Chto taki Z-błohier Illa Ramiasło, jakoha zatrymali za «fejki» pra rasijskuju armiju?
Dahetul paśla krytyki Pucina jaho źmiaščali ŭ psichijatryčnuju balnicu.
U Sankt-Pieciarburhu zatrymali rasijskaha błohiera i jurysta Illu Ramiasło. Suprać jaho raspačali kryminalnuju spravu pavodle artykuła ab «publičnym raspaŭsiudzie zaviedama iłžyvaj infarmacyi» pra rasijskuju armiju.
Jašče niekalki miesiacaŭ tamu taki scenar vyhladaŭ amal nievierahodnym. Uradženiec Nalčyka Illa Ramiasło byŭ adnym z samych viadomych prakramloŭskich błohieraŭ i jurystaŭ. Šyrokuju viadomaść jon atrymaŭ dziakujučy šmathadovaj baraćbie z Alaksiejem Navalnym i Fondam baraćby z karupcyjaj. Mienavita jaho jurydyčnyja skarhi nieadnarazova stanavilisia padstavaj dla pravierak i kryminalnych spraŭ suprać rasijskaj apazicyi.
U roznyja hady Ramiasło byŭ členam Hramadskaj pałaty Rasii, rehularna vystupaŭ na dziaržaŭnych miedyja i ličyŭsia adnym z samych aktyŭnych prapahandystaŭ Kramla. Jaho časta nazyvali prafiesijnym danosčykam za sistematyčnyja zvaroty ŭ siłavyja orhany suprać palityčnych apanientaŭ ułady.
Rasijski apazicyjny palityk Illa Jašyn, jaki ŭ 2022—2024 hadach adbyvaŭ pakarańnie pavodle taho ž artykuła pra «fejki» ab rasijskaj armii, acharaktaryzavaŭ Ramiasło tak:
«Heta nie prosta kramloŭski prapahandyst i Z-błohier. Heta prafiesijny stukač, musar biez pahonaŭ, pa danosach jakoha rehularna zavodzilisia kryminalnyja spravy suprać ludziej, pravodzilisia pieratrusy i vynosilisia prysudy».
Adnak viasnoj 2026 hoda Ramiasło niečakana źmianiŭ svaju pazicyju. 11 sakavika jon vystupiŭ z krytykaj partyi «Adzinaja Rasija», abvinavaciŭšy jaje ŭ palitycy zabaronaŭ, i zajaviŭ, što nie padtrymaje jaje na vybarach u Dziaržaŭnuju dumu ŭ vieraśni. Taksama Ramiasło zaklikaŭ pravieści «narmalnyja» i «sumlennyja» vybary.
17 sakavika jon apublikavaŭ manifiest «Piać pryčyn, pa jakich ja pierastaŭ padtrymlivać Uładzimira Pucina».
U svaim tekście Ramiasło nazvaŭ vajnu z Ukrainaj tupikovaj, zajaviŭ pra razbureńnie rasijskaj ekanomiki, udušeńnie svabody słova i praźmierna doŭhaje znachodžańnie prezidenta pry ŭładzie.
Nieŭzabavie paśla hetaha błohiera prymusova źmiaścili ŭ psichijatryčnuju balnicu. Paśla vypiski praź miesiac jon nie admoviŭsia ad svaich słovaŭ i praciahnuŭ krytykavać rasijskija ŭłady.
Tak, u intervju Ksienii Sabčak Illa Ramiasło skazaŭ, što hałoŭnaja pryčyna prablem u Rasii — nie asobnyja čynoŭniki ci struktury, a čałaviek na viaršyni ŭłady, jaki kiruje ŭsioj sistemaj — Pucin. Jon śćviardžaje, što mnohija heta razumiejuć, ale bajacca adkryta skazać.
Taksama Ramiasło zajaviŭ, što nie škaduje pra svaje papiarednija vykazvańni i maje namier praciahvać dziejnaść u tym ža kirunku. Jon navat nazvaŭ siabie kiraŭnikom apazicyjnaha ruchu Rasii.
17 lipienia stała viadoma, što siłaviki zatrymali Ramiasło ŭžo ŭ ramkach kryminalnaj spravy ab «fejkach» pra rasijskuju armiju (častka 2 artykuła 207.3 Kryminalnaha kodeksa Rasijskaj Fiederacyi). Pavodle jaho advakata, u błohiera prajšli pieratrusy, paśla čaho jaho pavieźli ŭ Maskvu dla abrańnia miery strymańnia.
Artykuł 207.3 Kryminalnaha kodeksa Rasii byŭ uviedzieny paśla pačatku poŭnamaštabnaha ŭvarvańnia va Ukrainu i staŭ adnym z hałoŭnych instrumientaŭ kryminalnaha pieraśledu praciŭnikaŭ vajny. Pavodle jaho raspačali sotni kryminalnych spraŭ suprać žurnalistaŭ, aktyvistaŭ, municypalnych deputataŭ i inšych krytykaŭ rasijskaha ŭvarvańnia. Ciapier pad dziejańnie taho ž zakona trapiŭ čałaviek, jaki jašče niadaŭna sam byŭ adnym z najbolš zaŭziatych abaroncaŭ rasijskaj ułady.
Ciapier čytajuć
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ5
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1818
Kamientary