«Zabaraniajecca ŭsialaki rost cen». Na 29-m hodzie kiravańnia Łukašenka prydumaŭ, jak spynić inflacyju
Alaksandr Łukašenka rasparadziŭsia z 6 kastryčnika ŭvieści zabaronu na pavyšeńnie cen u krainie. Vyklučeńni mohuć być, ale tolki z dazvołu vysokich čynoŭnikaŭ, sychodzić z rynku praz straty nielha — «nieadkładnaje zatrymańnie i kryminalnuju spravu zavodzić».
Padčas narady z ekanamičnym błokam Alaksandr Łukašenka raskrytykavaŭ urad za inflacyju. «Situacyja ŭ vyniku zapatrabavała ŭmiašańnia kiraŭnika dziaržavy», — piša Biełta.
Pa vynikach narady Łukašenka ahučyŭ svajo rašeńnie:
«Z 6 čysła [kastryčnika] zabaraniajecca ŭsiaki rost cen. Za-ba-ra-nia-jecca! Ź siońniašniaha dnia. Nie z zaŭtrašniaha dnia, a ź siońniašniaha. Kab za sutki nie nakrucili ceny. I kryj boža chtości pa buchhałteryi praviadzie zadnim čysłom niešta, niejkija raźliki, pieraraźliki», — skazaŭ Łukašenka.
Adnak jon dazvoliŭ vyklučeńni i vyznačyŭ koła adkaznych, chto ŭpaŭnavažany prymać takija rašeńni. «Kali budzie pryniataje rašeńnie ministra (antymanapolnaha rehulavańnia i handlu, — NN) abo staršyń abłvykankama, Minskaha harvykankama. Bieź ich rašeńnia nijakaja cana pryrastać nie moža da taho, što jość na siońniašni dzień», — rasparadziŭsia jon.
Łukašenka taksama pryhraziŭ represijami, kab na hetym fonie nie było zakryćcia abjektaŭ i sprob syści z rynku.
«Nie daj boh, niejkaja krama sydzie abo jana budzie zakrytaja, niejkaja kantora, zabiahałaŭka i inšyja. Nie daj boh, jany syduć z rynku. Vy za heta adkažacie», — papiaredziŭ jon.
Za vykanańniem daručeńnia jon daručyŭ sačyć najpierš hienieralnamu prakuroru i staršyni Kamiteta dziaržkantrolu.
«Nieadkładnaje zatrymańnie i kryminalnuju spravu ŭzbudžać, — skazaŭ jon. — Heta prakuror z Kamitetam dziaržkantrolu vyznačać, što rabić. Pa ŭsioj viertykali — chto dapuściŭ parušeńnie ŭstanoŭlenaha mnoju paradku i chto sadziejničaŭ hetamu abo chto «prašlopaŭ», — zapatrabavaŭ jon.
Źviartajučysia da pieršaha vice-premjera Mikałaja Snapkova, Łukašenka paraiŭ z 6 kastryčnika ceny nie tolki nie pavyšać, ale i, naadvarot, znajści mahčymaść ich panižeńnia. «Lepš za ŭsio, raju vam ceny panizić», — skazaŭ jon.
Z takimi zajavami, jak siońnia, Alaksandr Łukašenka vystupaje pieryjadyčna. Heta nijak nie ŭpłyvaje na ekanamičnuju realnaść. Jak padličyła «Naša Niva», za čas kiravańnia Łukašenki biełaruski rubiel abiasceniŭsia ŭ 6580 razoŭ, heta značyć, na 658000 pracentaŭ. Rost cen prykładna supadaje z hetaj ličbaj.
Na toj ža naradzie staršynia Fiederacyi prafsajuzaŭ Michaił Orda prapanavaŭ vyznačyć ceny i dla pryvatnych pradpryjemstvaŭ.
«Ceny na pradukcyju našych dziaržaŭnych pramysłovych, sielskahaspadarčych pradpryjemstvaŭ abmiažoŭvajucca. Im, kab niešta padniać, treba prajści ŭzhadnieńni i atrymać dazvoł. A pryvatniki, jakija im pastaŭlajuć tyja ž zapčastki, abstalavańnie i kamplektujučyja abo akazvajuć niejkuju pasłuhu, dziejničajuć absalutna jak zachočuć i ŭstanaŭlivajuć niejkija svaje ceny. Kuplajuć dołary na biržy pa 2,5 rubla, a ŭ ceny zakładvajuć toj ža dołar na paradak daražejšy. I zaŭsiody ŭ ich jość apraŭdańni: niejkija mifičnyja ryzyki, łahistyka i hetak dalej», — skazaŭ Michaił Orda.
Jon prapanavaŭ ustanavić «dakładnyja praviły hulni ŭ cenaŭtvareńni dla ŭsich».
«Chto nie choča padparadkoŭvacca ahulnym praviłam — takich treba prybirać z rynku. Na rynku pavinna być dakładnaja, zrazumiełaja dyscyplina absalutna dla ŭsich. Zastaniecca toj, chto dobrasumlenna pavodzić siabie ŭ biznesie. A tyja, chto raściahvaje rynak i pracuje, pa sutnaści, u cieniavym biznesie, prosta syduć», — zajaviŭ Orda.
Łukašenka z hetym pahadziŭsia.
«Pravilna jon kaža: nie vykonvaješ praviła, jakoje ŭstanavili, — preč z rynku, — skazaŭ jon. — Ja heta bačyŭ 25 hadoŭ tamu. Ja mieŭ racyju. My kaho baimsia? U nas pad kantrol možna ŭziać absalutna luby praces, kali jość žadańnie».
Ciapier čytajuć
U budynku HUBAZiKa ŭ centry Minska adkryjuć małuju scenu teatra Janki Kupały11
Kamientary
Hety ... tak i nie zrazumieŭ za amal 30 hadoŭ - ekanomika zahadvaje, a nie naadvarot