U Biełarusi pravodziać aktyŭnuju madernizacyju bambaschoviščaŭ
Pavodle infarmacyi abjadnańnia «Biełpoł», z pačatku 2026 hoda ŭ Biełarusi aktyŭna pravodzicca invientaryzacyja, ramont i madernizacyja achoŭnych zbudavańniaŭ hramadzianskaj abarony. U arhanizacyi ličać, što maštab hetych rabot i ich praviadzieńnie ŭ roznych rehijonach krainy śviedčać pra sistemny padychod da adnaŭleńnia sietki schoviščaŭ.
U jakaści prykładu pryvodziacca danyja pa Mahiloŭskaj vobłaści. Na pačatak červienia tam naličvałasia 276 achoŭnych zbudavańniaŭ, ź jakich 204 pryznany prydatnymi dla vykarystańnia, a 72 znachodzilisia ŭ niezdavalniajučym stanie. Častku takich abjektaŭ płanujuć śpisać, astatnija — adnavić.
Padčas pravierak, praviedzienych u pieršaj pałovie hoda, vyjavili parušeńni ŭ stanie i ŭtrymańni asobnych schoviščaŭ. Pa ich vynikach słužbovym asobam vynieśli pradpisańni ab likvidacyi niedachopaŭ, a niekatorych pryciahnuli da administracyjnaj adkaznaści.
«Biełpoł» paviedamlaje, što sioleta ŭžo adnoŭlena bolš za čatyry dziasiatki achoŭnych zbudavańniaŭ. Adnačasova pavialičyłasia kolkaść abjektaŭ, pryznanych nieprydatnymi da ekspłuatacyi. Heta moža być źviazana nie z paharšeńniem ich stanu, a z bolš detalovaj pravierkaj.
U abjadnańni adznačajuć, što sama pa sabie madernizacyja schoviščaŭ nie śviedčyć pra niepaźbiežnaść uzbrojenaha kanfliktu. Adnak uličvajučy raźvićcio vajennaha supracoŭnictva Biełarusi i Rasii, hetyja miery razhladajucca jak častka dziaržaŭnaj palityki pa pavyšeńni hatoŭnaści da mahčymych nadzvyčajnych situacyj i kryzisnych scenaryjaŭ.
Pavodle źviestak MNS, u krainie naličvajecca bolš za piać tysiač zbudavańniaŭ, jakija mohuć vykarystoŭvacca dla abarony nasielnictva ŭ vypadku rakietnych udaraŭ.
Były ministr kultury Rusłan Čarniecki znajšoŭ sabie padpracoŭku9
Kamientary