ZŠA ŭtraja pavialičać vypusk 155-milimietrovych snaradaŭ. Užo da viasny vytvorčaść vyraście na 40%
Vašynhton maje na praciahu nastupnych troch hadoŭ rezka pavialičyć vytvorčaść 155-milimietrovych artyleryjskich snaradaŭ. Miarkujecca nie tolki papoŭnić zapasy, vyčarpanyja pastaŭkami Ukrainie, ale i naraścić ich.
Pra namier Pientahona žurnalistam raspavioŭ Dah Buš, pamočnik ministra armii ZŠA pa zakupkach, materyjalna-techničnym zabieśpiačeńni i technałohijach. Pavodle čynoŭnika, hety płan źviazany z nadzvyčajnym maštabam pastavak uzbrajeńniaŭ na Ukrainu, jakija ŭžo ŭchvaliŭ amierykanski Kanhres, a realizavać jaho ŭdasca dziakujučy vydzialeńniu 600 miljonaŭ dalaraŭ metavych inviestycyj, piša defensenews.com.
Buš patłumačyŭ, što hrošy dla naroščvańnia vytvorčaści ŭžo jość, i kantrakty znachodziacca ŭ stadyi realizacyi. Ministarka armii ZŠA Kryścin Vormut, u svaju čarhu, raskazała, nakolki vyraście vytvorčaść. Ciapier amierykanskaja pramysłovaść vypuskaje 14 tysiač 155-milimietrovych snaradaŭ štomiesiac. Da viasny abjomy vyrastuć da 20 tysiač snaradaŭ za miesiac. Da 2025 hoda Pientahon płanuje naraścić vytvorčaść hetaha vida snaradaŭ da 40 tysiač štuk štomiesiac.
Hety krok vyklikany tym, što ZŠA ŭžo pieradali Ukrainie bolš za miljon artyleryjskich snaradaŭ, a Pientahon prahnazuje, što vajna budzie zaciažnoj, što jašče bolš vyčarpaje zapasy zbroi sajuźnikaŭ. Buš kaža, što nieviadoma, jakija buduć siarednieterminovyja i doŭhaterminovyja patreby ŭkrainskaj armii, i armija ZŠA choča być hatovaj da luboha raźvićcia padziej.
Pamočnik ministra aptymistyčna aceńvaje pierśpiektyvy prajekta: «Kali my stvorym hety vytvorčy patencyjał, to … kali hetaja vajna praciahniecca try ci čatyry hady, adny tolki ZŠA buduć zdolnyja vyrablać našmat bolš bojeprypasaŭ, čym Rasija. A kali ŭziać naš patencyjał i patencyjał sajuźnikaŭ, to rasijski navat u paraŭnańnie nie pojdzie. Jany nie zmohuć nas dahnać».
Pientahon płanuje pašyryć i palepšyć vytvorčyja mahčymaści na svaich zavodach u štatach Piensilvanija, Tenesi i Ajova, a taksama rychtujecca padpisać kantrakty na vytvorčaść zbroi dla Ukrainy z abaronnymi firmami za miežami ZŠA.
Akramia artyleryjskich snaradaŭ, Pientahon moža padvoić vytvorčaść samych zapatrabavanych va Ukrainie vysokadakładnych bojeprypasaŭ. Heta snarady dla kiravanaj reaktyŭnaj sistemy załpavaha ahniu dla vysokamabilnaj artyleryjskaj reaktyŭnaj sistemy vytvorčaści Lockheed Martin i pieranosnyja supraćtankavyja rakiety Javelin.
Amierykanski Sienat razhladaje viersiju zakona ab dazvole na nacyjanalnuju abaronu, jaki rehłamientuje abaronny biudžet na 2023 hod. Hety dakumient dazvalaje masavyja zakupki vysokapryjarytetnych bojeprypasaŭ z vykarystańniem šmathadovych kantraktaŭ, kab dapamahčy Ukrainie i papoŭnić zapasy zbroi ZŠA. Taksama ŭ dakumiencie buduć praduhledžanyja vyklučeńni, jakija dapamohuć paskoryć praces. Pakul niama źviestak pra toje, što akt byŭ pryniaty.
Hreh Chejs, kiraŭnik amierykanskaj vajenna-vytvorčaj kampanii Raytheon, zajaviŭ, što ŭzrovień spažyvańnia zbroi padčas vajny značna pieravyšaje pramysłovyja mahutnaści. Pavodle jaho, z pačatku ŭvarvańnia Rasii va Ukrainu Kijevu byli pieradadzienyja abjomy zbroi, ekvivalentnyja 5 hadam vytvorčaści ŭ vypadku z rakietami Javelin i 13 hadam — u vypadku z partatyŭnymi zienitnymi sistemami Stinger. Tamu pierad Pientahonam staić pytańnie papaŭnieńnia stračanych zapasaŭ.
Kamientary