Lustracyja, viartańnie da Kanstytucyi 1994 hoda, uvachod u ES — HA «Pahonia» abviaściła svaju dekłaracyju

Svajoj hałoŭnaj metaj abjadnańnie «Pahonia» stavić vyzvaleńnie Biełarusi ad režymu Łukašenki, jaki, jak havorycca ŭ dekłaracyi, «całkam zaležny ad ekanamičnaj padtrymki z Rasii, a taksama spryjaŭ faktyčnaj akupacyi našaj krainy».

U suviazi z hetym HA «Pahonia» pryjarytetnaj zadačaj bačyć «adradžeńnie Biełaruskaj dziaržavy jak unitarnaj, niezaležnaj, demakratyčnaj krainy na padstavie nieabchodnaści viartańnia da Kanstytucyi 1994 hoda».

Pavodle HA «Pahonia», pytańnie pra nieabchodnaść zachavańnia pasady prezidenta moža być u pierśpiektyvie pierahledžana.

Siabry abjadnańnia zajaŭlajuć, što Respublika Biełaruś pavinna vyjści z usich damoŭ z Rasijaj u halinie pahłybleńnia intehracyi i abaronnych sajuzaŭ na čale z Maskvoj.

«U jakaści harantyi biaśpieki krainy my bačym supracoŭnictva z krainami rehijona: Litvoj, Polščaj i Ukrainaj — na padstavie sumiesnaj historyka-kulturnaj spadčyny, jakaja siahaje časoŭ VKŁ i Rečy Paspalitaj.

Naša meta — farmavańnie rehijanalnaha abjadnańnia krainaŭ Mižmorja, a taksama ŭstupleńnie ŭ Jeŭrapiejski sajuz. Pytańnie dałučeńnia da abarončaha sajuza NATA pavinna vyrašacca na ahulnacyjanalnym refierendumie», — havorycca ŭ dekłaracyi.

Biełaruskaja mova pavinna stać adzinaj dziaržaŭnaj movaj.

Desavietyzacyja, dekamunizacyja i derusifikacyja buduć asnoŭnymi zadačami abjadnańnia.

Siabry arhanizacyi vystupajuć za toje, kab biełaruskaja carkva stała niezaležnaj ad RPC.

U ekanomicy siabry arhanizacyi vystupajuć za rynkavuju sistemu i prazrystuju sistemu padatkaabkładańnia, «viartańnie skradzienych režymam u naroda praz pryvatyzacyju dziaržaŭnych pradpryjemstvaŭ i ŭviadzieńnie pryvatnaj ułasnaści na ziamlu».

Dziela pavyšeńnia adkaznaści i samastojnaści miascovych uładaŭ pavinna być praviedzienaja reforma sistemy kiravańnia i miascovaha samakiravańnia. Bolšaść paŭnamoctvaŭ razam z padatkami pavinna być pieradadzienaja miascovym vybarnym orhanam.

Na pierachodny pieryjad siabry arhanizacyi prapanujuć sfarmavać časovy vykanaŭčy orhan, jaki zabiaśpiečyć viartańnie da normaŭ Kanstytucyi 1994 hoda i pradstaŭnictva na mižnarodnaj arenie. 

Taksama jany vystupajuć za lustracyju, najpierš vyšejšaj namienkłatury i pradstaŭnikoŭ siłavych struktur režymu Łukašenki. 

Achviaram režymu pavinna być vypłačanaja adekvatnaja kampiensacyja. Niezakonnyja prysudy pavinny być nieadkładna admienienyja, pavinna być abvieščana amnistyja z reabilitacyjaj dla niezakonna asudžanych.

Abjadańnie «Pahonia» ŭ jakaści taktyčnaj zadačy dziela dasiahnieńnia mety vyzvaleńnia Biełarusi abviaściła nieabchodnaść sumiesnaj baraćby razam z ukrainskim narodam i narodami Jeŭropy suprać rasijskaj ahresii i dapamohu Ukrainie ŭsimi mahčymymi srodkami ad humanitarnych da vajenna-palityčnych.

• 131
• 0
• 5
• 7
• 2
• 1
• 6
• 0