu». I dadaŭ, što palaki nibyta zmohuć pracavać va Ukrainie sudździami.
«Ciapier režym Zialenskaha raspłačvajecca apošnim ukrainskim familnym srebram za pustyja abiacańni i impierskija ambicyi polskaj ułady. Niadaŭna źjaviłasia infarmacyja, što Ukraina pieradaje ŭ Polšču zavod «Motor Sič» razam z usim kalektyvam. 400 čałaviek, jak raboŭ, adpraŭlajuć u Varšavu, kab budavać tam viertalotnuju vytvorčaść. Nie kažučy ŭžo pra zakon, jaki praduhledžvaje, pa sutnaści, asadnictva, kali polskija hramadzianie va Ukrainie buduć karać i miłavać. Heta poŭnaja akupacyja niaščasnaj Ukrainy. Prezident absalutna maje racyju: pryjdzie čas, kali Biełarusi i Rasii daviadziecca abaraniać niaščasnych ukraincaŭ», — skazaŭ Andrej Kryvašejeŭ.
Što tyčycca viertalotnaha zavoda: havorka idzie pra stvareńnie ŭ Polščy sumiesnaha ŭkrainska-polskaha pradpryjemstva pa vytvorčaści i ramoncie viertalotaŭ. Hetamu prajektu ŭžo bolš za dva hady, jon płanavaŭsia jašče da vajny. Pa-druhoje, ukraincy i praŭda vynosiać častku vytvorčaści svajoj abaronki ŭ Zachodniuju Ukrainu i za miažu, ale vyklikana heta ŭ pieršuju čarhu tym, što Rasija — u tym liku z terytoryi Biełarusi — bambić Ukrainu, u tym liku i zavody.
Nahadajem, «Motar Sič» znachodzicca ŭ Zaparožžy, nie tak daloka ad linii frontu. Na terytoryju zavoda ŭžo prylatali rasijskija rakiety. Całkam naturalna, što ŭkraincy va ŭmovach ahresii buduć raźmiaščać svaje stratehičnyja pradpryjemstvy ŭ biaśpiečnym miescy. Tak dziejničała b lubaja kraina, jakaja viadzie abarončuju vajnu.
Nakont «zakona, jaki praduhledžvaje, pa sutnaści, asadnictva, kali polskija hramadzianie va Ukrainie buduć karać i miłavać» — tut Kryvašejeŭ, pa sutnaści, paŭtaraje fejk rasijskaj prapahandy pra toje, što va Ukrainie nibyta pryniali zakon, jaki dazvolić hramadzianam Polščy stanavicca sudździami va Ukrainie. Jaho prosta nie isnuje.
Va Ukrainie sapraŭdy źbirajucca pryniać zakon ab pašyreńni mahčymaściaŭ dla hramadzian Polščy va Ukrainie. Ale jon budzie simvaličnym aktam, anałaham zakona, jaki pryniali ŭ Polščy, ab padtrymcy hramadzian Ukrainy. Zakon usio jašče raspracoŭvajecca ukrainskim Ministerstvam zamiežnych spraŭ.
Zajavy ab tym, što hramadzianie Polščy va Ukrainie zmohuć pracavać sudździami, słužyć u vojsku i śpiecsłužbach, buduć dapuščanyja da dziaržaŭnaj tajamnicy — čystaja chłuśnia.
Dezynfarmacyjaj źjaŭlajecca i zajava rasijskich kanśpirołahaŭ i prapahandystaŭ ab tym, što polskaja palicyja zmoža vykonvać svaje funkcyi na terytoryi Ukrainy — u jakaści dokazaŭ pryvodzicca tolki ananimny skrynšot ź niejkaha kanała ŭ telehramie.
Materyjały ŭ rasijskich ŚMI albo ŭ prarasijskich błohieraŭ ab tym, što Polšča nibyta rychtuje anieksiju albo zachop častki terytoryi Ukrainy, pačali raspaŭsiudžvacca pačynajučy z 2014 hoda. Ale pakul što adzinaja kraina, jakaja akupoŭvaje ŭkrainskija terytoryi, — sama Rasija. Takim čynam rasijskaja prapahanda ŭsiaho tolki ekstrapaluje na Polšu ŭłasnyja płany i śvietapohlad adnosna Ukrainy.
Rasijski palityk Žyrynoŭski adkryta prapanoŭvaŭ Polščy padzialić Ukrainu ŭ 2014 hodzie. Z anałahičnaj, tolki bolš zavualavanaj prapanovaj da Polščy, źviartaŭsia Uładzimir Pucin. Ale Polšča padtrymlivaje suvierenitet i cełasnaść Ukrainy.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie28
Kamientary