Forvard chakiejnaha «Dynama-Minsk» choča, kab zarobak jamu padniali da miljona dalaraŭ za hod. Dva inšyja ŭžo atrymlivajuć amal stolki

Na minułym tydni skončyŭsia siezon dla minskaha «Dynama». Ciapier kłubnaje kiraŭnictva vyrašaje, z kim pojdzie ŭ nastupny čempijanat — nieabchodna vyznačycca z hałoŭnym trenieram i mnohimi chakieistami.

Bolš za ŭsio ŭvahi, piša biełaruskaje spartovaje vydańnie «Trybuna», pryciahvaje budučynia napadnika Aleksa Limoža, u jakoha kantrakt zakančvajecca 31 maja.

28‑hadovy amierykaniec staŭ trecim bambardziram rehularki KCHŁ, za 68 matčaŭ nabraŭ 73 (24+49) bały, a taksama najlepšym lehijanieram-navičkom u historyi minskaha «Dynama». Unutry kamandy forvard byŭ druhim paśla Sema Enasa, jaki vybiŭ 89 (32+57) bałaŭ u 67 matčach. U płej-of rezultatyŭnaść Limoža krychu źniziłasia — 1+5 u vaśmi matčach.

Pieramovy z amierykancam ab novym kantrakcie pačalisia jašče padčas siezona, adnak pryjści da pahadnieńnia, jak, naprykład, z Enasam, nie ŭdałosia. Pierad startam płej-of Limoža spytali pra budučyniu ŭ «Dynama». «Pakul usie maje dumki pra płej-of <…> Nu a dalej?.. Pabačym», — syšoŭ ad kankretnaha adkazu chakieist.

Uchiliŭsia jon ad kankretyki i adrazu paśla vyletu kamandy z Kubka Haharyna: «Pabačym, čas pakaža. Viedajecie, ja byŭ sfakusavany na płej-of… Pakul ja prosta chaču pravieści čas ź siabrami, a z hetym pytańniem my raźbiaromsia paźniej».

U subotu źjaviłasia infarmacyja pra toje, što Limož nie praciahvaje kantrakt, bo nie moža damovicca z «Dynama». Letaś napadnik nie raz kazaŭ, što pastaviŭ metu za hod dobra prajavić siabie ŭ rasijskaj lizie i narešcie trapić u NCHŁ. Paśla vynikovaha siezona ŭ Paŭnočnaj Amierycy sapraŭdy mohuć źjavicca varyjanty.

Dla paraŭnańnia, voś top-uzrovień zarobkaŭ u KCHŁ na hety momant:

• Šełdan Rempał («Sałavat Jułajeŭ») — 1,31 miljona dalaraŭ;

• Alaksandr Barabanaŭ, Dźmitryj Jaškin (abodva — «Ak Bars»), Uładzimir Tkačoŭ («Mietałurh») — pa 1,25 miljona dalaraŭ;

• Roka Hrymadzi (SKA) — 1,2 miljona dalaraŭ;

• Ryd Buše («Aŭtamabilist»), Aleks Halčaniuk («Amur») — pa 1,18 miljona dalaraŭ;

• Kanstancin Okułaŭ («Avanhard») — 1,11 miljona dalaraŭ;

• Siarhiej Tałčynski («Mietałurh»), Džordan Uił («Dynama» Maskva) — pa 1,05 miljona dalaraŭ.

Tym časam źjaviłasia infarmacyja, što Limož atrymaŭ prapanovu na žadanuju sumu ad SKA, u jakoha prablemy z kreatyvam — kamandzie nieabchodny forvard-dyśpietčar, i na hetuju rolu lehijanier vydatna padychodzić. U vypadku pierachodu chakieist dastaniecca SKA biaspłatna — napadnik voś-voś stanie nieabmiežavana svabodnym ahientam.

U niadzielu źjaviŭsia novy insajd — Limož trapiŭ u śfieru intaresaŭ «Ak Barsa», dzie hatovyja dać amal 1,2 miljona dalaraŭ.

Akramia Limoža paśla 31 maja «Dynama» biez anijakich abmiežavańniaŭ mohuć pakinuć jašče šeść lehijanieraŭ — abaroncy Daren Dzic i Robiert Chemiłtan, a taksama napadniki Stanisłaŭ Halijeŭ, Vadzim Šypačoŭ, Rajan Spunier i Kirył Varonin. Pavodle apošnich paviedamleńniaŭ, ź minčanami raźvitajecca Chemiłtan, jaki nibyta ŭžo ŭzhadniŭ umovy dvuchhadovaha pahadnieńnia z CSKA. Praŭda, z abviaržeńniem dniami vystupiŭ ahient abaroncy Derył Volski — maŭlaŭ, chakieist razhladaje prapanovy ad piaci kłubaŭ i ni z kim jašče nie padpisvaŭsia.

Blizki da źmieny kłuba Dzic. Čakajecca, što kanadziec padpiša adnahadovy kantrakt z «Sibirju». Niezrazumiełaja budučynia ŭ Minsku Spuniera. Napadnik nie suprać praciahnuć karjeru ŭ «Dynama», kali atrymaje novuju prapanovu, pry hetym užo razhladaje varyjanty ŭ Hiermanii. Pra płany kłuba adnosna rasijan Halijeva, Šypačova i Varonina ničoha nie havaryłasia.

Ź biełarusaŭ nieabmiežavana svabodnym ahientami ŭ kancy viasny stanuć abaronca Kryścijan Chienkiel i napadniki Andrej Staś i Viačasłaŭ Hrecki.

Chutčej za ŭsio, pierśpiektyvy rasijan i biełarusaŭ vyznačacca paśla taho, jak budzie pryniata rašeńnie pa hałoŭnym treniery na siezon-2026/27. Pra budučyniu Dźmitryja Kvartalnava ŭ Minsku pakul ničoha aficyjna nie abviaščałasia. Sam trenier jašče nie raźvitvaŭsia z kamandaj i ŭstrymoŭvajecca ad kamientaroŭ na temu budučyni. Pavodle apošnich insajdaŭ, Kvartalnaŭ — adzin z hałoŭnych kandydataŭ na pasadu hałoŭnaha treniera «Traktara». Na jaho miesca ŭ Minsku rasijski žurnalist Artur Chajrulin nazyvaje asnoŭnym pretendentam Andreja Michalova — daŭniaha siabra adnoj z centralnaj fihur pry dvary Alaksandra Łukašenki Dźmitryja Baskava.

Dziejnyja pahadnieńni z «Dynama» na siezon-2026/27 majuć 18 chakieistaŭ: bramniki Vasil Demčanka, Zak Fukale, Anton Krupaviec, Jaŭhien Procharaŭ, abaroncy Džošua Bruk, Daniił Kryštofik, Bredzi Łajł, Nikałas Miełoš, Ksaŭje Uele, napadniki Sem Enas, Jahor Karabań, Dźmitryj Chabian, Bahdan Biełkin, Siarhiej Kuźniacoŭ, Daniił Lipski, Mikałaj Sałyha, Daniił Sacišvili i Ilja Usaŭ.

• 0
• 0
• 1
• 4
• 0
• 0
• 1
• 0