Pradstaŭnica Dziarždepartamienta: ZŠA ličać dyjałoh z režymam Łukašenki nieabchodnym
Robin Danihien, namieśnica pamočnika dziaržsakratara ZŠA, jakaja adkazvaje za dypłamatyju va Uschodniaj i Centralnaj Jeŭropie, padčas svajho vizitu ŭ Vilniu parazmaŭlała z «Radyjo Svaboda». Siarod inšaha jana zakranuła pytańni sankcyj suprać Biełarusi i Rasii, pierśpiektyŭ dyjałohu z režymam Łukašenki i staŭleńnie da prablemy palitviaźniaŭ u Biełarusi.
— Ci ličycie vy, što ciapierašnija sankcyi ZŠA i Jeŭrasajuza suprać Rasii i Biełarusi efiektyŭna ŭpłyvajuć na palityčnyja rašeńni Pucina i Łukašenki?
— Ja dumaju, što sankcyi ŭžo vielmi efiektyŭnyja, i heta budzie ŭsio bolš vidavočnym ź ciaham času.
Siarod našych sankcyj — vielmi žorstki kantrol za ekspartam. Davajcie dla prykładu voźmiem rasijskija vojski. Kantrol za ekspartam arhanizavany mienavita dla taho, kab harantavać, što Pucin nie zmoža praciahvać naroščvać, zabiaśpiečvać i padtrymlivać svaje ŭzbrojenyja siły i vajenna-pavietranyja siły. Nie zmoža zabiaśpiečvać ich sučasnymi technałohijami. My pierarazajem technałahičnyja pastaŭki dla jaho mašyny vajny.
Ja liču, što ciapier jon vydatkoŭvaje značnuju častku svaich zapasaŭ, i jon nie zdoleje adnavić hetyja zapasy z pryčyny našaha kantrolu za ekspartam.
Takim ža čynam mnohija našy finansavyja sankcyi stvarajuć cisk na ekanomiku, i my ŭbačym vyniki hetaha ŭ nastupnyja miesiacy i hady.
Toje, čaho my chočam adnosna Biełarusi ŭ sensie sankcyj, heta paŭpłyvać na pazicyju režymu i prymusić režym vykonvać svaje ŭłasnyja abaviazalnictvy ŭ ramkach Statuta AAN i pierad ABSIE — nie być saŭdzielnikam u hetaj vajnie.
— A jakija ŭmovy ZŠA dla taho, kab pačać dyjałoh z Łukašenkam?
— U nas jość dyjałoh z režymam. U ich jość ambasada ŭ Vašynhtonie, a kamanda našaj ambasady, jakaja ciapier u Vilni, praciahvaje vieści dyjałoh. My ŭ Dziarždepartamiencie dypłamaty, my ličym, što dyjałoh nieabchodny.
My paviedamlajem režymu Łukašenki, što my budziem rady bolš detalova razmaŭlać pa šerahu pytańniaŭ, jakija adpaviadajuć uzajemnym intaresam.
Pieršyja kroki, jakija my b chacieli pabačyć ad režymu, — pravieści svabodnyja i spraviadlivyja vybary, vyzvalić usich palityčnych viaźniaŭ, dazvolić pracu hramadzianskaj supolnaści i niezaležnym ŚMI, jakija ŭ niejkim sensie źjaŭlajucca sercam Biełarusi.
My b chacieli, kab Biełaruś była ŭ mienšaj stupieni saŭdzielnicaj u hetaj vajnie. Heta važnyja źmieny, jakija my b chacieli ŭbačyć. Ale my ŭžo majem dyjałoh. Dyjałoh — heta važna, i my chočam trymać linii kamunikacyi adkrytymi.
— Ci bačycie vy niejkija dadatkovyja kroki, jakija mahli b zrabić Złučanyja Štaty, kab prymusić režym vyzvalić palityčnych viaźniaŭ?
— Dumaju, vy viedajecie, što mnohija sankcyi, nakładzienyja nami na Biełaruś, byli vyklikanyja tym, što praciahvajecca źniavoleńnie palityčnych viaźniaŭ. My pa-raniejšamu robim heta klučavym elemientam kožnaj našaj razmovy z režymam.
U hetym my pracujem popleč z našymi jeŭrapiejskimi partniorami. My budziem praciahvać padkreślivać u Jeŭropie i ŭ rešcie śvietu tuju canu, jakuju płaciać palitviaźni ŭ Biełarusi.
Ja jedu ź Vilni ŭ Polšču, dzie ja sustrenusia sa svaim kaleham z polskaha ŭrada. I adna z našych razmoŭ budzie pryśviečanaja budučyni sankcyj suprać režymu ŭ Biełarusi. Za jaho saŭdzieł u vajnie i za abychodžańnie z palitviaźniami. My budziem niaspynna padkreślivać heta.
Čytajcie taksama:
Cichanoŭskaja abmierkavała novuju stratehiju pa Biełarusi z pamočnicaj dziaržsakratara ZŠA
«My jašče ŭsurjoz nie pačynali». Novy pakiet sankcyj ES zakranie śfieru, jakuju raniej nie čapali
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary