Druhaja hadavina śmierci Tarajkoŭskaha, a pomnika na mahile niama — u čym reč?
10 žniŭnia 2020 hoda ŭ Minsku la stancyi mietro «Puškinskaja» u chodzie pratestaŭ byŭ zabity Alaksandr Tarajkoŭski — jon staŭ pieršaj achviaraj ź liku mirnych demanstrantaŭ. Staršynia SK pryznaŭ, što mužčyna byŭ zastreleny siłavikami, ale nijakaj kryminalnaj spravy z hetaj nahody zaviedziena nie było. Biełarusy, što pryjšli na miesca pachavańnia Tarajkoŭskaha na Zachodnich mohiłkach na druhuju hadavinu śmierci, zaŭvažyli, što pomnika tam pakul niama.
Jak nam raspaviali svajaki Alaksandra Tarajkoŭskaha, jany vielmi chacieli, kab pomnik užo stajaŭ 10 žniŭnia 2022-ha, ale firma-vytvorca zaciahnuła z terminami.
«Uvohule, my vielmi doŭha vybirali, jakim pomnik budzie. Nichto ž u hetym nie raźbirajecca asabliva… Spačatku abmiarkoŭvali adzin prajekt: takuju skulpturu — nibyta Sašynu dušu, jakaja ŭźlataje. Ale prapanavanaja skulptara była zališnie ambicyjnaj, skažam tak. I chaciełasia lohkaści, tamu my spynilisia na varyjancie z kryžam i hartavanym škłom, pad jakim budzie źmieščany fotazdymak Sašy.
My čakali, što buduć pytańni nakont pomnika (raniej nieabyjakavyja hramadzianie skidvalisia ŭ tym liku na jaho ŭstanoŭku. — NN), samim niazručna i chaciełasia paśpieć da 10 žniŭnia. Ale nam abiacajuć, što voś-voś usio budzie hatova i zojmiemsia ŭžo ŭstanoŭkaj», — raskazvajuć blizkija Alaksandra.
Na zaciahvańnie terminaŭ taksama paŭpłyvała žadańnie znajści maksimalna vyhadny ŭ płanie koštu varyjant i techničnyja niuansy. Abranaja firma prystupiła da realizacyi na pačatku zimy. Prajekt z kryžam, jaki ŭchvalili ŭsie svajaki, abyšoŭsia siamji, pa ich słovach, amal u piać tysiač dalaraŭ. Dazvolić jaho sabie jany zmahli ŭ tym liku, dziakujučy finansavaj dapamozie nieabyjakavych biełarusaŭ, jakim vykazvajuć udziačnaść.
Pomnik Tarajkoŭskamu zamaŭlaŭsia z raźlikam na dva miescy, ale druhoje pavinna było prosta być azdoblenaje plitkaj.
«Nichto nie čakaŭ, što baćka Sašy tak chutka pamre, ale jamu stavić pomnik pakul rana», — kamientujuć svajaki (Valeryj Tarajkoŭski pamior 26 maja i byŭ pachavany pobač z synam na Zachodnich mohiłkach u Minsku. — NN).
Čytajcie taksama:
Dva hady paśla vybaraŭ-2020. Pra što varta pamiatać
-
«Zarobak u try razy vyšejšy, čym doma». Biełarus raskazaŭ, jak papracavaŭ u Jehipcie na budaŭnictvie AES
-
«Dzied budzie hladzieć asabista. Kali jamu spadabajecca…» Ziankovič raskazaŭ, jak ź im zapisvali pieršaje intervju ŭ SIZA KDB
-
U minskim «Jeŭraopcie» ŭ adździele vypiečki pakłali pakiety dla śmiećcia
Ciapier čytajuć
«Dzied budzie hladzieć asabista. Kali jamu spadabajecca…» Ziankovič raskazaŭ, jak ź im zapisvali pieršaje intervju ŭ SIZA KDB10
Kamientary
Chłopiec žyćcio pakłaŭ, a zamiest ŭstalavańnia kryža pravodziacca bankiety z partfielami.