«Zrabili čatyry kancerty ŭ Charkavie ŭ bambaschoviščach». Biełarus-dyryžor raskazaŭ pra svaju novuju pazicyju

Paŭtara hoda tamu Vital vyjhraŭ prestyžny mižnarodny konkurs dyryžoraŭ imia Artura Taskanini ŭ Italii i atrymaŭ pry hetym jašče pryz hladackich simpatyj.

Paśla hetaha jaho zaprasili pradyryžyravać u Katanii navahodni kancert. 

«U nas tady adbyłasia vielmi dobraja supraca, usie byli natchnionyja — arkiestr, kiraŭnictva teatra i ja. I jany zaprasili mianie adkryć hety kancertny siezon u listapadzie 2022-ha. Heta byli dva vielmi važnyja kancerty dla teatra paśla niekalkich miesiacaŭ adpačynku. Tut taksama naša praca z arkiestram prajšła dobra. Paśla vyrašyli paćvierdzić supracu na bolš rehularnaj asnovie, i mianie zaprasili na pasadu hałoŭnaha zaprošanaha dyryžora», — raskazvaje Vital. 

Čytajcie taksama: «Nastaŭnik kazaŭ baćku: «Lepš nie mučyć, słychu ŭ jaho niama». Biełarus vyjhraŭ adzin z samych prestyžnych konkursaŭ dla dyryžoraŭ

Pamiž zaprošanym i hałoŭnym zaprošanym dyryžoram isnuje istotnaja roźnica.

«Pieršaha zaprašajuć na niejki adziny prajekt. Jak u mianie było ŭ Ła Skała, naprykład. Tady pracavaŭ tam dva miesiacy nad adnoj opiernaj pastanoŭkaj. A voś hałoŭny zaprošany dyryžor — bolš aficyjny ŭzrovień. Tady ciabie zaprašajuć rehularna, i heta ŭžo pasada. Nastupny tytuł — hałoŭny dyryžor, jon znachodzicca ŭ teatry pastajanna», — tłumačyć Vital. 

Konkursu na pasadu hałoŭnaha zaprošanaha dyryžora nie było.

«Ja nie viedaju, ci byli jašče kandydaty, akramia mianie, — kaža Vital. — Zrazumieła, što kožny, chto pryjazdžaje jak «haściavy dyryžor», moža dajści da takoha tytuła. Ale nie kožny dachodzić, jak my bačym. 

Takaja pasada — karjerny rost, mahčymaść na bolš dalokuju pierśpiektyvu składvać adnosiny z hetym teatram, arkiestram. Taksama ja mahu kazać svajo mierkavańnie nakont taho ci inšaha prajekta. Heta bolš adnosiny na roŭnych z kiraŭnictvam teatra, ja častka kamandy». 

Ciapier peŭny čas Vital budzie žyć na Sicylii. Vučyć z nula italjanskuju movu jamu nie pryjdziecca — jon jaje dobra viedaje. 

«Razmaŭlaju na piaci movach. Dla dyryžora, jaki zajmajecca opieraj, važna viedać italjanskuju, bo mnie padajecca, što razumieć inakš italjanskuju opieru niemahčyma. 

Z-za taho, što ja viedaju miascovyja movy, mahu chutčej intehravacca ŭ kulturnuju prastoru. Dumaju, što heta vielmi važna z muzyčnaha boku. Kali ty dyryžyruješ muzyku ź Italii, Francyi ci Hiermanii, to treba razumieć hetyja krainy. I jašče mnie prosta padabajecca intehravacca, razumieć, što roznyja ludzi majuć niešta adnolkavaje, što abjadnoŭvaje», — raskazvaje jon.

Viasnoj 2022-ha ŭ Vitala płanavalisia kancerty ŭ Lvovie, Dniapry, Charkavie i Kijevie, ale z-za pačatku vajny va Ukrainie jon paśpieŭ papracavać tolki ŭ Adesie ŭ pačatku lutaha.

«Jak artystyčny dyrektar muzyčnaha fiestyvalu ŭ Charkavie, ja zaŭsiody ŭ kantakcie ź ludźmi, sprabujem arhanizavać što-niebudź.

Naprykład, viasnoj 2022-ha zrabili čatyry kancerty ŭ Charkavie ŭ bambaschoviščach.

Kaniečnie, dumajem, jak dalej heta možna raźvivać. I tady, i ciapier takim čynam treba kazać, što Ukraina zmahajecca, u jaje jość svaja kultura. Navat kali my zmučanyja ad taho, što adbyvajecca tam i ŭ Biełarusi, usio roŭna treba iści dalej, nie spyniacca», — raskazvaje jon.

Siły na pracu ŭ kulturnych prajektach i kancertach Vital biare ŭ natchnieńni.

«Muzyka mianie natchniaje i daje mahčymaść taksama natchniać inšych. Adbyvajecca abmien enierhijaj. Moj dośvied pakazvaje, što čym bolš ty robiš, tym bolš sił u ciabie źjaŭlajecca», — padsumoŭvaje jon. 

Čytajcie taksama: 

«Kvietka raście ŭ rebrach»: Syndrom Samazvanca vydaŭ ekzistencyjalny albom «Vostraŭ skarhaŭ»

Džej Ło, Metallica, Depeche Mode. Samyja čakanyja albomy 2023 hoda

Hurt «Daj darohu!» vypuściŭ novy trek — dla ŭsich śmiełych biełarusaŭ

• 12
• 0
• 0
• 0
• 1
• 3
• 1
• 0