Rasijski błohier Varłamaŭ paviedamiŭ pra źmienu hramadzianstva na turkmienskaje i pierajeździe ŭ hetuju krainu. Niečakana ŭsie pavialisia

«Ciapier heta ŭžo nie sakret. Niekalki hadoŭ tamu ja ŭviazaŭsia ŭ davoli niezvyčajnuju historyju. Siońnia ŭ ambasadzie ŭ Stambule ja pryniaŭ hramadzianstva Turkmienistana i, narešcie, atrymaŭ pašpart», — napisaŭ Varłamaŭ. Jon taksama dadaŭ, što bližejšym časam budzie zajmacca pierajezdam.

«Hladzicie i zajzdrościcie, ja hramadzianin… Napieradzie składany pierajezd i šmat cikavaha kantentu», — dadaŭ błohier.

Siońnia inšy błohier, Maksim Kac źviarnuŭsia da Varłamava pa tłumačeńni. Vyjaviłasia, što jon byŭ pieršym, chto pacikaviŭsia kamientaryjem Varłamava.

«Na žal, ja zanadta mocna pieraviarnuŭ kalandar i dumaŭ, što siońnia 1 krasavika, a nie 8 sakavika. I ŭžo dumaŭ vydalać hety žart, jaki zaciahnuŭsia, ale potym ź cikavaściu pačaŭ nazirać, što ni adzin žurnalist, jaki napisaŭ pra heta, nie znajšoŭ času napisać mnie ci patelefanavać, kab uziać kamientaryj. Nichto navat nie adkryŭ praviły atrymańnia turkmienskaha hramadzianstva. Padobna, navina pra toje, što Varłamaŭ adpraŭlajecca ŭ Turkmienistan, była takaja dobraja, što jaje vyrašyli nie psavać udakładnieńniami.

Ale kali b ja sapraŭdy atrymaŭ turkmienskaje hramadzianstva, to mianie chvalavała b ciapier tolki adno pytańnie: mianie adrazu paviesiać abo budzie sud?» — adkazaŭ Varłamaŭ Kacu.

U instahramie Varłamaŭ udakładniŭ, što dumka pra toje, nibyta chtości dobraachvotna zachoča atrymać turkmienski pašpart, dy jašče i vychvalacca hetym, zdavałasia jamu takoj absurdnaj, što jon vyrašyŭ zapościć fota jak žart.

«Ja byŭ upeŭnieny, što nichto ŭ takoje nie pavieryć. Heta ŭsio roŭna što: «Siabry, ja vyrašyŭ pierajechać u Paŭnočnuju Kareju». Ale raptam žart pačaŭ žyć svaim žyćciom. Znajomyja i siabry pisali mnie vinšavańni! Chtości navat zajzdrościŭ, pytaŭsia, jak atrymać!» — napisaŭ Varłamaŭ.

Jon dadaŭ, što 8 sakavika jakraz było važnym źviarnuć uvahu na Turkmienistan, dzie, piša jon, žančynam zabaranili vadzić mašynu i navat jeździć na piarednim siadzieńni; zakryli ŭsie sałony pryhažości i zabaranili lubyja kaśmietyčnyja pracedury; uviali faktyčnuju zabaronu na aborty; nielha navat siadzieć razam z mužčynam na łavačcy, kali vy nie zamužam.

«Dla žančyn u krainie pačaŭsia sapraŭdny kašmar. Z kožnym dniom prymajucca ŭsio bolš absurdnyja zakony i zabarony. Ale nichto pra heta nie piša i nie kaža», — raspavioŭ Varłamaŭ.

Za film «Zabaronieny Turkmienistan» Varłamavu ŭ 2016 hodzie pahražali adrezać hałavu. U 2021 hodzie jon źniaŭ jašče adzin film pra Turkmienistan — z cykłu «30 hadoŭ biez SSSR». U dvuchhadzinnym filmie raspaviadajecca pra aŭtarytarnyja režymy Saparmurata Nijazava i Hurbanhuły Bierdymuchamiedava, pra prablemy žycharoŭ krainy i turkmienskich aktyvistaŭ, jakich ułady krainy praśledujuć navat za miažoj.

• 23
• 0
• 69
• 21
• 6
• 7
• 2
• 0