Zapuścili marafon ahučvańnia tvoraŭ Janki Kupały. U im moža paŭdzielničać kožny, i hetym prynieści praktyčnuju karyść
U ramkach śviatkavańnia 140-hodździa z dnia naradžeńnia paeta Janki Kupały inicyjatyva say.by zapuściła cikavy prajekt. Usim achvotnym prapanujecca z dapamohaj śpiecyjalnaha sajta zapisać svaim hołasam luby tvor paeta. Jak rastłumačyli stvaralniki inicyjatyvy, takim čynam jany sprabujuć sabrać moŭnuju bazu, kab u budučyni technałohii mahli pracavać z karystalnikami pa-biełarusku, piša «Anłajnier».
Sučasnyja technałohii dajšli da takoha ŭzroŭniu, što časam navat nie treba davać zapyt ci kamandy z dapamohaj kłavijatury. Zapuścić pracu mašyny možna hołasam, a zamiest korpańnia ŭ encykłapiedyjach — pahutaryć z hałasavymi pamočnikami nakštałt «Alisy» ci Siri i davoli chutka atrymać adkaz na nieabchodnaje pytańnie.
Jak raspaviali stvaralniki inicyjatyvy say.by, jany chočuć, kab našy suajčyńniki ŭ budučyni mahli razmaŭlać z servisami nie tolki pa-rusku, ale i na biełaruskaj movie. Adnak dla hetaha treba stvaryć davoli vialikuju moŭnuju bazu z zapisam hałasoŭ roznych ludziej, što dazvolić kampjutaru pavysić jakaść raspaznavańnia.
— Janku Kupału abrali dla marafonu ŭ tym liku, kab było cikaviej. My možam z roznych hałasoŭ skłaści cełyja vieršy i pasłuchać, jak jany hučać u vykanańni ludziej, što žyvuć u roznych kutkach Biełarusi. Čelendž praciahniecca jašče 39 dzion, — raskazali arhanizatary prajekta.
Za pieršy tydzień u marafonie (a jon užo treci) paŭdzielničała 3 tysiačy čałaviek. U tym liku supracoŭniki bujnych biełaruskich arhanizacyj nakštałt «Alivaryi», «A-100» i 21vek.
Kali da hetaj spravy chočacie dałučycca i vy, prachodźcie pa spasyłcy na sajt donar.by. Pakinuć zapis vielmi lohka. Treba tolki nacisnuć na značok z vyjavaj mikrafona i začytać vierš Janki Kupały. Tam ža možna pasłuchać i zapisy, jakija ŭžo atrymalisia.
Pažadana, kab padčas ahučvańnia vaš hołas hučaŭ naturalna, nibyta adbyvajecca zvyčajnaja razmova.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary