«Dumali, što ŭsio abmiažujecca vobšukami. Ja taksama nie čakaŭ takoha». Admin kanała čyhunačnikaŭ pra šantaž siłavikoŭ i niepaŭnaletniaha brata ŭ SIZA

Siarhiej Vajciachovič vyvučyŭsia na ahladčyka-ramontnika vahonaŭ, paśla pajšoŭ adpracoŭvać raźmierkavańnie ŭ Minskim vahonnym depo. Tam chłopiec zatrymaŭsia na čatyry hady.

U žniŭni 2020-ha jon stvaryŭ pratesny telehram-kanał čyhunačnikaŭ.

— Paśla žnivieńskich padziej mianie spačatku sprabavali zvolnić pa zhodzie bakoŭ, paśla — pa artykule, ale ž zatym usio ž dačakali daty skančeńnia kantrakta, krasavika 2021 hoda, — zhadvaje jon.

Pavialičyć

Nieŭzabavie Siarhiejem zacikavilisia supracoŭniki KDB, pra što Vajciachoviču paviedamili «svaje ludzi» — užo ŭ mai 2021-ha chłopiec pakinuŭ Biełaruś, uciakaŭ praz Rasiju va Ukrainu.

— Jašče padčas pracy ad kiraŭnictva byli pretenzii da resursu, praź jaki ja moh abjadnoŭvać ludziej i danosić da ich infarmacyju. Ale ž u pole zroku KDB ja patrapiŭ z-za «rejkavaj vajny» ŭ 2020 hodzie (havorka idzie pra pieryjadyčnaje naciahvańnie drotu pamiž rejkami na roznych učastkach čyhunki ŭ kastryčniku 2020-ha. — NN). Atrymlivajecca, što ja naŭprost vyrvaŭsia z łap KDB, — raspaviadaje biełarus.

Vajciachovič zhadvaje, što pry stvareńni kanała jon nie chavaŭ, što źjaŭlajecca jaho adminam, i jaho kiraŭnictva viedała pra heta ad samaha pačatku. Ale ž apubličvać statystyčnyja i inšyja danyja surazmoŭca staŭ tolki paśla adjezdu ź Biełarusi.

Spačatku ŭ kanale publikavalisia darožnyja karty, hrafik voinskich ešałonaŭ na vučeńniach «Zachad-2021». U listapadzie 2021-ha na kanale čyhunačnikaŭ źjavilisia danyja pra padrychtoŭku masštabnaj pierakidki vojsk u Biełaruś z Rasii, u studzieni 2022-ha — infarmacyja pra kolkaść ešałonaŭ, jakija płanavałasia pierakinuć da lutaha.

Pavialičyć

Cikavaść siłavikoŭ da siamji Siarhieja pačałasia adrazu paśla jaho adjezdu ź Biełarusi.

— Vobšuki, vobšuki, vobšuki… MUS, KDB… Ja ŭžo źbiŭsia z padliku, kolki ich było, mo, try ci čatyry. Vobšuki prachodzili pa miescy majoj rehistracyi, dzie žyvuć baćki. U ich siłaviki, pa sutnaści, ničoha nie raspytvali, prosta kazali im, što ja teraryst, ekstremist, zdradnik dziaržavy i špijon. Uziali niejkija maje rečy, narmatyŭnuju dakumientacyju ź minułaj pracy — nie viedaju, navošta jana im, — adznačaje surazmoŭca.

Pavodle słoŭ Siarhieja, aktyŭnyja sproby cisnuć na jaho siamju pačalisia ŭ studzieni 2022 hoda, kali pačałosia maštabnaje pierakidvańnie rasijskich vojsk na terytoryju Biełarusi.

— Vyrašyli «kapać» pad usich maich svajakoŭ, uklučajučy niepaŭnaletniaha brata Arcioma. Da jaho zatrymańnia kadebešniki pieryjadyčna pryjazdžali na pracu da maci — patrabavali, kab ja spyniŭ svaju dziejnaść i vydaliŭ prajekt. Apošni taki vizit byŭ 31 śniežnia, — kaža Vajciachovič.

