The New York Times: Płan kontrnastupleńnia Ukrainy ŭ Charkaŭskaj vobłaści dapamahali raspracoŭvać ZŠA i Vialikabrytanija

Jak piša hazieta, padrychtoŭka nastupleńnia pačałasia paśla taho, jak Zialenski paviedamiŭ ukrainskim hienierałam, što choča prademanstravać, što jaho kraina moža supraćstajać rasijskamu ŭvarvańniu.

Pieršapačatkova USU raspracavali płan nastupleńnia na poŭdni krainy, što pavinna było viarnuć Chierson i adrezać Maryupal ad rasijskich vojskaŭ na ŭschodzie. Adnak i ŭkrainskija, i amierykanskija ekśpierty pryjšli da vysnovy, što takaja apieracyja paciahnie vielizarnyja straty i moža nie pryvieści da chutkaha viartańnia terytoryj.

Paśla hetaha, jak piša NYT, ukrainskaje kamandavańnie stała bolš aktyŭna dzialicca svaimi płanami z amierykanskaj i brytanskaj raźviedkaj i źviartacca da ich pa paradu. Pa słovach krynic haziety, płany pa nastupleńni niekalki razoŭ abmiarkoŭvaŭ savietnik pa nacyjanalnaj biaśpiecy ZŠA Džejk Salivan z kiraŭnikom ofisa prezidenta Ukrainy Andrejem Jermakom, a staršynia Abjadnanaha kamiteta načalnikaŭ štaboŭ Mark Mili rehularna havaryŭ z ukrainskim kamandavańniem pra raźviedźviestki i vajennuju dapamohu. U Kijevie pačali prachodzić štodzionnyja sustrečy ŭkrainskich vyšejšych aficeraŭ z brytanskimi i amierykanskimi vajskoŭcami.

Aŭtary płana ličyli, što nastupleńnie nieabchodna pravieści da pačatku zimy, kali va Uładzimira Pucina źjavicca mahčymaść cisnuć na Jeŭropu pry dapamozie hazu.

U žniŭni pa prośbie Kijeva Vašynhton staŭ bolš aktyŭna pieradavać raźviedźviestki pra pazicyi rasijskich vojskaŭ i šukać ich słabyja miescy. Analiz raźvieddanych pakazaŭ, što Maskva naŭrad ci zmoža chutka ŭmacavać pazicyi na paŭnočnym uschodzie, navat kali zaŭvažyć padrychtoŭku Ukrainy da nastupleńnia.

«My bačyli, što rasijanie faktyčna pieramiaścili značnuju častku svaich najlepšych sił na poŭdzień u miežach padrychtoŭki da inšaha kontrnastupleńnia», — kaža namieśnik kiraŭnika Pientahona Kolin Kal.

U vyniku Ukraina padrychtavała płan, jaki praduhledžvaje dva nastupleńni — pad Chiersonam i pad Charkavam. Hetym razam i ŭ Łondanie, i ŭ Vašynhtonie, i ŭ Kijevie pahadzilisia z tym, što nastupleńnie pavinna być paśpiachovym. Jašče bolšaj upeŭnienaści ŭ pośpiechu apieracyi Kijevu dadali rehularnyja pastaŭki amierykanskaj zbroi, kažuć krynicy NYT.

Pośpiech nastupleńnia ŭ Charkaŭskaj vobłaści prademanstravaŭ niedachop jakasnych raźvieddanych u rasijskaj armii, jakaja nie zmahła svoječasova vyjavić naroščvańnie siłaŭ USU, kažuć krynicy haziety. Jany adznačajuć, što z-za adstupleńnia ŭ rasijskaj armii źjavilisia prablemy z zabieśpiačeńniem, dziakujučy jakim u najbližejšyja tydni ŭ Ukrainy mohuć uźniknuć novyja mahčymaści dla nastupleńnia.

Niahledziačy na pośpiech na ŭschodzie Ukrainy, čynoŭniki i ŭ Vašynhtonie, i ŭ Kijevie ličać najbolš važnym toje, što adbyvajecca na poŭdni. Tam, jak i čakałasia, kontrnastupleńnie ruchajecca značna pavolniej z-za značna bolšaj kolkaści rasijskich vojskaŭ. Adnak pačatak apieracyi dazvoliŭ adkłaści mahčymaje hałasavańnie ab dałučeńni Chiersona da Rasii.

• 20
• 0
• 0
• 2
• 0
• 1
• 3
• 0