Psieŭdaśmiatana, pradukt z vodaram syru i imitacyja zhuščonki. Jakija pradukty-surahaty pradajuć u kramach
Mnohija siemji pryzvyčailisia ekanomić — i hetym udała karystajucca «vytvorcy-imitatary». «Naša Niva» pahladzieła, jakija surahaty prapanujuć pakupnikam na palicach biełaruskich kram. Što cikava, raniej vytvorčaściu takoj pradukcyi ŭ asnoŭnym zajmalisia rasijskija kampanii, ale ź ciaham času na rynku źjaŭlajecca ŭsio bolš biełaruskich hulcoŭ.
Nie śmiatana
Nie tak daŭno na palicach kram i ŭ internet-dastaŭkach źjaviłasia parodyja na śmiatanu pad markaj «Alonkina Burionka». Zvyčajna vytvorcy sapraŭdnaha pradukta vialikim šryftam paznačajuć na pakunku «śmiatana», ale ž na kubačku sa śmiatannym praduktam bolšuju častku nalepki zajmaje nazva viadomaj rasijskaj marki.
Spažyŭcam prapanujuć 300-hramovy pradukt tłustaściu ŭ 15% i 20% pa canie 1,22 i 1,59 rubla adpaviedna. Dla paraŭnańnia: kiłahram 15%-naj śmiatany aceńvajecca ŭ Biełarusi ŭ kala 6 rubloŭ, kiłahram śmiatannaha pradukta — kala 4.
Što ŭvachodzić u sastaŭ psieŭdaśmiatany? Adnoŭlenaje abiastłuščanaje małako z vykarystańniem zakvaski, zamianialnik małočnaha tłušču i «kompleksnaja charčovaja dabaŭka».
Admietna, što vytvorca pradukta — biełaruski, heta kampanija «Davieha fabryk» z Vałožynskaha rajona, jakaja pryjšła na rynak troški bolš jak dva hady tamu.
«Pradukty na asnovie abiastłuščanaha małaka, vyrablenyja pa technałohii śmiatany», kampanija zarehistravała ŭ rejestry sioleta ŭ traŭni.
Nie syr
Akramia ambicyj na śmiatanu, taja ž kampanija Davega z Vałožynskaha rajona zajmieła i žadańnie vyrablać psieŭdasyr. Vyhladaje jon jak zvyčajny brusok ćviordaha i navat nazyvajecca padobna da viadomaha vidu syru — «Pošiechońje». Ale ž nasamreč heta charčovy pradukt na asnovie alejaŭ z vodaram syru.
Kiłahram takoha vyrabu kaštuje 10,25 rubla, tady jak sapraŭdny pašachonski syr biełaruskaj vytvorčaści amal udvaja daražejšy. Pry čytańni sastavu złamaješ vočy, bo pieralik inhredyjentaŭ (asabliva z prystaŭkaj Je) zajmaje pałovu 200-hramovaha pakunka. Ale ž pieršym u śpisie staić małako, što abnadziejvaje.
Jašče adzin vid parodyi na syr — hetym časam płaŭleny kaŭbasny — vyrablaje rasijskaja kampanija «Jastro». U sastavie pradukta syr paznačany daloka nie pieršym, u adroźnieńnie ad sapraŭdnych kaŭbasnych syroŭ. Bolš za ŭsio ŭ hetym cudzie charčovaj pramysłovaści… vady. Ale heta samaje biaskryŭdnaje, što dadaŭ tudy vytvorca.
Za kiłahram takoha pradukta treba addać 9,3 rubla, a takaja ž vaha kaŭbasnaha syru kaštuje prykładna 14.
Nie zhuščonka
Zvykły błakitny koler i bujny nadpis «Shuŝienka» — zhuščany syrovatačny pradukt z cukram moža ŭvieści kupcoŭ u zman svaim pakunkam. Ale ž heta nie kłasičny pradukt z Rahačova ci Hłybokaha, a surahat ad viciebskaj kampanii «Fabryka sadavinavych smakaŭ». Jość jon i ŭ kłaścičnaj blašancy, i ŭ płastyku. Tłustaść, jak i ŭ sapraŭdnaj zhuščonki, — 8,5%.
Cana 450-hramovaha pačka hetaha pradukta — 2,16 rubla, za kiłahram — 4,8. A kiło rahačoŭskaj sapraŭdnaj zhuščonki tym časam pradajuć amal za 10.