Siarhiej praz maci pieradavaŭ siłavikam, kab jany źviazvalisia ź im naŭprost i nie vykarystoŭvali ŭ hetym pracesie žančynu.

Pavialičyć

— Brata (havorka idzie pra 15-hadovaha Arcioma. — NN) zatrymali 17 studzienia, jaho zabrali prosta sa škoły. Da hetaha jaho vyklikali ŭ RUUS razam z baćkami. Jany chadzili z advakatam — i pa sutnaści spravy havorki nie išło.

Reč u tym, što ŭ listapadzie ŭ dziaciej u škole byŭ kanflikt, jaki vyrašyli baćki na ŭzroŭni škoły — tam navat bojki nie było. Jak ja zrazumieŭ tady, nivodny bok pretenzij adzin da adnaho nie mieŭ. Toje, što inkryminujuć bratu — vydumka, — ličyć naš surazmoŭca.

15-hadovamu Arciomu vystaŭlena abvinavačvańnie pa č. 2 art. 208 Kryminalnaha kodeksa (vymahańnie).

— Spačatku brata zabrali ŭ Śledčy kamitet, aformili, a paśla źmiaścili ŭ IČU na Akreścina na 72 hadziny. Paśla hetaha — nazad u SK, uziali padpisku ab niavyjeździe i adpravili ŭ Navinki na niejkaje abśledavańnie ŭ korpus, jaki naležyć prakuratury. Tam jaho pratrymali da 9 lutaha, paśla čaho pavieźli ŭ prakuraturu Minska, tam zatrymali jak padazravanaha i pasadzili ŭ SIZA na Vaładarskaha. Tam užo vystavili abvinavačvańnie, — zhadvaje Vajciachovič.

Zhadany punkt (č. 2 art. 208) u Kryminalnym kodeksie hučyć davoli surova:

«Vymahańnie, učynienaje paŭtorna, abo hrupaj asob pa papiaredniaj zmovie, abo z prymianieńniem hvałtu, niebiaśpiečnaha dla žyćcia abo zdaroŭja paciarpiełaha, abo pad pahrozaj zabojstva abo pryčynieńnia ciažkaha cialesnaha paškodžańnia, abo źviazanaje sa źniščeńniem abo paškodžańniem majomaści, abo z metaj atrymańnia majomasnaj vyhady ŭ bujnym pamiery».

U vypadku vyniasieńnia prysudu ab vinavataści takija dziejańni karajucca źniavoleńniem na termin ad 3 da 10 hadoŭ.

— My navat pierapisvalisia z KDB, jany pieradavali svaje pasłańni, a my pastavili svaju ŭmovu — spačatku adpuścić brata, a paśla vieści hutarku ab spynieńni dziejnaści i h. d.

Ale ž iści na ździełku z KDB — takoje sabie, byli b jašče patrabavańni ź ich boku. Viadoma, što paśla vydaleńnia kanała cisk nie spyniŭsia b, byli b i inšyja ŭmovy. U mianie ž jość nie tolki publičnaja dziejnaść, i pra heta im dobra viadoma, — upeŭnieny Siarhiej.

Siarhiej kaža, što siamja zastałasia ŭ krainie, bo nie chacieła źjazdžać i nie dumała, što moža dajści da takoha — da zatrymańnia brata.

— Dumali, što prosta buduć praciahvacca vizity, a dalej sprava nie zojdzie. Ščyra kažučy, ja taksama nie čakaŭ takoha, — pryznajecca chłopiec.

Čytajcie taksama:

Na 15-hadovaha brata admina kanała čyhunačnikaŭ zaviali kryminalnuju spravu

Čyhunačnika pasadzili za toje, što jon pierasłaŭ fota ciahnika, jaki raźbiŭsia ab pryčep z hnojem

• 1
• 0
• 3
• 6
• 4
• 7
• 48
• 0