Jaki rehijon Biełarusi najbolš «ekstremiscki» pa viersii siłavikoŭ? Heta nie Minsk
Homielskaje vydańnie «Fłahštok» praanalizavała składzieny łukašenkaŭskimi siłavikami śpis niadobranadziejnych dla ŭładaŭ hramadzian i acaniła praź jaho maštaby represij dy rehijanalnyja admietnaści.
28 kastryčnika ŭ «śpis ekstremistaŭ» unieśli adrazu 625 čałaviek. Ciapier jon uklučaje ŭžo ažno 1 469 čałaviek.
Da ciapierašniaha momantu ŭ hramadstvie skłałasia mierkavańnie, što asnova pratesnaj aŭdytoryi i samy mahutny represiŭny aparat «siłavikoŭ» skancentravanyja ŭ Minsku. Ale čym bolš papaŭniajecca śpis ekstremistaŭ, tym bolš stanovicca vidavočna, što heta nie zusim tak.
Tak, na hety momant u śpis uklučany «tolki» 391 minčanin, u toj čas jak pa-za miežami Minska i navat abłasnych centraŭ žyvuć bolš za 700 čałaviek. Ź ich 206 — ź sielskaj miascovaści i haradskich pasiołkaŭ. A kožny piaty «ekstremist» žyvie ŭ Homielskaj vobłaści, jana i źjaŭlajecca lidaram pa hetym pakazčyku siarod abłaściej — 293 čałavieki. Krychu mienš — u Bresckaj vobłaści, 253. A najmienš «ekstremistaŭ» na Mahiloŭščynie — «tolki» 74.
Siarod abłasnych centraŭ lidar pa kolkaści «ekstremistaŭ» — Brest. Na siońnia ŭ śpisie znachodziacca 115 bieraściejcaŭ. Na trecim miescy paśla Minska i Bresta — Homiel sa 111 ludźmi. A samaje cikavaje, što ŭ top-5 «samych ekstremisckich» haradoŭ Biełarusi niečakana ŭvajšoŭ i adzin rajcentr Homielščyny — Žłobin (84 čałavieki).
Kali zychodzić sa źviestak siłavikoŭ, to Žłobin, biezumoŭna, možna nazvać «samym ekstremisckim» horadam Biełarusi. Tut na tysiaču žycharoŭ prypadaje bolš za adnaho «ekstremista». Jon biezumoŭny lidar u hetym płanie pa ŭsioj Homielskaj vobłaści, u jakoj ciapier tolki piać rajonaŭ (Akciabrski, Brahinski, Lelčycki, Łojeŭski i Naraŭlanski) nie majuć svaich «ekstremistaŭ».
Pry hetym, jak padkreślivaje «Fłahštok», mnohich viadomych fihurantaŭ palityčna matyvavanych kryminalnych spraŭ u śpisie «ekstremistaŭ» pakul niama. A heta značyć, što pakul my i tut nazirajem tolki bačnuju častku ajśbierha.
Kamientary