Hladzim, jaki sastaŭ: cukar, suchaja małočnaja adnoŭlenaja syrovatka, pšaničnaja muka vyšejšaha hatunku, palmavy alej, farbavalnik Je171, kansiervant Je202 i charčovy aramatyzatar. A naturalnaja zhuščonka minimalistyčnaja — tolki z małaka i cukru.
Litaralna paru tydniaŭ tamu Dziaržstandart zabaniŭ inšuju psieŭdazhuščonku rasijskaj vytvorčaści — małakaŭtrymlivajučy pradukt z zamiaščalnikam małočnaha tłušču z markiroŭkaj «Mołočnyj sojuz». Akazałasia, što bolš jak na 40% pieravyšanyja pakazalniki taho samaha zamiaščalnika.
Niaredka ŭ kramach surahaty stajać na palicach pobač z aryhinalnaj pradukcyjaj, tak što niaŭvažlivy pakupnik moža pryniać ich za śmiatanu, masła, zhuščonku i h.d.
Nie masła
Jašče adna fiška markiroŭki «Alonkina burionka» — spredy, jakija źniešnie imknucca być padobnymi da viarškovaha masła. Ale ž hetym razam surahatami aktyŭna zajmajecca rasijski vytvorca z Myciščaŭ (adnak i biełaruskija nie zastalisia ŭ baku).
180 hramaŭ takoha pradukta z tłustaściu 82,5% kaštujuć 1,75 rubla, cana takoj ža vahi naturalnaha masła — u rajonie 4 rubloŭ. U składzie spreda, pradkazalna, niama i namioku na małako.
Pakunak vyhladaje amal hetak ža, jak i ŭ masła, na piarednim baku paznačana nazva, tłustaść i masa. Dziela spraviadlivaści treba adznačyć, što vytvorca jašče paznačaje słova «spred», chacia i nie samym bujnym šryftam.
Biełaruskija «kalehi» pa spredzie z «Załatoj kropli» vyrašyli nie rabić apošniaha, i pradukt na pieršy pohlad vyhladaje masłam.
Nie johurt
Taksama časta johurtnyja pradukty zvonku nahadvajuć johurty, chacia jany časam troški tańniejšyja za naturalnyja pradukty i ŭ ich składzie šmat padazronych dabavak (ale niekatoryja ź ich byvajuć i ŭ praduktach, paznačanych jak johurt). Pryviadziem niekalki papularnych siarod pakupnikoŭ prykładaŭ.
«Niežnyj», Fruttis i «Łaskovoje leto». Pieršyja dźvie marki johurtavych praduktaŭ — rasijskija, apošniaja — biełaruskaja. Cana za kiłahram — 6, 12,87 i 6 rubloŭ adpaviedna. U toj čas kiło taho ž «biełaktaŭskaha» johurta, jaki padychodzić navat dzieciam, kaštuje 7, hrečaskaha Teos — 10,29.
Nie majanez
Vyhladaje, što kłasičnuju recepturu majanezu padtrymlivajuć daloka nie ŭsie vytvorcy, niaredka na vočy traplajucca majaneznyja sousy. Asnoŭnaje adroźnieńnie ŭ tym, što ŭ apošnich utrymlivajecca charčovaja dabaŭka — antyakiślalnik Je385, jaki nazyvajecca etylendyjamintetraacetat kalcyja-natryja. Jon choć i ličycca nizkataksičnym, ale ž nie biasškodny.
Za takuju dabaŭku, naprykład, Dziaržstandart dadaŭ u śpis niebiaśpiečnaj pradukcyi viadomy majaniez Calve, jaki nasamreč i nie źjaŭlaŭsia majanezam. Rasijski pradukt patrapiŭ u niamiłaść biełaruskich kantraloraŭ u krasaviku.
U našych kramach majaneznych sousaŭ vielmi šmat — jak ajčynnaj, tak i zamiežnaj (u asnoŭnym rasijskaj) vytvorčaści. I adroźnić ich ad sapraŭdnaha majanezu nie nadta prosta, bo na piarednim baku hetaha zvyčajna nie paznačajuć. Kali treba kupić mienavita majanez, to hetaje słova i budzie prapisana na «tvary» pakunku.
Naprykład, vytvorčaściu majaneznych sousaŭ zajmajucca marki «Kamako», ABC, «Stalica» i inšyja. U toj ža čas pad hetymi brendami vyrablajecca i majanez.
Hladzim na ceny. Kiłahram majaneznaha sousu kaštuje prykładna 5,5 rubla, majanezu — kala 8.
Ubačyli inšyja surahaty na palicach biełaruskich kram? Dašlicie foty ŭ naš bot.
Ciapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ5
Kamientary